Kaka Wanyalo Tiyo gi Weche mag Bugewa Momak Miwinjo
1. En ang’o machielo molosnwa mopogore gi bugewa mindiko?
1 Ji mang’eny ohero somo bugewa e jw.org, nikech bugego nigi weche makare kendo madiera. (Ekl. 12:10) To be in iwuon isekawo thuolo mar winjo bugewa momak miwinjo? Buge momak miwinjogo, nyalo miyi thuolo mar winjo weche mathoth ma yudore e websaitwa. To buge molos kamano konyowa nade?
2. Ere kaka wanyalo tiyo gi bugewa momak miwinjo e lamowa mar joot kod e puonjruokwa wawegi?
2 E Lamowa mar Joot kod e Puonjruokwa Wawegi: Sama wan e wuoth moro, kata ka wan e dijewa ma pile, wanyalo winjo gige momak miwinjo kaka Muma, gasede, kata buk moro amora, kendo mano nyalo konyowa tiyo maber gi thuolo ma wan-go. (Efe. 5:15, 16) Wanyalo medo ndhadhu e lamo marwa mar joot kuom tiyo gi buge miwinjogi. Yo achiel mwanyalo timogo kamano en elo kama isomono kendo luwore gi jal ma somono. Tiyo gi buge momak miwinjo bende nyalo konyo ahinya e puonjruok mar ng’ato owuon, to moloyo kapo ni ng’ato diher ng’eyo somo maber, kata puonjore dhok machielo.
3. Gin jomage e alworawa ma nyalo yudo ber ka watiyo gi gigewa molos miwinjo?
3 E Tij Lendo: Seche mwalendo e alworawa, wanyalo romo gi joma wacho ni odich ma kata thuolo mar somo bugewa ok ginyal yudo, kata kamano ginyalo winjo bugewa molos miwinjo. Kata wanyalo romo gi joma wacho dhok mopogore gi marwa ma nyalo rwako wach Pinyruoth ka giwinje ‘e dhoggi giwegi.’ (Tich 2:6-8) Chiko it en gima duong’ ahinya e kit ogendni moko. Kuom ranyisi, joma hikgi oseniang’ e oganda moro miluongo ni Hmong goyoga ne joma tindo sigendni machon mag ogandagino, kendo gitemoga matek mondo kik gium weche madongo. Ogendni mathoth e pinje mag Afrika ohero puonjore weche kokalo kuom sigendni kata gik ma giwinjo.
4. Wanyalo penjore penjo mage sama walendo ne ji e alworawa?
4 Sama ilendo e alworau, donge inyalo tugo ne wuon ot achiel kuom gigewa molos miwinjo ma yudore e dhok mowinjo? Donge wanyalo kata oro ne ng’ato gimoro molos miwinjo e e-mail mare? Donge wanyalo golo gimoro miwinjo e websaitwa kendo kete e CD kae to wachiwe ne ng’at morwako wach, kaachiel gi buk misomono? Kapo ni wachiwo weche momaki moting’o ite duto mag buk moro, brosua, gaset, kata trakt to wanyalo kete e ripodwa mar dwe ka dwe. Olos bugewa miwinjo mondo okonywa e puonjruokwa wawegi kaachiel gi e pidho kodhi mag Pinyruoth.—1 Kor. 3:6.