DWOKO PENJO MAG MUMA
Ang’o momiyo weche ma ne okor chon yudore e Muma?
Ang’o momiyo Muma lero gik ma timore e ndalowagi?—Luka 21:10, 11.
Weche mang’eny ma ne okor chon kendo milero adimba yudore e Muma. Onge dhano moro amora ma nigi nyalo mar koro kendo lero adimba gima biro timore e kinde ma biro. Omiyo, wechego ma ne okor chon e Muma mochopo kare miyo wabedo gadier ni Muma en Wach Nyasaye.—Som Joshua 23:14; 2 Petro 1:20, 21.
Weche mokor ma ne osechopo miyo wabed gi yie motegno kuom Nyasaye. (Jo-Hibrania 11:1) Bende, gimiyo wabedo gadier ni singo mag Nyasaye e wi kinde ma biro, biro chopo adier. Omiyo, Muma miyowa geno madier.—Som Zaburi 37:29; Jo-Rumi 15:4.
Ere kaka weche mokor manie Muma nyalo konywa?
Weche moko ma ne okor chiwo siem ne jotich Nyasaye mondo gikaw okang’ ma dwarore. Kuom ranyisi, Jokristo mokwongo noneno kaka weche moko ma ne okor e wi Jerusalem nochopo kare, omiyo ne gikawo okang’ mar a Jerusalem. Bang’e, ka ne iketho Jerusalem nikech thoth ji nodagi Yesu, Jokristo to ne ni kama bor gi kar masira ma noyudo joma ne odong’.—Som Luka 21:20-22.
E kindegi bende, weche ma ne okoro to osechopo nyiso ni Pinyruodh Nyasaye chiegni tieko loje kod sirkande duto mag dhano. (Daniel 2:44; Luka 21:31) Omiyo, dwarore ni ng’ato ka ng’ato okaw okang’ mapiyo gie sani mondo obed mowinjore e nyim Ruoth, Yesu Kristo, ma ema Nyasaye oseketo kaka Ruoth.—Som Luka 21:34-36.