Somo mar 13

Ere Kaka Inyalo Yudo Din Maradier?

Bende dinde duto moro Nyasaye, koso din achiel kende? (1)

Ang’o momiyo nitie dinde mang’eny mokawore ni Jokristo? (2)

Ere kaka inyalo ng’eyo Jokristo maradier? (3-7)

1. Yesu nochako din achiel maradier mar Jokristo. Kamano e kindegi nyaka bedie mana riwruok achiel, kata kanyakla mar jogo malamo Jehova Nyasaye eyo maradier. (Johana 4:23, 24; Jo Efeso 4:4, 5) Muma puonjo ni ji matin kende e mantie e yo madiny madhi e ngima.—Mathayo 7:13, 14.

2. Muma nokoro ni bang’ tho joote, puonj maricho kod timbe ma ok mag Jokristo nodonji mosmos e kanyakla mar Jokristo. Ji noywa jo moyie mondo uluwgi kar luwo Kristo. (Mathayo 7:15, 21-23; Tich Joote 20:29, 30) Mano emoniyo waneno dinde mang’eny mopogore-opogore mokawore ni gin Jokristo. Ere kaka wanyalo ng’eyo Jokristo maradier?

3. Kido maduong’ moloyo mar Jokristo maradier en ni gin gi hera maradier e kindgi giwegi. (Johana 13:34, 35) Ok puonjgi mondo gipar ni gibeyo moloyo jowetegi mag ogendini mamoko kata man gi kido moko mag pien. Kata ok puonjgi chayo ji moa e pinje mamoko. (Tich Joote 10:34, 35) Omiyo ok giked e lwenje. Jokristo maradier nenore e kindgi giwegi kaka owete kod nyimine.—1 Johana 4:20, 21.

4. Kido machielo mar din maradier en ni jolupne nigi luor matut kuom Muma. Gikawe kaka Wach Nyasaye kendo gi yie gi gima owacho. (Johana 17:17; 2 Timotheo 3:16, 17) Gitiyo gi Wach Nyasaye kaka gima duong’ moloyo kar tiyo gi paro kata timbe mag dhano. (Mathayo 15:1-3; 7-9) Gitemo mondo gidagi kaka Muma dwaro e ngimagi mapile. Kuom mano timbegi luwore gi puonjgi.—Tito 1:15, 16.

5. Din maradier bende nyaka mi nying Nyasaye luor. (Mathayo 6:9) Yesu nolando nying Nyasaye, Jehova, ne jomoko. Jokristo maradier bende nyaka tim kamano. (Johana 17:6, 26; Jo Rumi 10:13, 14) Gin jo mage e gweng’u malandoga nying Nyasaye?

6. Jokristo maradier nyaka land wach mar Pinyruodh Nyasaye. Yesu notimo kamano. Kinde duto nowuoyo kuom Pinyruoth. (Luka 8:1) Nomiyo jopuonjre ne chik mondo giland wachni e piny duto. (Mathayo 24:14; 28:19, 20) Jokristo maradier oyie ni Pinyruodh Nyasaye ema biro kelo kuwe kod rit maradier e pinyni.—Zaburi 146:3-5.

7. Jopuonjre Yesu ok onego riwre gi piny marachni. (Johana 17:16) Ok gidonji e weche mag kedo ne piny kod koko mag gwenge. Ok giriwre gi timbe kod gik makelo hinyruok matinde ng’eny e piny duto. (Jakobo 1:27; 4:4) Bende inyalo ng’eyo kanyakla mar jodin mantie e gweng’u man gi kidogi mag Jokristo maradier?

[Picha manie ite mar 26, 27]

Jokristo maradier oherore giwegi, gi miyo Muma luor, kendo gilando wach mar Pinyruodh Nyasaye