“Beduru gi Kuwe kod Ji Duto”
1. Puonj mage mag Muma ma nyalo konyowa sama weg udi moko ogolo kodwa gero?
1 Kaka jotich Jehova, wahero kuwe, kendo wach ma walando bende en mar kuwe. (Isa. 52:7) Kata kamano, nitie kinde ma weg udi moko golo kodwa gero ka walimogi. Ang’o ma biro konyowa rito kuwe sama mano otimore?—Rumi 12:18.
2. Ang’o momiyo dwarore ahinya ni wabed gi paro mowinjore?
2 Bed gi Paro Mowinjore: Kata obedo ni nitie joma bedo mager kodwa nikech ok gidwar winjo adiera ma walando, jomoko to nyalo timo kamano nikech weche mamoko. Samoro nyalo bedo ni walimogi e seche ma gineno ni ok owinjore. Nyalo bedo ni wuon ot kadho e pek moko. Kata dabed mana ni wach maber ma walando ema ochwanye, onego waket e paro ni samoro otimo kamano nikech osewuonde. (2 Kor. 4:4) Ka wan gi paro mowinjore, wabiro kuwe mos kendo ok wabi ng’ado ni wan ema ok odwarwa.—Nge. 19:11.
3. Ere kaka wanyalo miyo weg udi luor?
3 Mi Ji Luor: Ji mathoth e alworawa nigi puonj moko ma gimakorego ahinya. (2 Kor. 10:4) Gin gi ratiro mar yiero kabe gibiro winjowa kata tamore. Kik wajar yie margi kata matin kendo kik watimre e yo manyalo nyiso ni wan ema wang’eyo Muma e okang’ matut moloyogi. Ka wuon ot oriembowa, onego wawere aweya kode gi muolo.
4. Wuoyo mamuol oriwo timo ang’o?
4 Wuo Mamuol: Yo ma wadwokogo wuon ot onego obed mamuol kendo mang’won kata sama owuoyonwa marach. (Kol. 4:6; 1 Pet. 2:23) Kar ywaruok kode, tem loko mbaka mondo uwuo kuom gima unyalo winjorue. Wanyalo kata mana penje e yo mamuol gimomiyo oger kodwa. Kata kamano, nitie kinde ma nyalo bedo maber ka wang’ado mbaka mondo kik wamed wang’o i wuon ot.—Nge. 9:7; 17:14.
5. Bedo gi kuwe sama walendo nyalo kelo ber mage?
5 Ka wabedo gi kuwe, samoro wuon ot biro paro muolowa, to mano nyalo miyo owinj wach ma walando chieng’ machielo ka jalendo moro olime. (Rumi 12:20, 21) Kata ka otamore chuth gie sechego, chieng’ moro dipo ka orwako adiera mobedo owadwa kata nyaminwa. (Gal. 1:13, 14) Bed ni obiro rwako adiera kata ooyo, pod wamiyo Jehova duong’ kendo miyo ji one ber mar adiera, ka wadhi nyime ritore kendo bedo gi kuwe kod ji duto.—2 Kor. 6:3.