Barua Mowuok Kuom Bura Maduong’
Owetewa gi Nyiminewa Mwageno:
Jehova, ma e Wuonwa manie polo, ema ketonwa ranyisi maberie moloyo mar nyiso hera. Mano emomiyo Muma wacho kama kuome: “Nyasaye en hera.” (1 Joh. 4:8) Kata obedo ni Jehova e Nyasaye Manyalo Duto, Muma ok wach ni, “Nyasaye en teko.” Gik moko duto motimo otudore gi hera. To mano kaka heraneno miyo wamor sudo machiegni kode!
Gima morowa en ni Jehova ok chunwa mondo watine. Ok oti gi tekone e yo marach. Odwaro ni watine nikech wahere gi chunywa duto. Ka watimo kamano, wanyiso ni wayie gi yo ma olochogo nikech wang’eyo ni otimo mano e yo makare kendo gi hera. Yo maber ma olochogono osenenore ayanga chakre ne chwe dhano.
Kar chuno Adam gi Hawa mondo owinje, Jehova nomiyogi thuolo mar yiero gima gidwaro. Kadine bed ni gihero Jehova gadier kod gik ma notimonegi, dine gikwedo tem mar Satan ma nomiyo ging’anjono.
Higini mang’eny bang’e, Musa nonyiso Jo-Israel kama e wechene mogik: ‘Ne, tinendeni aseketo e nyimi ngima kod gimaber, kendo tho kod gimarach.’ (Rapar 30:15) Jo-Israelgo ne nigi thuolo mar yiero kaka ne gidwaro ni gidagi. Joshua bende nowacho ne Jo-Israel kama: ‘To kobedonu marach mar tiyo ne Jehova, yieruru kawuononi ng’ama unutine.’ Jo-Israel nodwoko Joshua kama: “Chutho to kik mondo wawe Jehova.” (Josh. 24:15, 16) To mano e chuny ma wan bende wanyiso e ndalogi. Nikech wahero Jehova, ok wanyal paro ngang’ mar weyo tiyone.
Nikech wan Jokristo madier, wang’eyo tiend bedo gi thuolo mar timo yiero. Kata obedo ni omi jodong-kanyakla migawo mar miyowa puonj gi siem, ok gin gi paro moro amora mar dwaro chiko ngimawa. Jaote Paulo nondiko kama: “Wan ok wabedo joloch mag yieu to wan jotich kaachiel kodu kuom mor maru, nimar un uchung’ matek e yie.”—2 Kor. 1:24.
Donge en adier ni wayudo mor ka watimo gimoro nikech wahero to ok kochunwa? Jehova dwaro ni watim gik mabeyo nikech hera. Paulo nojiwo wachno ka nondiko kama: “Ka achiwo giga duto mondo ji ocham, kaketo ringra mondo owang’, to aonge hera, ok okonya kata matin.”—1 Kor. 13:3.
Jehova bedo mamor ahinya kendo oyudo pak sama oneno ka owetewa gi nyiminewa e piny ngima tiyone gi chunygi duto nikech gihere!
Mor gi pak ma Jehova yudono miyo en bende ohero jotichne, moriwo nyaka un nyithindo gi rowere mohero Jehova kendo mosin gi timbe mag pinyni. Ng’euru ni wan be waherou ahinya.—Luka 12:42, 43.
Nikech owetewa, nyiminewa, kaachiel gi rowere ohero Jehova, higa mokalo ne gitiyo gi seche 1,748,697,447 e lando wach maber. Nikech hera, jolendo 7,782,346 e piny mangima noriwo tij lendo lwedo. Wamor sidang’ ni ji 268,777, moriwo rowere mathoth, nonyiso chiwruokgi ne Jehova kokalo kuom batiso. Mani nyiso ni ne obatis ji maromo 5,168 e giko juma ka juma. To mano kaka dongruok ma kamano jiwowa ndi!
E ndalo mag gikogi, jotich Nyasaye nyagore gi chandruoge mang’eny moriwo tembe, akwede kata sand, midekre, kaachiel gi pek mabedoe nikech bedo moti. Kata kamano, waramo ni kata ang’o ema timre, ok wabi “dok chien” kata ‘nyosore.’ Beduru kung’eyo ni waherou ahinya.—Hib. 10:39; 2 Kor. 4:16.
Wan oweteu,
Bura Maduong’ mar Joneno mag Jehova