Vidio mar ‘Tembea kwa Imani, Si kwa Kuona.’

Ka nodong’ kinde matin to jolweny mag Rumi lworo Jerusalem mondo gikethe chuth, jaote Paulo nondiko ne Jokristo ka opimogi gi jolweny mabeyo mag Kristo. Nowacho ni ne gidhi yudo masiche, omiyo ne ok onego gimany ngima mayom ma kelonegi mor. (2 Tim. 2:3, 4) Dwarore ni wabed gi yie motegno mondo waket pachwa e weche Nyasaye, nikech masira moro maduong’ chiegni biro e wi piny ma ok oluoro Nyasayeni. (2 Kor. 4:18; 5:7) Ne vidio mar ‘Tembea kwa Imani, Si kwa Kuona.’ (Dhi e jw.org/sw, kae to idi MACHAPISHO, kae to VIDIO.) Tem ane neno kaka hero gige ringruok nobedo obadho maduong’ ne Naham gi Abital. Bang’e, to inon penjo ma luwogi.

(1) ‘Gima odwanyore, mochung’ e kama ler’ ne en ang’o e kinde Jokristo mokwongo, to ang’o ma ne dwarore ni Jokristo ma nodak Jerusalem otim mapiyo? (Mat. 24:15, 16) (2) Ang’o momiyo bedo gi yie ne dwarore mondo ng’ato oring oa Jerusalem? (3) Gin gik mage ma jomoko noyie weyo chien mondo giring giwuog Jerusalem? (4) Ang’o momiyo Naham gi Abital ne ok owuok Jerusalem mapiyo? (Mat. 24:17, 18) (5) Rahel noromo gi tembe mage momedore e kinde ma ne owuok Jerusalem? (Mat. 10:34-37; Mari. 10:29, 30) (6) Ere kaka Ethan noketonwa ranyisi maber mar keto geno chuth kuom Jehova? (7) Jokristo noromo gi pek mage ka gin Pella? (8) Ere kaka yie mar Naham gi Abital nodok chien mosmos? (9) Ere kaka Jehova norito Jokristo ma nodak Pella? (Mat. 6:33; 1 Tim. 6:6-8) (10) Ere kaka wanyalo luwo ranyisi mar Ibrahim gi Sara e kindewagi ma koro giko osekayo machiegni? (Hib. 11:8-10) (11) Ere kaka Naham gi Abital nowuondore ma gidok Jerusalem, to ang’o momiyo mano ne ok owinjore? (Luka 21:21) (12) Ka ne Naham gi Abital odok Jerusalem ngima ne chalo nade kuno? (13) Ang’o momiyo nyaka wabed gi yie motegno kapok giko mar piny marachni ochopo?—Luka 17:31, 32; 21:34-36.

Wuotho kuom yie tiende en (1) keto genowa chuth kuom yore mag Jehova, (2) weyo mondo chikene e ma ota ngimawa, kendo (3) nyiso ni wakawo mapek winjruokwa kode moloyo gige ringruok. Wang’ad uru e chunywa ni wabiro wuotho kuom yie, ka wan gadier ni, “piny kadho gi gombone, to ng’at ma timo dwach Nyasaye siko nyaka chieng’.”—1 Joh. 2:17.