SOMO MAR 8
Ang’o Momiyo Nyasaye Oweyo Richo gi Chandruok Mondo Obedie?
1. Richo ne ochakore nade?
Nyasaye oseweyo dhano mondo oloch kuom kinde moromo nyiso maler ni dhano ok nyal tieko chandruogegi gin giwegi
Richo ne ochakore e piny ka ne Satan owacho miriambo mokwongo. Ne ochue Satan ka en malaika ma onge richo, to “ne ok ochung’ motegno e adiera.” (Johana 8:44) Ne ogombo ni mondo ji olame kata obedo ni Nyasaye kende e ma onego olam. Satan ne owuondo Hawa, ma owinje kar luwo Nyasaye. Adam ne oriwo Hawa lwedo e ketho chik Nyasaye. Yiero mar Adam ne otimono nokelo chandruok kod tho.—Som Chakruok 3:1-6, 19.
Ka ne Satan onyiso Hawa mondo oketh chik Nyasaye, ne ong’anyo ne Nyasaye kata obedo ni Nyasaye e ma nigi ratiro mar bedo jaloch. Ji mang’eny oseriwo Satan lwedo e kwedo Nyasaye kaka Jaloch. Omiyo, Satan osebedo “jaloch mar pinyni.”—Som Johana 14:30; 1 Johana 5:19.
2. Be gik ma Nyasaye nochueyo ne orem e yo moro amora?
Tije duto mag Nyasaye long’o chuth. Dhano kod malaike ma Nyasaye nochueyo ne nigi nyalo mar makore gi chike Nyasaye e yo makare chuth. (Rapar mar Chik 32:4, 5) Nyasaye ne ochueyowa gi nyalo mar yiero timo gik makare kata gik maricho. Nyalono miyowa thuolo mar nyiso ni wahero Nyasaye.—Som Jakobo 1:13-15; 1 Johana 5:3.
3. Ang’o momiyo Nyasaye oweyo chandruok mondo obedie nyaka sani?
Kuom kinde, Nyasaye oseweyo ng’anyo ne loch mare mondo odhi nyime. Nikech ang’o? Mondo onyis ni onge ber mabedoe e bwo loch moro amora mopogore gi mare. (Eklesiastes 7:29; 8:9) Wachno nenore maler sani bang’ higini 6,0mag loch mar dhano. Joloch ma dhano pok otieko lwenje, mahundu, timbe ma ok kare, kata tuoche.—Som Jeremia 10:23; Jo-Rumi 9:17.
Mopogore gi loch mar dhano, joma orwako loch mar Nyasaye yudo gueth. (Isaya 48:17, 18) Machiegnini, Nyasaye biro tieko sirkande duto mag dhano. Mana jogo moyie ni Nyasaye oloch e wigi e ma biro dak e piny.—Isaya 11:9.—Som Daniel 2:44.
Ne vidioni: Ang’o Momiyo Nyasaye Oweyo Chandruok Mondo Obedie?
4. Horuok mar Nyasaye miyowa thuolo mar timo ang’o?
Satan nowacho ni dhano tiyo ne Jehova mana nikech gik momiyogi. Be diher nyiso e ngimani ni wachno en miriambo? Mano nyalore! Horuok mar Nyasaye miyowa thuolo mar nyiso ka be wadwaro ni oloch e wiwa kata wadwaro ni dhano e ma oloch e wiwa. Wanyiso ni jalochwa en ng’a ka luwore gi kit ngima ma wadakie.—Som Ayub 1:8-12; Ngeche 27:11.
5. Wanyalo timo ang’o mondo wanyis ni Nyasaye e Jalochwa?
Yiero ma watimo nyiso ka be wadwaro ni Nyasaye obed Jalochwa kata ooyo
Wanyiso ni Nyasaye e Jalochwa ka wapuonjore Wachne ma en Muma, kendo riwo lwedo lamo madier. (Johana 4:23) Wakwedo loch mar Satan ka ok wadonjore e weche mag siasa kod lweny, mana kaka Yesu ne otimo.—Som Johana 17:14.
Satan tiyo gi tekone mondo omi timbe anjawo kod timbe makelo hinyruok onere kaka timbe mabeyo. Ka watamore luwo timbe ma kamago, moko kuom osiepewa kod wedewa nyalo jarowa kata kwedowa. (1 Petro 4:3, 4) Omiyo, nyaka wayier gima wabiro timo. Be wabiro makore gi joma ohero Nyasaye? Be wabiro luwo chike Nyasaye manyiso rieko kod hera? Ka watimo kamano, wabiro nyiso ni Satan ne oriambo ka ne owacho ni onge ng’ato ang’ata manyalo tiyo ne Nyasaye e bwo tem.—Som 1 Jo-Korintho 6:9, 10; 15:33.
Hera ma Nyasaye oherogo dhano miyo wabedo gadier ni richo kod chandruok biro rumo. Joma nyiso ni giyie gi wachno biro dak nyaka chieng’ e piny ka gimor.—Som Johana 3:16.