Wach ma Nyaka Waland

“LUOR JEHOVA KENDO RIT CHIKNE”

CHON ka kinde Jokristo ne podi, Jehova nonyiso Ibrahim kaka “dhoudi duto mag piny” ne dhi yudo gweth. (Chak. 22:18) Bende nomiyo Suleman ondiko gima duong’ madwarore kuom dhano duto: “Luor Jehova kendo rit chikne; ni mar ma e motieko tich mowinjore ni dhano.” (Ekl. 12:13) To ere kaka ji modak e piny duto ne nyalo puonjore wechegi?

Kata obedo ni kinde duto nitie ji mosenyiso ni giyie kuom Wach Nyasaye, Muma nyiso ni tij lendo mitimo e okang’ maduong’ e piny mangima ma ne dhi chopo wach maber ne ogendini duto, ne dhi timore “chieng’ Ruoth.” Mano nochakore higa 1914. (Fwe. 1:10) Kuom wachni, bug Fweny 14:6, 7 nokoro ni malaika ne dhi tayo mondo wach madwaroreni olandi ne “pinje duto, kod dhoudi duto, gi dhok duto, gi ogendini duto.” Ne idhi jiwgi ni: “Luoruru Nyasaye, kendo miyeuru duong’, nikech sa mong’adoe bura osechopo; kendo lamuru jachuech polo gi piny gi nam gi sokini.” En dwaro mar Nyasaye ni oland wachni. Wan gi thuolo makende mar riwo tijni lwedo.

‘Nyasaye Maradier.’ Kane Jehova owacho ni, ‘Unubed jonenona,’ ne en kinde ma ne idwaro ng’e ni ng’ano mowinjore obed Nyasaye adier. (Isa. 43:10) Wach monego oland ok en mana ni ji onego obed e din moro kata ni giket yie kuom nyasaye moro. Kar mano, dwarore ni omigi thuolo mar ng’eyo ni Jachwech polo gi piny e Nyasaye madier. (Isa. 45:5, 18, 21, 22; Joh. 17:3) Nyasaye madier kende ema nyalo koro gadier weche mag kinde mabiro. Wan gi thuolo makende mar nyiso ji ni kaluwore gi weche ma Jehova nosechopo e kinde mokalo, wanyalo bedo gadier ni gimoro amora mosingo kuom kinde mabiro nochopi.—Josh. 23:14; Isa. 55:10, 11.

En adier ni jo mang’eny ma walendonegi lamo nyiseche mamoko kata wacho ni ok gilam nyasaye moro amora. Mondo wami giwinjwa, wanyalo chako wuoyo kodgi e wi gimoro moriwowa waduto. Ranyisi manie Tich Joote 17:22-31 nyalo konyowa. Ne ni kata obedo ni jaote Paulo ne en ng’at mawuoyo gi rieko, nonyiso maler ting’ ma ji duto nigo e nyim Nyasaye ma en Jachwech polo gi piny.

Konyo Ji Ng’eyo Nying Nyasaye. Kik iwe maok iluongo Nyasaye madier gi nyinge. Jehova ohero nyinge. (Wuok 3:15; Isa. 42:8) Odwaro ni ji ong’e nyingno. Nomiyo oket nying makendeno ei Muma mokalo nyadi 7,000. En ting’ marwa puonjo ji nyingno.—Rapar 4:35.

Mondo ji oyud ngima e kinde mabiro, nyaka ging’e Jehova kendo ginyis ni giyie kuome. (Joel 2:32; Mal. 3:16; 2 Thes. 1:8) Kata kamano, ji mang’eny ok ong’eyo Jehova. Mano oriwo ji mang’eny mawacho ni gilamo Nyasaye ma nochiwo Muma. Kata ka gin gi Muma kendo gisome, pod nyalo bedo ni gikiya nying Nyasaye wuon nikech loko mang’eny me kindegi osegolo nyingno e Muma. Gima nyalo bedo ni gisewinjo kuom nying Jehova en ni jotend din kwerogi ni kik giti gi nyingno.

Wanyalo konyo ji nade mondo ong’e nying Nyasaye? Onge gima nyalo tiyo maber moloyo nyisogi nyingno e Muma—kanyalore, e Muma margi giwegi. E loko moko, nyingno yudore nyadi alufe. E loko mamoko, to onyalo mana yudore e Zaburi 83:18 kata Wuok 6:3-6, kata onyalo mana yudore e weche moler piny e bug Wuok 3:14, 15 kata 6:3. E loko mang’eny, weche motigo kar nyingno kaka, “Ruoth” kod “Nyasaye,” ondik e yo makende manyiso kama nying Nyasaye ne yudore e dhok ma ne okwong ndikgo Muma. Kapo ni wuon ot nigi Muma ma joloko masani osegolo chuth nying Nyasaye, inyalo tiyo gi loko machon mar Muma mondo inyisego lokruok mosebedoe. E pinje moko, inyalo nyiso nying Nyasaye e wende moko mag din kata kuonde mondikie nyingno e kor udi.

Kata ne joma lamo nyiseche mamoko, Yeremia 10:10-13 e Muma mar New World Translation nyalo tiyo maber. Ndikono ok nyis mana nying Nyasaye kende to bende onyiso maler ni Nyasaye en ng’a.

Kik ipand nying Jehova gi weche kaka “Nyasaye” kata “Ruoth,” kaka jodin maluongore ni Jokristo timo. Mano ok onyiso ni e mbaka ka mbaka nyaka ichak mana gi luongo nyingno. Jomoko nyalo tamore winji nikech gin gi paro maok kare. Kata kamano, ka iseketo mise mar mbaka, kik iluor tiyo gi nyingno.

Ber ng’eyo ni Muma tiyo gi nying Nyasaye ding’eny moloyo kaka otiyo gi nyingene mag telo kaka “Ruoth” koda “Nyasaye” duto koriw karachiel. Kata ka en kamano, jondik Muma ne ok oketo nyingno e sentens duto. Ne gitiyo kode e yo mathuolo, mabiro abira kende, kendo manyiso luor. Mano en ranyisi maber mwanyalo luwo.

Ng’ama Iluongo gi Nyingno. Kata obedo ni ng’eyo ni Nyasaye nigi nyinge owuon en wach maduong’, mano en mana chakruok mar ng’eye.

Mondo ji oher Jehova kendo oyie kuome, nyaka ging’e ni en Nyasaye machalo nade. Kane Jehova ofulo nyinge ne Musa e Got Sinai, ne ok onwoyo anwoya wacho ni “Jehova.” Nonyise kido moko mabeyo miwuoro ma en-go. (Wuok 34:6, 7) Mano en ranyisi mwanyalo luwo.

Bed ni ilendo ne joma koro eka ochako hero adiera kata igolo twege e kanyakla, sama iwuoyo kuom gweth mag Pinyruoth, nyis gima wechego puonjowa kuom Nyasaye machiwo singogo. Sama iwuoyo kuom chikene, jiw rieko koda hera manenore kuom chikego. Nyis maler ni gik ma Nyasaye dwaro ni watim ok gin mag miyo ngima obednwa matek, kar mano, oketgi mondo gikonywa. (Isa. 48:17, 18; Mika 6:8) Nyis kaka yo moro amora ma Jehova osenyisogo tekone nyiso kite, chikene, kod dwaro mare. Nyis kaka Jehova nyiso kidogo e yo mowinjore. We ji ong’e kaka iwinjo e chunyi iwuon kuom Jehova. Hera miherogo Jehova nyalo miyo imi jomoko bende ohere.

Ote madwarore ni okow mapiyo e kindewagi en ni ji duto oluor Nyasaye. Kuom gima wawacho onego wanyis ni luor ma kamano ema wajiwo. Mani en luoro mowinjore, mamiyo waneno Jehova kaka ng’ama duong’ miwuoro, kendo konyowa miye luor kaka dwarore. (Zab. 89:7) Oriwo ng’eyo ni Jehova e Jang’ad-Bura maduong’ kendo ni ngimawa ma kinde mabiro otenore kuom winjruok maber kode. (Luka 12:5; Rumi 14:12) Omiyo luor ma kamano otudore chuth gi hera matut mwaherego mamiyo wagombo timo gima odwaro. (Rapar 10:12, 13) Luoro Nyasaye bende miyo wasin gi gimarach, wawinj chike Nyasaye, kendo walame gi chunywa duto. (Rapar 5:29; 1 Weche 28:9; Nge. 8:13) Ogeng’owa kik watem tiyo ne Nyasaye to konchiel wahero gik piny.—1 Joh. 2:15-17.

Nying Nyasaye—“En Ot Matek.” Joma ong’eyo Jehova gadier yudo rit mogundho. Ok en mana nikech gitiyo gi nyingno kata ni ginyalo kwano kido moko ma en-go. En nikech gigeno Jehova owuon. Ngeche 18:10 wacho kuomgi kama: “Nying Jehova en ot matek moting’ore malo; ng’at makare oringoe, mi okuwo.”

Ti maber gi thuolo miyudo mondo ijiw ji ogen Jehova. (Zab. 37:3; Nge. 3:5, 6) Geno ma kamano nyiso ni in gi yie kuom Jehova kod singone. (Hib. 11:6) Ka ji “luongo nying [Jehova]” nikech ging’eyo ni en e Jaloch e wi gik moko duto, gihero yorene, kendo nikech giyie chuth ni resruok nyalo mana a kuome—Wach Nyasaye wachonwa gadier ni—ibiro resgi. (Rumi 10:13, 14) Sama ipuonjo jomoko, konygi bedo gi yie ma kamano e yore duto mag ngimagi.

Ji mang’eny nyagore gi chandruoge madongo dongo. Nyalo bedo ni ok gine kama kony nyalo ae. Jiwgi gipuonjre yore Jehova, giket geno kuome, kendo giti gi gik ma gipuonjorego. (Zab. 25:5) Jiwgi gilem gi kinda mondo Nyasaye okonygi kendo gigone erokamano kuom gweth ma giyudo. (Fili. 4:6, 7) Ka ji ong’eyo Jehova, ok nikech gisomo mana weche moko e Muma to bende nikech giseneno kaka singone chopo e ngimagi, gibiro chako winjo ka chunygi okuwe nikech ng’eyo adier tiend gima nying Jehova ochung’ne.—Zab. 34:8; Yer. 17:7, 8.

Ti maber gi kinde moro amora e konyo ji one rieko mar luoro Nyasaye madier, Jehova, kendo rito chikene.

“BEDO JONENO MAG YESU”

KAPOK odhi e polo bang’ chierne, Yesu Kristo nochiko jopuonjrene kama: “Unudok jonenona . . . nyaka tung’ piny.” (Tich 1:8) Iluongo jotich Nyasaye momakore kode e kindewagi ni jogo ma nigi migawo mar “bedo joneno mag Yesu.” (Fwe. 12:17) In gi kinda maromo nade mar lando wachno?

Ji mang’eny mawacho gi chuny maler ni giyie kuom Yesu ok ong’eyo ni Yesu nokwongo dak e polo kapok obiro e piny kaka dhano. Ok ging’eyo ni Yesu ne en dhano madier kane en e piny. Gikiya tiend gimomiyo iluonge ni Wuod Nyasaye. Ok ging’eyo gik mathoth ma Yesu timo e chopo dwaro mar Nyasaye. Ok ging’eyo gima otimo gie sani, kendo gikiya kaka gima obiro timo e kinde mabiro biro mulo ngimagi. Ginyalo kata bedo gi paro mobam ni Joneno mag Jehova ok oyie kuom Yesu. Wan gi thuolo makende mar miyo ji ong’e adiera kuom wechegi.

Pod jomoko ok oyie ni Yesu ma Muma wuoyo kuome nodak adier. Jomoko neno Yesu mana ka ng’ama rahuma. Ji mang’eny wacho ni ok en Wuod Nyasaye. “Bedo joneno mag Yesu” e kind joma kamago dwaro kinda, horuok, koda tiyo gi rieko.

Bed ni jowinjo nigi paro mane, dwarore ni ging’e Yesu Kristo mondo giyud ngima mochwere ma Nyasaye chiwo. (Joh. 17:3) Dwaro ma Nyasaye oseketo maler en ni ng’ato ang’ata mangima “ohul ni Yesu Kristo en Ruoth” kendo obolre e bwo lochne. (Fili. 2:9-11) Omiyo, ok wanyal panjo ne wachno sama waromo gi ji ma nigi paro motegno to obam kata ma jaro e lela. Kata obedo ni nitie kinde ma wanyalo wuoyo kuom Yesu Kristo ka wan thuolo—kata mana e limbe mokwongo—kuonde mamoko to nyalo dwaro ni wawuo gi rieko e yo mamiyo jowinjo ochak nene e yo makare. Bende nyalo dwarore ni wapar weche momedore mwanyalo wacho kuom Yesu e limbe maluwo. Kata kamano, wuoyo kuom gik moko duto motudore gi wachno nyalo bedo matek kapok wachako puonjruok Muma gi ng’ato.—1 Tim. 2:3-7.

Migawo Maduong’ ma Yesu Nigo e Chopo Dwaro mar Nyasaye. Dwarore ni wakony ji ng’eyo ni nikech Yesu “e yo” kendo ni ‘ng’ato ok bi ka Wuoro maok okadho kuome,’ onge kaka ng’ato nyalo bedo gi winjruok gi Nyasaye maok oyie kuom Yesu Kristo. (Joh. 14:6) Ka ng’ato ok ong’eyo migawo maduong’ ma Jehova omiyo Wuode makayo, ok onyal winjo tiend Muma. Nikech ang’o? Nikech Jehova noketo Wuode obed jalno ma otiyogo e chopo dwaro mage duto. (Kol. 1:17-20) Weche mokor e Muma osirore kuom wachni. (Fwe. 19:10) Kokalo kuom Yesu Kristo, ibi lo chandruoge ma nobedoe nikech ng’anjo mar Satan koda richo mar Adam.—Hib. 2:5-9, 14, 15.

Mondo ng’ato ong’e tiend migawo mar Kristo, nyaka ofweny ni dhano ni e chal marach ahinya maok onyal gonyoree kende owuon. Waduto onyuolwa e richo. Richono nyalo miyo wayud chandruoge mopogore opogore e ngimawa. Kata kamano, gikone, okelo tho. (Rumi 3:23; 5:12) Wuo gi joma ilendonegi kuom wachno. Kae to nyisgi ni e yor hera, Jehova osemiyo resruok kuom richo koda tho onyalre ne joma nyiso yie kokalo kuom misango mar rawar mar Yesu Kristo. (Mari. 10:45; Hib. 2:9) Mano yawonegi yo mar dak gi mor e ngima makare chuth ma nyakachieng’. (Joh. 3:16, 36) Onge yo machielo ma ng’ato nyalo yudogo ngima ma kamano. (Tich 4:12) Kaka japuonj, bed ni ipuonjo ng’ato achiel kata ipuonjo e kanyakla, tim mathoth moloyo mana nyiso adieragi. E yo mamuol kendo kihori, mi jowinjo obed gi chuny manyiso erokamano ne tij Kristo kaka Jawarwa. Ng’eyo ber mar chiwoni nyalo loko e okang’ malach paro ma ng’ato nigo, timbene, koda gigo modwaro timo gi ngimane.—2 Kor. 5:14, 15.

En adier ni Yesu nochiwo ngimane kaka misango mana dichiel. (Hib. 9:28) Kata kamano, sani otiyo kaka Jadolo Maduong’. Kony jomoko ong’e gima tiend mano en. Be gin gi parruok, chuny monyosore, chandruok, kata hinyruok nikech jomoko timonegi gik maricho? Kane Yesu nie piny, nokalo e magi duto. Ong’eyo kaka wawinjo. Be waneno kaka en gima dwarore ni Nyasaye onyiswa ng’wono nikech wan dhano morem? Ka wakwayo mondo Nyasaye ong’wonnwa kokalo kuom misango mar Yesu, Yesu biro bedonwa “jakony masayonwa Wuoro.” Nikech okechowa, ‘osayonwa.’ (1 Joh. 2:1, 2, The Bible in Luo, 1976; Rumi 8:34) Kokalo kuom misango mar Yesu koda tijene kaka Jadolo Maduong’, wanyalo dhi e “nyim kom mar [Jehova] Nyasachwa mang’won” mondo wayud kony e kinde mowinjore. (Hib. 4:15, 16) Kata obedo ni wan joma orem, kony ma Yesu chiwo ka en Jadolo Maduong’ miyo watiyo ne Nyasaye gi chuny maler.—Hib. 9:13, 14.

E wi mano, Yesu nigi loch maduong’ nimar en ng’ama Nyasaye oketo obed Wi kanyakla mar Jokristo. (Math. 28:18; Efe. 1:22, 23) Ka otiyo gi loch ma kamano, otayowa kaluwore gi kaka Nyasaye dwaro. Sama ipuonjo jomoko, konygi ging’e ni Yesu Kristo e Wi kanyakla, to ok dhano moro amora. (Math. 23:10) Chak gwelo ng’ato sama ihango romo kode mondo obi e chokruoge mag kanyakla kama wapuonjoree Muma kwatiyo gi buge ma ‘jatichno mogen kendo mariek’ ochiwo. Lernegi ok mana ng’ama “jatichno” en, to bende ng’ama Ruoth en, mondo ging’e wich ma Yesu nigo. (Math. 24:45-47) Konygi ging’ere gi jodong-kanyakla kendo lernegi kido ma Ndiko wacho ni dwarore kuom joma kamago. (1 Tim. 3:1-7; Tito 1:5-9) Konegi ni kanyakla ok en mar jodongogo to ni gin gikonyowa luwo ranyisi mar Yesu Kristo. (Tich 20:28; Efe. 4:16; 1 Pet. 5:2, 3) Kony jo manyien-gi one ni nitie riwruok mar piny ngima matiyo e bwo wich ma en Kristo.

E buge mag Injili, wapuonjore ni kane Yesu odonjo Jerusalem ka thone nokayo machiegni, jopuonjrene ne opake ni “Ruodhno ma biro e nying Nyasaye!” (Luka 19:38) Kaka ji medo puonjore Muma matut, gifwenyo ni loch ma Jehova osemiyo Yesu kwako kit oganda duto. (Dan. 7:13, 14) Sama igolo twak e kanyakla kata ipuonjo ji Muma, konygi ging’e gima loch mar Yesu dwaro kuomwa waduto kendo konygi girwak lojno.

Jiw ni kit ngimawa ema nyiso kabe wayie gadier ni Yesu Kristo e Ruoth kendo kabe wabolore ne lochne kowuok e chunywa. Jiw tich ma Yesu nomiyo jolupne mondo otim bang’ ka nosekete kaka Ruoth. (Math. 24:14; 28:18-20) Wuo kuom gima Yesu, ma en Jabura Makare, nowacho ni waket obed mokwongo e ngima. (Isa. 9:6, 7; Math. 6:19-34) Jiw chuny ma Ruodh Kuwe nowacho ni jolupne ne dhi nyiso. (Math. 20:25-27; Joh. 13:35) Tang’ kik ing’ad bura ne jomoko ni ok gitim gik moko e okang’ madwarore, to jiwgi mondo ginon kabe gik ma gitimo nyiso ni gibolore ne loch mar Kristo. Sama itimo kamano, nyis ni in bende dwarore ni inonri.

Keto Kristo Obed Mise. Muma poro tij timo ng’ato japuonjre Kristo gi gero ot e wi Yesu Kristo kaka mise. (1 Kor. 3:10-15) Mondo itim kamano, kony ji ong’e Yesu kaka olere e Muma. Tang’ mondo kik bed ni in e ng’at ma giluwo. (1 Kor. 3:4-7) Konygi ging’e ni Yesu Kristo ema onego giluw.

Kapo ni oket mise maber, jopuonjre biro ng’eyo ni Kristo noweyonwa ranyisi ‘mondo waluw ndache.’ (1 Pet. 2:21) Mondo iged e wi mano, jiw jopuonjre mondo osom buge mag Injili, ok mana ni mondo gine weche ma adier ma bugego wacho, to mondo gikawgi kaka ranyisi monego giluw. Konygi mondo gikaw mapek paro kod kido mag Yesu. Jiwgi mondo gine kaka Yesu ne neno Wuon mare, kaka ne otimo e bwo tembe, kaka nonyiso bolruok ne Nyasaye, kendo kaka notimo ne dhano e chal mopogore opogore. Jiw tich ma Yesu nodichgo e ngimane. Mano biro miyo sama japuonjre dwaro ng’ado paro, kata ka okalo e chandruoge mag ngima, obiro penjore niya: ‘Da bed ni Yesu ema tembegi omako, dotimo nang’o? Be okang’ ma abiro kawo biro nyiso ni amor gi gik mosetimona?’

Kiwuoyo gi kanyakla, kik ing’ad ni nikech owete nigi yie kuom Yesu, onge tiende wachonegi gimoro makende kuome. Gimiwacho biro medo konyogi ka igedo kuom yie ma gin-gono. Sama iwuoyo kuom chokruoge, tud mano gi migawo mar Yesu kaka Wi kanyakla. Sama iwuoyo kuom tij lendo, nyis chuny ma Yesu nonyiso ka nolendo, kinyiso gima Kristo kaka Ruoth timo e choko ji mabiro kwo mondo odonj e piny manyien.

Nenore maler ni nitie gik mang’eny madwarore moloyo mana ng’eyo weche moko matin e wi Yesu. Mondo ji obed Jokristo madier, nyaka ginyis ni giyie kuom Yesu kendo ni gihere gadier. Hera ma kamano jiwo ng’ato oluwe kendo omakre kode. (Joh. 14:15, 21) Herano miyo ji chung’ motegno e yie sama gin e bwo chandruok, miyo giluwo ranyisi mar Kristo e ngimagi duto, kendo miyo ginyis ni gin Jokristo motegno ma ‘moko kendo chung’’ e mise ma en Kristo. (Efe. 3:17) Timo kamano miyo Jehova duong’, ma en Nyasach Yesu Kristo kendo Wuon mare.

“WACH MABERNI MAR PINYRUOTH”

KANE ochiwo ranyisi mar bedoe mare kaachiel gi mar giko mar piny marachni, Yesu nokoro niya: “Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.”—Math. 24:14.

Ote sie monego oland kuonde duto, en mane? En wach Pinyruoth ma Yesu nopuonjowa ni wakwa Nyasaye e lamo, niya: “Pinyruodhi mondo obi.” (Math. 6:10) Fweny 11:15 lero pinyruodhno kaka “Loch mar Ruodhwa [Jehova], kendo mar Kristone” nikech Jehova ema miyo Kristo loch mar bedo Ruoth. Kata kamano, ne ni lendo ma Yesu nowacho ni ne idhi tim e ndalowa, itimo e okang’ malach moloyo kaka jolupne mokwongo notimo. Ne ginyiso ji ni: “Pinyruodh Nyasaye osudonu machiegni.” (Luka 10:9) Yesu, ma ne owal kaka Ruoth, ne ni e diergi. Kata kamano, kaluwore gi Mathayo 24:14, Yesu nokoro gimachielo ma ne idhi landi e piny mangima ma ne dhi chopo dwaro mar Nyasaye.

Ne omi janabi Daniel fweny kuom kaka mano ne dhi timore. Noneno “ng’ato machal gi wuod dhano,” Yesu Kristo, ka “ng’at cha ma hike ng’eny,” Jehova Nyasaye, miye “loch gi duong’ kod piny ruoth, ni mondo ogendini duto gi libembini kod ji ma dhogi yore, gitine.” (Dan. 7:13, 14) Gima notimoreno ma ne mulo piny ngima, ne otimore e polo e higa mar 1914. Bang’ mano, ne owit Jachien gi jochiendene e piny ka. (Fwe. 12:7-10) Piny marachni nodonjo e gikone. To kapok otieke chuth, ilando e piny ngima ni Mesia, ma en Ruoth ma Jehova oketo koro locho ka en e kome mar duong’ e polo. Kuonde duto, ichiwo milomeni ne ji. Kaka girwako wachno nyiso kaka gineno Jal Mamalo Chutho ma en Ruoth mar “piny ruodh dhano.”—Dan. 4:32.

En adier ni pod gik mang’eny biro timore—gik mang’eny mokalo! Pod walemo ka wakwayo ni, “Pinyruodhi mondo obi,” to ok en ni Pinyruodh Nyasaye pok ochako locho. Kar mano, wakwayo ni Pinyruodh polo obi okaw okang’ mar chopo weche mokor kaka manie Daniel 2:44 kod Fweny 21:2-4. Obiro loko pinyni mondo obed paradis mopong’ gi ji mohero Nyasaye koda dhano wadgi. Sama walando “Wach Maberni mar pinyruoth,” mago e weche ma wanyiso ji ni biro timore e kinde mabiro. Bende wanyiso ka wan gadier ni Jehova osemiyo Wuode teko duto mar locho. Be ijiwo wach maberni sama ilando wach Pinyruoth?

Lero ne Ji Wach Pinyruoth. Ere kaka wanyalo chopo migawo ma wan-go mar lando ne ji Pinyruodh Nyasaye? Wanyalo chako mbaka kuom weche mopogore opogore mamiyo ji siso, kata kamano, onego gine mapiyo ni walandonegi wach Pinyruodh Nyasaye.

Achiel kuom gik madwarore ahinya e tijni oriwo somo kata wacho weche mowuok e ndiko mawuoyo kuom Pinyruodhno. Sama iwuoyo kuom Pinyruoth, ne ni joma ilendonegi winjo tiende. Nyalo dwarore ni itim mang’eny moloyo mana wacho ni Pinyruodh Nyasaye en sirkal. Jomoko nyalo neno ka teknegi kawo gima ok gine kaka sirkal madier. Inyalo konyogi ng’eyo kor wachno kitiyo gi yore mopogore opogore. Kuom ranyisi, teko mamiyo gik moko lwar piny ok nyal ne, kata kamano tekono chikowa. Ok wanyal neno Jalno ma nochweyo tekono, kata kamano nenore maler ni en ng’at ma nigi teko mang’eny. Muma luonge ni “Ruoth mochwere.” (1 Tim. 1:17) Kata inyalo konye neno kor wachno kuom nyise ni e piny moro, nyalo bedo ni ji mang’eny pok ochopo e dala maduong’ mar pinyno kata pok oneno ker margi gi wang’gi. Giwinjo awinja kilandogi e lendo. E yo ma kamano bende, Muma, buk ma ogo e dhok mokalo 2,200, leronwa wach Pinyruodh Nyasaye; onyisowa ng’ama osemi lojno kendo gima Pinyruodhno biro timo. Ohinga mar Jarito, migoyo e dhok mang’eny moloyo gasede mamoko duto, en gaset “Malando Pinyruodh Jehova” kaka onyis e ite motelo.

Mondo ikony ji ong’e gima Pinyruoth en, inyalo hulo moko kuom gik ma ji dwaro ni sirkal otimnegi: miyogi yore yuto moromo, kuwe, tieko mahundu, timo ne ji duto maromre maok ong’i oganda ma giwuokie, miyogi thuolo mar somo, koda yudo thieth. Nyisgi ni wechegi kaachiel gi gombo mamoko duto mowinjore mag dhano, biro chopo chuth mana kokalo kuom Pinyruodh Nyasaye.—Zab. 145:16.

Tem miyo ji siso mar bedo e bwo Pinyruoth ma Yesu Kristo ema lochoe ka en Ruoth. Nyis kaka honni ma ne otimo ne gin ranyisi mag gik mobiro timo ka en Ruoth e polo. Pile, wuo kuom kido mabeyo ma ne onyiso. (Math. 8:2, 3; 11:28-30) Ler ni ne ochiwonwa ngimane kendo Nyasaye nochiere odag e polo e ngima maok nyal kethi. Kaka Ruoth, olocho koa kuno.—Tich 2:29-35.

Jiw ni Pinyruodh Nyasaye locho koa e polo gie sani. Kata kamano, ng’e ni ji mang’eny ok ne lokruok ma giparo ni onego obedie ka adier loch ma kamano nitie. Nyis ni ing’eyo gimomiyo ginyalo paro kamano, kae to ipenjgi kabe ging’eyo gima Yesu Kristo nowacho ni biro bedo ranyisi mar lojno. Wuo kuom weche moko manie ranyisi moriwo gik mang’eny mondik e Mathayo sula mar 24, Mariko sula mar 13, kata Luka sula mar 21. Kae to ipenjgi gimomiyo keto Kristo obed jaloch e polo ne dhi miyo gik ma kamago otimre e pinyka. Tergi e Fweny 12:7-10, 12.

Mondo inyisgi gima Pinyruodh Nyasaye timo, som Mathayo 24:14, kae to iler chenro mar puonjo ji Muma e piny mangima ma dhi nyime gie sani. (Isa. 54:13) Nyis ji skunde mopogore opogore makonyo Joneno mag Jehova—ma mise margi duto en Muma, kendo mitimo maonge chudo. Lernegi ni e wi lendo mwatimo ot ka ot, wapuonjo ng’ato achiel achiel kata joot Muma maonge chudo e pinje mokalo 230. En sirkal mane mar dhano manyalo keto program ma kamano, mar puonjo ok mana joge kende, to ji duto me piny mangima? Gwel ji mondo obi e Od Romo, gibi e chokruoge mag Joneno mag Jehova kaka mag alwora koda mag distrikt, mondo gine kaka chenro ma kamago konyo ji gadier.—Isa. 2:2-4; 32:1, 17; Joh. 13:35.

To be wuon ot biro fwenyo kaka wachno mulo ngimane? Inyalo nyise gi rieko ni gimomiyo ilime en nyise thuolo mochiw ne ji duto mondo giyier bedo e bwo loch mar Pinyruodh Nyasaye. Giyiero mano nade? Kuom puonjruok gima Nyasaye dwaro kendo dak sani kaluwore gi gik ma gipuonjorego.—Rapar 30:19, 20; Fwe. 22:17.

Konyo Jomoko Oket Mokwongo Pinyruoth. Kata mana bang’ ka ng’ato oserwako wach Pinyruoth, nitie paro ma nyaka ong’ad. Obiro keto Pinyruodh Nyasaye kar kanye e ngimane? Yesu nojiwo jopuonjrene ni ‘gidwar mokwongo pinyruoth.’ (Math. 6:33) Ere kaka wanyalo konyo Jokristo wetewa mondo otim kamano? Kuom keto ranyisi maber wawegi kendo wuoyo kuom thuolo mag timoe kamano. Kinde moko, en kuom penjo ng’ato kabe osenono thuolo monyalo lendogo kendo kuom nyise weche mosene manyiso kaka jomoko osetimo. Kuom wuoyo e wi weche manie Muma e yo mamiyo wechego miyo ng’ato medo hero Jehova. Kuom jiwo kaka Pinyruodhno en adier. Kuom jiwo kaka tij lando wach Pinyruoth en gima dwarore ahinya. Gima tiyo maber ok en nyiso ji gima dwarore ni gitim, to en jiwogi gibed gi gombo mar timo kamano.

Onge kiawa ni wach maduong’ ma nyaka waduto waland jiwo ahinya wach Jehova Nyasaye, Yesu Kristo, koda Pinyruoth. Adiera madongo motudore gi wechegi ema onego wajiw e lendo ma watimo, e kanyaklawa, koda e ngimawa wawegi. Ka watimo kamano, wanyiso ni Skul mar Tij Nyasaye konyowa gadier.