Kaka Wanyalo Medo Lony e Tij Lendo—Dwoko Wuon Ot Mager

Gimomiyo Mano Dwarore: Ng’eny joma waromogo e tij lendo gin joma muol. Kata kamano, Yesu nokoro ni nitie jomoko ma ne dhi sin kodwa. (Joh. 17:14) Omiyo, ok onego okawwa gi wuoro sama wuon ot obedo mager kodwa. Sama waromo gi ng’at ma kamano, wabiro nyise kido ma moro Jehova ma e wuon tich mwatiyono. (Rumi 12:17-21; 1 Pet. 3:15) Timo kamano nyalo konyo mondo kik weche omed kethore. Mano bende nyalo konyo e chiwo neno maber ne wuon odno kod jomamoko manyalo bedo kanyo, ma giyie winjo wach maber chieng’ machielo ka Joneno mag Jehova olimogi.—2 Kor. 6:3.

Kaka Wanyalo Timo Mano:

Tem bedo gi chuny mokuwe kendo nyis ni imor gi wuon odno. Mano nyalo konyi kueyo mirimbe. Kik ikaw ni in ema wuon ot nigi wach kodi. (Ekl. 7:9) Samoro iye owang’ nikech chandruoge moko ma en-go, kata nyalo bedo ni ilime e sa ma ok owinjore. Kata kapo ni ok odwar winjo wach mwalando, kinde mang’eny mano timore nikech osewinjo miriambo moko miwacho e wiwa.—2 Kor. 4:4.
Dwok wuon ot e yo mamuol kendo gi weche mang’won. (Nge. 15:1) Dibed ni nichiewe e nindo kata nichoche kotimo gimoro? Kata obedo ni ok wagoga mos ni watimo marach kuom tero ne ji wach maber, podi wanyalo goyone mos kuom lime e seche ma ok owinjore kode. Dibed ni iye owang’ kodwa nikech osewinjo miriambo moro ma landore e wiwa? Kapo ni en kamano, inyalo wachone niya: “Koro ang’eyo gimomiyo iyi owang’ kama. Kata kamano, nyalo bedo ni weche misewinjo e wiwago ok gin adier. Be diher mondo anyisi gimomiyo awacho kamano?” Dibed ni ok oyie gi moko kuom puonj ma wayiego kaka golo joricho e kanyakla, kata chiwo luor ne remo? Inyalo nyise kama: “Aneno gimomiyo iyi owang’. Nitie jomamoko bende ma nigi paro kaka mari. Be diher mondo anyisi gima Muma puonjo e wi e wi wechego?”
Kapo ni iye owang’ ahinya, ber ka wawere kode ma ok wadwoke. Kapo ni onyisowa ni ok odwar ni Joneno mag Jehova ochak olime, wanyalo nyise ni wabiro temo matek mondo watim kaka odwaro.

Tem Timo Mae e Dweni:

E lamo maru mar joot, tiegreuru kutiyo gi wechegi.
Bang’ kuseweru gi ng’at ma iye owang’no, wuo gi jal mulendogo kuom kaka dudwoko ng’atno e yo maberie moloyo.