Ti gi Bug Puonj Manie Wach Nyasaye e Chako Mbaka gi Ji
1. En buk mane manyien ma waseyudo mwanyalo tiyogo e tij lendo?
1 E chokruok maduong’ mar ndalo adek ma wiye ne wacho ni “Sikuru Kudwaro Mokwongo Pinyruodh Nyasaye,” ne wayudo buk miluongo ni Puonj Manie Wach Nyasaye. Ere kaka wanyalo tiyo gi bugno sama waiko weche mwanyalo chako wuoyogo gi ji e tij lendo? Nikech ochan ndiko mag Muma e bwo wiye mopogore opogore mana kaka otim e bug Kutoa Sababu, tiyo kode yot e chako mbaka gi ji.
2. Ere kaka wanyalo tiyo gi bug Puonj Manie Wach Nyasaye e tij lendo?
2 Ka iyiero tiyo gi penjo mar 8, inyalo wacho kama: “Kawuono wawuoyo gi ji e wi penjo moro ma ji mang’eny penjorega: ‘Be Nyasaye e ma kelo ne dhano chandruok?’ [Nitie alwora moko ma ber ka inyiso wuon ot penjono achiel kachiel e buk.] Ineno nade wachno? [Rit dwoko.] Muma chiwo dwoko makare e wi penjono.” Som ndiko achiel kata mokalo mano achiel kachiel e Muma, kendo uwuo kuomgi. Ka wuon ot orwako wach, inyalo tang’one penjo 20 manie ite mokwongo mar bugno, ae to ikwaye mondo oyier penjo ma doher ni uwuoye e limbe maluwo. Kata inyalo miye achiel kuom buge mwatiyogo e puonjruok Muma gi ji ma nigi weche momedore e wi wach ma ua wuoyoe.
3. Ere kaka wanyalo tiyo gi bug Puonj Manie Wach Nyasaye e chako mbaka gi ji e alwora ma ji ok nie din mar Jokristo?
3 Penjo mar 4, kod mag 13 nyaka 17 nyalo bedo ma ber lendogo e alwora ma ji ok nie din mar Jokristo. Kuom ranyisi, ka itiyo gi penjo mar 17 inyalo wacho kama: “Kawuono wawuoyo gi ji e wi kaka joot nyalo nyagore gi pek ma giyudo. Donge en adier ni joot romo gi chandruoge mang’eny? [Rit dwoko.] Ji mang’eny mokendore oseyudo ber kuom tiyo gi wechegi: ‘To dhako bende onego omi chwore luor matut.’ [Ok ochuno ni nyaka iwach ni wechego oa e Jo-Efeso 5:33. Kapo ni iwuoyo gi ng’ama dhako, inyalo tiyo gi weche manie Jo-Efeso 5:28.] Be iparo ni tiyo gi wechego nyalo konyo joma okendore?”
4. Sama itieko mbaka gi wuon ot ma ok ni e din mar Jokristo, en ang’o minyalo timo?
4 Sama itieko mbaka, tim chenro mar dok lime mondo udhi nyime gi mbakano. Samoro inyalo yiero dok wuoyo e wi ndiko mamoko ma oket e bwo penjo ma uwuoyoeno. Bang’ kinde, inyalo nyiso wuon ot ni weche mabeyo ma isebedo ka inyisego yudore ei Muma. Kaluwore gi mbaka ma usebedogo kod wuon ot kod paro ma en-go e wi Muma, inyalo miye buk moro amora ma nyalo more.—Som Tijwa mar Pinyruoth ma Desemba 2013, ite mag 3 nyaka 6.