“Rieko Nyisore ni En Kare Kuom Tichne”

1. Jomoko neno nade tijwa mar lendo?

¹ Kinde moko wanyalo yudo dwoko maok ber seche ma walendo kowuok kuom weg udi ma nigi paro maok kare kuomwa, kata ma osenyis gik maok adier e wi Joneno mag Jehova. Seche moko gin gi paro maok kare nikech gik maok adier miwacho kuomwa kokalo kuom gik lando weche. Nitie kuonde moseluongwa ni “din marach.” Ang’o monego watim kapo ni waromo gi jaro machalo kamano?

2. Ang’o mabiro konyowa mondo kik chunywa nyosre seche ma ijarowa?

² Siki gi Paro Mowinjore: Ji ne nigi paro maok kare kuom Yesu kaachiel gi jotich Jehova ma ne odak e kinde Jokristo mokwongo. (Tich 28:22) Kata kamano, ne ok gichiwo thuolo ne wichkuot e tij lendo nikech weche mag miriambo ma ne iwacho kuomgi. Yesu nowacho ni: “Rieko nyisore ni en kare kuom tichne.” (Math. 11:18, 19) Ne odhi nyime kotimo dwaro mar Wuon-gi gi kinda, ka en gadier ni jogo ma ne dwaro yudo adiera ne dhi kawo mapek wach maber. Wanyalo siko ka chunywa ok onyosore ka waparo ni Wuod Nyasaye bende nokadhoe gik ma kamago.

3. Ang’o momiyo akwede kod weche maricho miwacho kuomwa ok onego okawwa gi wuoro?

³ Yesu nowacho ni piny ne dhi sin gi jolupne mana kaka ne gisin kode. (Joh. 15:18-20) Omiyo, akwede kod weche maricho miwacho kuomwa e kindegi ok onego okawwa gi wuoro. Onego wang’e ni gik ma kamago ne dhi nya e kinde ma giko medo sudoe machiegni kendo mirimb Satan bende medore. (Fwe. 12:12) Wanyalo bedo mamor ni gik ma timore nyiso ni ochiegni keth piny Satan.

4. Kapo ni waromo gi joma ok dwar winjo wach maber mwalando, ang’o monego watim?

⁴ Dwok gi Muolo: Ka wayudo dwoko maok ber seche mwalendo, onego kinde duto wachiw dwoko e yo mang’won kendo gi muolo. (Nge. 15:1; Kol. 4:5, 6) Ka nyalore, waler ne wuon ot moikore gadier ng’eyo ni nitie miriambo mosewach kuom Joneno mag Jehova kata penje gimomiyo en gi paro maok owinjore kuomwa. Dwokowa mamuol nyalo miyo odwar ng’eyo adiera kuom weche mosewinjo e wi Joneno mag Jehova kendo mano nyalo miyo orwak wach kapo ni Janeno machielo olime e kinde mabiro. Kata kamano, kapo ni wuon ot ok dwar winjowa kata matin, nyalo bedo maber ka wawuok. Wan gadier ni kata obedo ni jomoko nigi paro maok owinjore kuomwa, Jehova to mor gi tijwa mar lendo.—Isa. 52:7.