Somo mar 11

Puonj Kod Timbe ma Ok Mor Nyasaye

Puonj mage gi timbe mage maricho? (1)

Bende onego Jokristo oyie ni Nyasaye en Nyadidek? (2)

Ang’o momiyo Jokristo maradier ok par chieng’ Krismas, Ista, kata chieng’ nyuol ng’ato? (3, 4)

Bende jo motho nyalo hinyo jo mangima? (5)

Bende Yesu notho e msalaba? (6)

Miyo Nyasaye mor en gima duong’ marom nade? (7)

1. Ok puonj duto gi timbe duto richo. Kata kamano Nyasaye ok oyie kodgi ka gia kuom din ma ok adiera kata ka gikwedo puonj mag Muma.—Mathayo 15:6.

2. Nyadidek: Bende Jehova en Nyadidek—ji adek ei Nyasaye achiel? Ooyo! Jehova, Wuoro, en “Nyasaye makende maradier.” (Johana 17:3; Mariko 12:29) Yesu en Wuode mokwongo kendo en e bwo Nyasaye. (1 Jo Korintho 11:3) Wuoro duong’ moloyo Wuowi. (Johana 14:28) Roho maler ok en ng’ato; en teko Nyasaye ma otiyogo.—Chakruok 1:2; Tich Joote 2:18.

3. Krismas gi Ista: Yesu ne ok onyuol chieng’ Desemba 25. Nonyuole machiegini gi Oktoba 1, e kinde ma jokwath ne kwayo jamni oko gotieno. (Luka 2:8-12) Yesu ne ok ochiko Jokristo mondo opar chieng’ nyuolne kata matin. To nowacho ne jopuonjrene mondo gipar chieng tho mare. (Luka 22:19, 20) Krismas kod timbene owuok kuom dinde machon ma ok adier. Mano e kaka Ista bende chalo gi timbene kaka konyruok gi tong gweno kod apwoyo. Jokristo mokwongo ne onge gi chieng’ Krismas gi Ista, kaka Jokristo maradier kawuono.

4. Odiechieng Nyuol: Paro nyuol ariyo kende ma Muma wuoye ne otim gi ji mane ok lam Jehova. (Chakruok 40:20-22; Mariko 6:21, 22, 24-27) Jokristo ne ok par odiechieng nyuol. Tim mar paro odiechieng nyuol wuok kuom dinde machon ma ok adier. Jokristo maradier chiwo mich kendo bedo gi mor kaachiel e kinde ka kinde e higa.

5. Luoro Jo Motho: Jo motho ok nyal timo gimoro amora kata winjo gimoro amora. Ok wanyal konyogi, bende ok ginyal hinyowa. (Zaburi 146:4; Eklesiastes 9:5, 10) Chuny tho; ok osik kongima bang’ tho. (Ezekiel 18:4) To kinde moko malaika maricho, miluongo ni jochiende, wuondore ni gin chuny jomotho. Timbe ma ji timo nikech luoro kata lamo jo motho ok ber.—Isaiah 8:19.

6. Msalaba: Yesu ne ok otho e msalaba. Notho e siro, kata yath. Wach mar dho Joyunani miloko ni “msalaba” e Muma mang’eny tiende ne en mana yath achiel kende. Ranyisi mar msalaba wuok kuom dinde machon ma ok adier. Jokristo mokwongo ne ok konyre gi msalaba kata lame. Omiyo, iparo ni dibedi gima kare mondo ikonyri gi msalaba kuom lamo?—Rapar mar Chik 7:26; 1 Jo Korintho 10:14.

7. Nyalo bedo matek weyo moko kuom puonjgi gi timbegi. Wede kod osiepe nyalo temo mondo ochuni mondo kik iwe puonjgi. Kata kamano miyo Nyasaye mor en gima duong’ moloyo miyo dhano mor.—Ngeche 29:25; Mathayo 10:36, 37.

[Picha manie ite mar 22]

Nyasaye ok en Nyadidek

[Picha manie ite mar 23]

Krismas gi Ista ne owuok kwom dinde machon ma ok adier

[Picha manie ite mar 23]

Onge tiende lamo jo motho kata luorogi