Beduru gi Chir, to Uher Kuwe
1 Thoth jogo ma walendoni nigi yie motegno kuom puonj mopogore gi adiera manie Muma. Kata obedo ni nyaka waland wach gi chir, bende wadwaro ni ‘wabed gi kuwe kod ji duto’ ma ok wachwanygi. (Rumi 12:18; Tich 4:29) Ere kaka wanyalo bedo gi chir, to pod waher kuwe e seche ma walando wach Pinyruoth?
2 Wuouru Kuom Weche Munyalo Winjoree: Ng’at mohero kuwe en ng’at matemo mondo kik odonj e mino wach. Kwedo akweda puonj ma wuon ot osebedo ka omako matek ok bi miyo obed gi chuny mar dwaro winjo wach ma wakelone. Ka owacho gimoro ma ok en adier, wanyalo chako wach moro machielo manyalo miyo wawinjre kode. Wuoyo kuom weche ma waduto wayiego nyalo miyo wageng’ paro moro amora mar sigu ma wuon ot nyalo bedo godo, kendo wanyalo mulo chunye.
3 Be weyo ma ok wakwedo paro ma ok adier ma wuon ot ochiwo, nyiso ni wayie kode kata ni koro waketho adiera? Ooyo. Migawo momiwa kaka jotich ma Jokristo ok en kwedo moro ka moro kuom puonj duto ma ok kare ma waromogo, to en migawo mar lando wach maber mar Pinyruodh Nyasaye. (Math. 24:14) Kar winjo marach kuom paro ma ok adier ma wuon ot ochiwo, wanyalo neno wachneno kaka thuolo mar fwenyo gima ni e pache.—Nge. 16:23.
4 Mi Wuon Ot Luor: Nitie kinde ma nyaka wabed gi chir seche ma wakwedo puonj mag miriambo. Kata kamano, kaka joma ohero kuwe, ok wabi bedo jojaro ka watiyo gi weche mag achaye ka wawuoyo kuom jogo ma puonjo kata oyie gi puonj ma ok adier. Bedo gi chuny mar ng’awruok en gima riembo ji, to wuoyo e yo mang’won kendo gi bolruok miyo jogo mohero adiera rwako wach. Miyo jowinjowa luor kaachiel gi weche ma giwacho rito luor kata nying’ ma gin-go, kendo mano miyo bedo negi mayot winjo kendo yie gi wach ma walando negi.
5 Jaote Paulo ne keto e paro puonj ma jogo ma ne olendoni nomako, kendo ne omanyo yo ma ne onyalo lando negi godo wach maber mi omul chunygi. (Tich 17:22-31) Ne ochiwore mar bedo “ngeche duto ni ji duto,” mondo omi ores “jo moko kod yore duto.” (1 Kor. 9:22) Wan bende wanyalo timo kamano ka wabedo jo mohero kuwe seche ma walando wach maber gi chir.
[Weche manie ite mar 3]
Chenro Manyien Makonyowa Mondo Wawere gi Remo
Bura Maduong’ mar Joneno mag Jehova oseyie mondo oriw weche manie fom mar DPA, gi weche manie kad mar Mwelekezo wa Mapema Kuhusu Tiba/Ondoleo la Hatia [Advance Medical Directive/Release] obed kad achiel mating’o dwach ng’ato kuom yore mag thieth, to kadno wabiro luongo ni DPA [durable power of attorney].
Onego ipong’ kad mar DPA mar piny ma idakie. Kad mar DPA tiyo kamoro amora e piny ma idakie, tarige bende ok rum, to bende kadno biro nyiso dwaro mari kuom yore mag thieth kata kapo ni idhi e pinje ma oko. Onego ipong’ kad manyien mar DPA ka (1) idwaro loko gimoro e kadni mar DPA, kaka loko dwaro ma in-go, jogo miketo mondo owuo e loyi, loko nonro, namba mag simo, kata (2) ka kadni mar DPA olal kata okethore.
Pong’o kad mar DPA en wach monego oket e lamo kendo ng’ato onego opong’e mos ka en pacho. Kata kamano, kapok iketo sei, dwarore mondo iluw machiegni ahinya weche modok korka chike. Kuom ranyisi, ka kadni wacho ni ji ariyo onego one ka iketo sei, onego gibedie sama iketo sei. Jorit puonjruok mar buk nyalo kawo thuolo kinde ka kinde mar konyo jogo ma podi ok opong’o kad maggi ka mano dwarore.
Kapok ibano kadno, tim fotokopi maber ne ji ariyo miyiero mondo owuo e loyi, machielo itim ne laktar to moro bende obed ma ikano. Bende inyalo dwaro miyo joodu fotokopi moko koda jagoro mar kanyakla. Fotokopigo onego ogo konchiel kende e kalatas mar A-4, ka kad mar DPA ni e diere tir. Kad mari mar DPA wuon ema onego iwuothgo, to ok fotokopi.
Kitambulisho [Identity Card] mar nyithindo ma oketie tarik 3/99 pok oloki, kadno en mar nyithindo ma podi ok obatisi ma jonyuolgi gin Joneno. Jonyuol onego one ni kad mar nyathi ka nyathi opong’ maber moketie sei, kendo ni nyithindo ting’e kaka dwarore.
Jolendo ma podi ok obatisi nyalo tiyo kod weche manie DPA kod manie Kitambulisho ka gindikogo dwachgi koda mag nyithindgi e weche mag thieth. Jagoro onego ochiw kad mar DPA ne jolendo duto ma eka nyocha obatisi machiegni.
RIT