Kony Joodi Mondo Obed gi Kinde Mabiro Maber

1. Dwaro mar Jehova ne en mane ne chenro mar joot?

KANE Jehova oriwo kend mar Adam gi Hawa, Adam nonyiso mor ma ne en-go kowero wer moting’o ngero mamit ma nokwong ndiko piny e dho-Hibrania. (Chakruok 2:​22, 23) Kata kamano, Jachwech ne nigi dwaro moko e pache, moloyo mana kelo mor ne nyithinde ma gin dhano. Ne odwaro ni joma okendore kaachiel gi joodgi otim dwache. Ne onyiso dichwo gi dhako mokwongo niya: “Nyuoluru, kendo medreuru, upong’ piny, kendo ubedi gi loch kuome; kendo mondo ubedi gi teko kuom rech ma ni e nam, kendo kuom winy mahuyo e kor polo, kendo kuom gik mangima duto mawuotho e piny.” (Chakruok 1:​28) Mano kaka ne omigi migawo makelo gweth maber miwuoro! Mano kaka Adam gi Hawa kaachiel gi nyithindgi dine obedo gi mor, ka dine bed ni giwinjo Jehova kendo timo dwaro mare chuth!

2, 3. Ere kaka joot nyalo yudo mor mogundho kindegi?

² E kindegi bende, joot bedo mamor moloyo ka gitiyo kanyachiel e timo dwaro mar Nyasaye. Jaote Paulo nondiko niya: “Tim mar luoro Nyasaye konyo e yore duto, nikech en gi gueth e ngimani kod ngima ma biro bende.” (1 Timotheo 4:8) Joot modak e ngima moluoro Nyasaye kendo maluwo puonj mag Jehova kaka oketgi ei Muma, biro yudo mor e “ngimani.” (Zaburi 1:​1-3; 119:105; 2 Timotheo 3:​16) Kata kapo ni ng’at achiel kende ema luwo puonj mag Muma, ngima joot bedo maber, moloyo ni onge ng’ato kata achiel matimo kamano.

³ Bugni osewuoyo kuom chike koda puonj mang’eny mag Muma manyalo konyo e kelo mor mar joot. Nyalo bedo ni isefwenyo ni moko kuomgi osewuoye nyadinwoya ei bugni duto. Nikech ang’o? En nikech gichiwo adiera motegno makonyo e yore duto mag ngima joot. Joot matemo tiyo gi puonj koda chike mag Muma yudo ni chiwruok ne Nyasaye kuom adier nigi “gueth e ngimani.” We wachak wang’i ane kendo ang’wen kuom puonjgo madwarore ahinya.

BER MABEDOE KUOM TERRUOK MOS

4. Ang’o momiyo terruok mos en gima dwarore ahinya e kend?

⁴ Ruoth Solomon nowacho kama: ‘Ng’a ma ok rit chunye chal gi dala maduong’ momukore ma onge ohinga.’ (Ngeche 25:28; 29:11) ‘Rito chuny,’ kendo terruok mos, en gima dwarore ahinya kuom jogo madwaro bedo gi mor e kend. Bedo ng’ama chunye loyo, ma pong’ gi mirima koda gombo maricho, biro kelo hinyruok maduong’ ma thiedho kawo higini mang’eny ​​—⁠kapo ni en gima inyalo thiedhi.

5. Ere kaka dhano monyuol e richo nyalo nyago kido mar terruok mos, to mano kelo ber mage?

⁵ En adier ni, onge koth Adam manyalo terore mos e okang’ makare chuth e ringruok mopong’ gi richo. (Jo Rumi 7:​21, 22) Kata kamano, ritruok kata terruok mos en nyak mar roho. (Jo Galatia 5:​22, 23) Kuom mano, roho mar Nyasaye biro nyago kidono kuomwa ka wakwayogo, ka watiyo gi puonj makare mayudore ei Ndiko, kendo ka wariwore gi jogo ma bende nyiso kidono, kendo ka wakwedo osiepe ma ok nyis kidono. (Zaburi 119:​100, 101, 130; Ngeche 13:20; 1 Petro 4:7) Timo kamano biro konyowa ringo “terruok,” kata e seche ma itemowa. (1 Jo Korintho 6:​18) Wabiro kwedo timbe mag gero kendo wabiro geng’o mi watamre bedo wasumbini mag kong’o. Bende wabiro bedo joma terore mos seche ma ng’ato kwinyowa kata ka wan e bwo chandruok matek. We mondo waduto​​—⁠kaachiel gi nyithindo​​—⁠wapuonjre nyago kidoni mar roho, madwarore ahinya.​​—⁠Zaburi 119:​1, 2.

NENO MIGAWO MAR WICH E YO MAKARE

6. (a) En chenro mane mar wich ma Nyasaye oseketo? (b) Dichwo nyaka par ang’o mondo omi migawo mare mar wich okel mor ne joode?

⁶ Puonj mar ariyo madwarore ahinya en yie gi chenro moket mar wich. Paulo nolero chenro makare mar gik moko ka nowacho ni: “Adwaro mondo ung’e ni wi dichwo ka dichwo en Kristo, kendo wi dhako en dichwo, kendo wi Kristo en Nyasaye.” (1 Jo Korintho 11:3) Tiend wachni en ni dichwo ema nigi migawo mar tayo joot, ka chiege riwe lwedo chuth, to nyithindo winjo jonyuolgi. (Jo Efeso 5:​22-​25, 28-​33; 6:​1-4) Kata kamano, ng’e ni migawo mar bedo wich kelo mor mana ka oti kode e yo mowinjore. Chwo modak koluoro Nyasaye ong’eyo ni migawo mar wich ok en tiyo gakor. Giluwo ranyisi mar Yesu, ma e Wich margi. Kata obedo ni Yesu ne onego obed wich kata “ruodh gik moko duto,” ne “ok obiro mondo otine, to mondo oti ni ji.” (Jo Efeso 1:​22; Mathayo 20:28) E yo machalo kamano, dichwo ma Jakristo tiyo gi migawone mar wich, ok ni oyud ber mare owuon, to mondo okel ber ne chiege koda nyithinde.​​—⁠1 Jo Korintho 13:​4, 5.

7. Gin puonj mage manie Ndiko mabiro konyo dhako chopo migawone momiye gi Nyasaye e ot?

⁷ Dhako modak koluoro Nyasaye ok piem gi chwore kata temo mondo oloye. Omor konyo chwore koriwe lwedo. Muma wacho maler ni “dichwo en wi dhako.” (Chakruok 20:​3; Jo Efeso 5:​23) Kokalo kuom kend, dhako bedo e bwo “chik chwore.” (Jo Rumi 7:2) Muma bende luongo dhako ni ‘jakony mowinjore’ ne chwore. (Chakruok 2:⁠20) Timbe gi kido ma dhako nyiso pong’o kuonde ma chwore oremie, kendo oriwe lwedo kuonde madwarore. (Ngeche 31:​10-​31) Muma bende luongo dhako ni “jawuodhi,” tiende ni otiyo gi chwore ka gi ka. (Malaki 2:⁠14) Puonj koda chike manie Ndikogi konyo dichwo gi chiege mondo ogen ahinya migawo ma ng’ato ka ng’ato kuomgi nigodo, kendo miyore luor mowinjore.

‘WINJURU MAPIYO’

8, 9. Ler ane moko kuom puonj manyalo konyo joot duto omed ng’eyo wuoyo e yo maber.

⁸ Bugni osejiwo nyadinwoya gimomiyo bedo joma wuoyo en gima ber. Nikech ang’o? En nikech weche jadhi maber ka ji wuoyo kendo chiko itgi malong’o. Ne omed jiwo ni wuoyo ok en gima itimo konchiel kende. Japuonjre ma nyinge Jakobo ne oketo wachno kama: “Ng’ato ka ng’ato mondo owinj mapiyo, oter mos kuom wuoyo.”​​—⁠Jakobo 1:​19.

⁹ Bende en gima dwarore ahinya bedo motang’ kod kaka wawuoyo. Rikni, mino wach, kendo tiyo gi weche ma chwowo chuny ng’ato, ok kony e bedo gi mbaka magero ng’ato. (Ngeche 15:1; 21:9; 29:​11, 20) Kata ka gima wawacho nikare, kapo ni wawache gi gero, gi sunga kata ma ok wadewo, ok wanyal loso gimoro amora to mak mana ketho. Weche mawuok e dhowa onego obed mabeyo, man “gi ndhadhu.” (Jo Kolosai 4:6) Wechewa onego obed ka “kit olembe mochwe gi dhahabu, ei adita mochwe gi fedha.” (Ngeche 25:11) Joot mosepuonjore wuoyo e yo maber osemedo mor margi e okang’ maduong’.

KAKA HERA EN GIMA DUONG’

10. En kit hera mane madwarore ahinya e kend?

¹⁰ “Hera” oti godo nyadinwoya ei bugni duto. Be inyalo paro kit hera sie miwuoyo kuome ka? En adier ni hera mabedoe e kind ng’at ma dichwo gi ma dhako (e dho-Grik, eʹros) en gima konyo ahinya e kend, to kend ma dhi maber bedo gi hera matut koda osiep (e dho-Grik, phi·liʹa), kendo herano dongo e kind dichwo gi chiege. To hera maloyo duto en miluongo e dho-Grik ni a·gaʹpe. Mano e hera ma wabedogo kuom Jehova, Yesu, koda ne dhano wadwa. (Mathayo 22:​37-39) Mani bende e hera ma Jehova nyiso dhano. (Johana 3:​16) Mano kaka en gima ber miwuoro ni wanyalo nyiso kit hera ma kamano ne joma wakendorego koda ne nyithindo!​​—⁠1 Johana 4:​19.

11. Ere kaka hera konyo kend odhi maber?

¹¹ Kuom adier, e ngima mar kend, hera mamaloni en “ratego ma tueyo.” (Jo Kolosai 3:​14) Herano tweyo kanyachiel joma okendore kendo miyo ng’ato ka ng’ato kuomgi timo gima ber ne nyawadgi kendo ne nyithindo. Sama joot nigi chandruok, hera konyogi kedo gi chandruogego kanyakla. Kaka joma okendore medo bedo moti, hera konyogi sirore ng’ato gi nyawadgi kendo miyo gigenore. “Hera . . . ok odwar mare kende . . . odhil e weche duto, oyie duto, ogeno duto, otimo kinda e weche duto. Hera ok rem.”​​—⁠1 Jo Korintho 13:​4-8.

12. Ang’o momiyo hero Nyasaye e kind joma okendore en gima jiwo kend margi?

¹² Kend bedo motegno ahinya seche ma otweye ok mana gi hera e kind joma okendore kende, to moloyo gi hera kuom Jehova. (Eklesiastes 4:​9-​12) Nikech ang’o? Ee, jaote Johana nondiko ni: “Hero Nyasaye en mako chikne.” (1 Johana 5:3) Kuom mano, joma okendore onego otieg nyithindgi mondo oluor Nyasaye ok mana nikech gihero nyithindgi ahinya, to nikech Jehova ema  chiko kamano. (Rapar mar Chik 6:​6, 7) Onego gikwed chode ok mana nikech giherore ng’ato gi ng’ato, to moloyo obed nikech gihero Jehova, Jal ma “nong’ad bura ni ndhegini kod jo terruok.” (Jo Hibrania 13:4) Kata ka achiel kuom joma okendore miyo ywaruok maduong’ bedoe e kend, hero Jehova biro miyo jal machielono odhi nyime luwo puonj koda chike manie Muma. Kuom adier, mano kaka en mor ne joot ma hera ma gin-go kuomgi ng’ato gi ng’ato itego gi hera kuom Jehova!

JOOT MATIMO DWARO MAR NYASAYE

13. Ere kaka chung’ motegno e tiyo ne Nyasaye biro konyo ng’ato keto pache kuom gik makare madwarore ahinya?

¹³ Ngima duto mar Jakristo omakre chuth gi timo dwaro mar Nyasaye. (Zaburi 143:10) Mani e tiend chiwruok ne Nyasaye gadier. Timo dwaro mar Nyasaye konyo joot keto pachgi kuom gik makare madwarore ahinya. (Jo Filipi 1:​9, 10) Kuom ranyisi, Yesu nochiwo siem ni: “Ne abiro mondo apog ng’ato kod wuon mare, kendo nyako kod min mare, kendo chi wuowi kod wuon odgi, kendo wasik ng’ato nobed mana joode owuon.” (Mathayo 10:​35, 36) To adier mana kaka Yesu nosiemo, thoth jolupge osesandi gi joodgi. Yaye mano gima lit manade! Kata kamano, tudruok mar joot ok onego olo hera ma wan-go kuom Jehova Nyasaye koda Yesu Kristo. (Mathayo 10:​37-​39) Ka ng’ato nano motegno kata odoko ni joodgi kwede, joma kwedego nyalo lokore ka gineno gik mabeyo ma chiwruok ne Nyasaye kelo. (1 Jo Korintho 7:​12-​16; 1 Petro 3:​1, 2) Kata kapo in ok gilokre, weyo tiyo ne Nyasaye nikech akwedego ok kel kony masiko.

14. Gombo mar timo dwaro mar Nyasaye biro konyo nade jonyuol timo gik makonyo nyithindgi ahinya?

¹⁴ Timo dwaro mar Nyasaye konyo jonyuol e ng’ado paro makare. Kuom ranyisi, e ogendini moko jonyuol ohero kawo nyithindo kaka mwandu, ka gigeno ni nyithindgi noritgi ka giseti. Kata obedo ni en gima kare mondo nyithindo mosebedo madongo orit jonyuolgi moseti, mano ok onego omi jonyuol ojiw nyithindgi oluw kit ngima mar manyo mwandu. Jonyuol ok tim ne nyithindgi gima ber ka gijiwogi mondo gigen ahinya mwandu mag ringruok moloyo wach Nyasaye.​​—⁠1 Timotheo 6:9.

15. Ere kaka Yunike ma min Timotheo noketo ranyisi maber ahinya mar janyuol ma ne timo dwaro mar Nyasaye?

¹⁵ Ranyisi maber kuom wachni en mar Yunike, min rawera ma Timotheo ma ne osiep Paulo. (2 Timotheo 1:5) Kata obedo ni ne ok okende gi jal ma nigi yie, Yunike kaachiel gi Lois dan Timotheo, nopidho Timotheo mobedo jal maluwo chiwruok ne Nyasaye. (2 Timotheo 3:​14, 15) Kane Timotheo obedo maduong’ moromo, Yunike nogonye mowuok pacho mondo ochak tij lando wach Pinyruoth kaka misonari kanyachiel gi Paulo. (Tich Joote 16:​1-5) Mano kaka nyaka bed ni ne oil kane wuode obedo misonari molony! Chiwruokne ne Nyasaye kosebedo maduong’ nonyiso maler kaka ne otiege maber ka podi otin. Kuom adier, Yunike nobedo mamor kendo moil kuom yudo ripode mawuoyo kuom kaka Timotheo ne omakore chuth gi tij lendo, kata obedo ni ne onyalo gombo bedo kod wuode pacho.​​—⁠Jo Filipi 2:​19, 20.

JOOT KOD NGIMANI MAR KINDE MABIRO

16. Kaka nyathi mawuowi, Yesu nonyiso nade hera kuom joodgi, to kata kamano, dwarone maduong’ ne en mar timo ang’o?

¹⁶ Yesu ne odongo e ot ma ne ji oluoroe Nyasaye, kendo ka nosebedo maduong’, ne onyiso ni ne ohero min mare. (Luka 2:​51, 52; Johana 19:26) Kata kamano, dwaro maduong’ mar Yesu ne en timo dwach Nyasaye, to timo mano noriwo kata yawo yo mar miyo dhano ngima mochwere. Notimo mae kane ochiwo ngimane mar dhano makare chuth mondo obed rawar ne dhano ma joricho.​​—⁠Mariko 10:45; Johana 5:​28, 29.

17. Gin gweth mage mabeyo ma Yesu noyawo ne jogo matimo dwaro mar Nyasaye kane ochung’ motegno?

¹⁷ Bang’ tho Yesu, Jehova nochiere e ngima mar polo, momiye teko maduong’, ma gikone okete Ruoth e Pinyruodh polo. (Mathayo 28:18; Jo Rumi 14:9; Fweny 11:15) Misango ma Yesu ne ochiwo noyawo thuolo ne dhano moko mondo obi olochi kode e Pinyruodhno. Misangono bende ne oyawo yo ne dhano modong’ ma chunygi tir mondo gibi giyud ngima makare chuth e piny moseduoki mobedo paradis. (Fweny 5:​9, 10; 14:​1, 4; 21:​3-5; 22:​1-4) Achiel kuom tije mabeyo makende ma wan-go gie sani, en lando wach maberni ne dhano wetewa.​​—⁠Mathayo 24:14.

18. En ang’o miparonwa, to en jip mane michiwo ne joot koda ng’ato achiel achiel?

¹⁸ Mana kaka Paulo ne onyiso, dak e ngima mar chiwruok ne Nyasaye konyo ji nikech ginyalo yudo gwethgo e ngima “mabiro.” Kuom adier, mani e yo maber moloyo mar yudo mor! Par kendo ing’e ni, “piny kadho, gi gombone: to ng’a ma timo gi ma Nyasaye dwaro osiko nyaka chieng’.” (1 Johana 2:​17) Kuom mano, kata bed ni in nyathi kata janyuol, dichwo kata dhako, kata joma osedonjo kata pok odonjo e kend ma nigi nyithindo kata ma ongego, temuru timo dwaro mar Nyasaye. Kata ka in e bwo tem kata chandruok moko matek ahinya, kik wiyi wil ngang’ ni in jatich Nyasaye mangima. Omiyo, we mondo timbeni okel mor ne Jehova. (Ngeche 27:11) Kendo we mondo gik mitimo okelni mor gie sani kaachiel gi ngima mochwere e piny manyien mabiro!