Sandug Penjo

◼ Be Joneno mag Jehova onego opogne jomoko twege momaki?

Twege mag Muma tegowa kendo jiwowa. (Tich 15:32) Omiyo, wanyalo gombo pogo twege ma wamako ne joma ne ok owinjogi. Nikech sani nitie gik mang’eny minyalo tigo e mako weche, inyalo mak twak kendo pogo twagno ne jomoko e yo mayot. Jomoko osekano twege mopogore opogore momaki, moriwo nyaka twege ma nogol higini mang’eny mosekalo, kendo gimiyo osiepegi twegego ka gin gi paro maber. Jomoko oseloso kuonde moko e Intanet (Web sites) kendo keto twege kanyo mondo ng’ato ang’ata oyudgi.

Ok rach ka wamako twege mondo watigo wawegi kata ne joodwa. E wi mano, jodongo nyalo chano mondo omak twege ne joma tuwore manie kanyakla maok nyal biro e chokruoge. Kata kamano, nitie gimomiyo ok onego wapogne jomoko twege momaki.

Nikech igologa twege kaluwore gi dwaro mantie, wanyalo winjo tiend weche e yo maok kare e twege momaki mwayudo nikech ok wanyal ng’eyo gimomiyo nogol twagno. E wi mano, ok bi bedo mayot mondo wang’e ng’ama nogolo twak kod kinde ma nogolie twagno mabiro miyo wabed gadier ni weche mwawinjo e twegego gin ma kindegi kendo gin kare. (Luka 1:1-4) Bende, pogo twege momaki nyalo keto jomoko e tem mar chiwo kata yudo luor maok owinjore.—1 Kor. 3:5-7.

Jatich mogen kendo mariek tiyo matek e chiwo chiemb chuny moromo kendo “e kinde mowinjore.” (Luka 12:42) Mae oriwo chenro mar golo twege e kanyakla mag Joneno mag Jehova kod gik mamoko momaki minyalo gol e adres marwa ma en jw.org Web site. Wanyalo bedo gadier ni jatich mogen kendo mariek kaachiel gi Bura mare Maduong’ biro chiwo gima dwarore mondo ogurwa matek e yie.—Tich 16:4, 5.