Somo mar 14

Kaka Joneno mag Jehova Ochan

Joneno mag Jehova ma kawuono nochakore karang’o? (1)

Ere kaka chokruok mag Joneno mag Jehova itimo? (2)

Ere kaka gichulo ting’ margi mar pesa? (3)

Ng’ama otelo e kanyakla ka kanyakla? (4)

Chokruok mage madongo mitimo higa ka higa? (5)

Tije mage ma gitimo e ofis maduong’ kod ofis mamoko matindo? (6)

1. Joneno mag Jehova ma kawuono nochakore e higini mag 1870. Mokwongo, niluongogi ni Jopuonjre Muma. To e higa mar 1931 ne gikao nying moluwore gi Ndiko ni Joneno mag Jehova. (Isaiah 43:10) Kanyaklani nochakore matin-tin ma nodongo mochopo e tara mang’eny mag Joneno, modich ka lando wach e pinje 230 gi wiye.

2. Kanyakla mang’eny mag Joneno mag Jehova timo chokruok didek e juma. Orwaki mondo idhiye chokruok moro amora kuom mago. (Jo Hibrania 10:24, 25) Gik mipuonjo ae e Muma. Chokruok ichako kendo itieko gi lemo. ‘Wende mag roho’ ma ae e chuny bende iwero e thoth chokruokgi. (Jo Efeso 5:18, 19) Donjo en nono, kendo onge solro mitimo.—Mathayo 10:8.

3. Kanyakla mang’eny timo chokruokgi e Od Pinyruoth. Magi gin udi moger e yo mayot kod Joneno mochiwore. Ok inyal neno kit gik mopa mag lemo, msalaba, kata gik machal kamano ei Od Pinyruoth. Chudo mag ting’ ichulo koa kuom chiwo kaluwore gi hero mar ng’ato kang’ato. Kuom jogo mohero golo chiwo, nitie sanduku mar chiwo.—2 Jo Korintho 9:7.

4. E kanyakla ka kanyakla, nitie jodongo, kata jochung’. Gin ema gitelo korka puonjo ei kanyakla. (1 Timotheo 3:1-7; 5:17) Giyudo kony koa kuom jokony tich. (1 Timotheo 3:8-10, 12, 13) Jogi ok oting’ malo maloyo ji duto man ei kanyakla. (2 Jo Korintho 1:24) Ok omigi nying moyangi. (Mathayo 23:8-10) Ok girwakre mopogore gi jomoko. Bende ok chulgi kuom tich ma gitiyo. Kuom hero margi giwegi jodongo ng’iyo dwaro mag roho mar kanyakla. Ginyalo chiwo hoch kendo ng’ado rieko e kinde mag chandruok.—Jakobo 5:14-16; 1 Petro 5:2, 3.

5. Joneno mag Jehova bende bedo gi chokruok madongo e higa ka higa. E kindegi kanyakla mang’eny biro kaachiel mondo giyud puonj mochan moa e Muma. Batiso mar jopuonjre manyien timorega e chenro mar chokruok ka chokruok madongo.—Mathayo 3:13-17; 28:19, 20.

6. Ofis maduong’ mar Joneno mag Jehova mar piny mangima ni New York. Kanyo ema nitie Bura Motelo, kanyakla moting’o jodongo mariek mang’iyo kanyakla duto e piny mangima. Bende nitie ofis matindo moloyo 100 e piny mangima. Kwondegi jo mochiwore kendgi giwegi konyo e goyo kendo oro kitepe moting’o weche mag Muma. Chik bende ichiwo kani kaka onego land wach. Ang’o mamoni chano mondo ilim ofis machiegni kodi?