Inyalo Puonjori Nade Adiera mar Nyasaye?

1, 2. Ranyisi mane manyiso ni yoo onego bedie mar ng’eyo weche mag din?

WANYALO ng’eyo Nyasaye nade? Bende wanyalo nono puonj duto mag dinde mang’eny? Ok nyalre. To kata ka wanyalo timo kamano, wanyalo ng’eyo nade puonj ma kare?

² Nikech nitie puonj mang’eny mopogore-opogore kuom Nyasaye, dwarore ni wayud yoo mar ng’eyo gi ma en adier ma ji nyalo yiego. Kuom ranyisi: Wawach ni ji ywayore e chiro kwom bor mar nanga. Ja uso wacho ni nangano en mita adek, to janyiepo paro ni nangano ok rom mita adek. Inyalo tiek wachno nade? Inyalo pim nangano gi tol mar pimo.

3. Muma nondiki nang’o?

³ Bende nitie tol mar pimo, kata yoo, manyalo konyowa ng’eyo weche mag din? Ee, en Muma. Nyasaye ne omiyo Muma ondiki mondo ji kuonde duto opuonjre adiera kuome. Muma madirom gana gi gana oselos. Bende oseloke e dhok mohingo 2,100, e kitepe matindo kata Muma mangima. Chiegni ng’ato ka ng’ato nyalo somo adiera mar Nyasaye e dhok monyuolego.

4. Muma oting’o weche mage?

⁴ Muma en mich maber ahinya ma Nyasaye omiyowa. Onyiso gik ma dine ok wanyal ng’eyo. Owuoyo kuom chwech mag roho. Bende onyisowa pach Nyasaye, kite, kod dwache. Bende ­onyisowa kaka Nyasaye osebedo ka tiyo giji e higni mang’eny mokalo. Owacho gik mabiro timore e ndalo mabiro. Onyiso bende kaka wanyalo yudo yoo madhi e ngima mochwere.

Gima Omiyo Inyalo Yie kod Muma

5. Ranyisi mane manyiso ni Muma winjore gi sayans?

⁵ Nitie gik mang’eny manyisowa ni Muma en Wach Nyasaye adier. Achiel kuom gigo en ni Muma winjore kod sayans. Chon ahinya ji mathoth e piny ngima nene paro ni piny otenore e gimoro. Kuom ranyisi, e Afrika ma Imbo chon ji nene paro ni piny otenore e thuol moro maduong’ moluorore nyadi 3,500 ewi piny kod nyadi 3,500 e bwo piny. Higni madirom 3,500 mokalo, jandik Muma moro nondiko kowinjore kod sayans ni Nyasaye “ong’awo piny, to onge gi mong’awoe.”​—Ayub 26:7.

6. Ranyisi mane maduong’ manyiso ni Muma en mar Nyasaye?

⁶ Ranyisi maduong’ manyiso ni Muma en wach Nyasaye, en yoo makare monyiso go gik mabiro timore e ndalo mabiro. Nyasaye ok chal gi dhano makoro wach. En ong’eyo gik mabiro timore e ndalo mabiro; gimoro-amora mowacho nyaka timre.

7. Weche moko manene Muma okoro chon motimore gin mage?

⁷ Weche mang’eny manene Muma okoro chon, nene otimore. Kuom ranyisi, Muma nokoro higni 700 motelo ka owacho ni Yesu ne onego nyuol Bethlehem, to mano e kaka nene otimore. (Mika 5:2; Mathayo 2:3-9) Ka wamedo rango weche moko manene Muma okoro kuom Yesu, Muma bende nokoro ni ne onego nyuole gi nyako moro ma pok nonindo gi dichwo, kendo ni nene onego ndhoge gi fedha 30. Magi duto nene otimore kaka nokorgi. Adieri onge dhano moro amora manyalo koro wechego kamano!​—Isaiah 7:14; Zekaria 11:12, 13; Mathayo 1:22, 23; 27:3-5.

8. Weche moko ma Muma nokoro matimore e ndalowa gin mage, to ginyiso ang’o?

⁸ Ng’eny gik mane Muma okoro timore e ndalowa. Moko kuomgi gin magi:

• “Oganda noked gi oganda, kendo pinyruoth gi pinyruoth. Piny noyiengni kuonde moko; kech gi tuoche nobedie.”​—Luka 21:​10, 11.

• “Richo nomedre.”​—Mathayo 24:12.

• ‘E ndalo mag giko, ji nobed jo moherore giwegi, kendo jo mohero mwandu, jo ma ok winj jonywolgi, jo moowore, jo mager, jo ma ok ohero gik mabeyo, josunga, kendo jo mohero mor mar piny moloyo hero Nyasaye.’​—2 Timotheo 3:​1-5.

Donge gigi duto timore ndalogi? Adiera kod ratiro mag weche manene okor nyiso ni Muma ok en kitabu kaka moko. En wach mowuok kuom much Nyasaye!​—2 Timotheo 3:16.

Bende Oselok Weche Moko mag Muma?

9, 10. Ang’o manyiso ni Nyasaye ok oyie mondo ji olok weche mag Muma?

⁹ Wakaw ni in kod masin mar loso gik moko to iketo chike ma jotich onego oluw. Ka jasigu oloko chike mindikogo inyalo timo ang’o? Donge inyalo rieyo chike mane oloki? Kamano bende e kaka Nyasaye ok oyie mo­ndo ji olok adiera mar Wachne, Muma.

¹⁰ Jogo mosetemo loko puonj mag Wach Nyasaye ok ose nyalo. Ka wapimo Muma ma wan go ndalogi gi ndiko machon ahinya mag Muma, wayudo ni gichal. Mano nyiso ni weche mag Muma ok ne olok e higni mosekalo.