Ang’o ma Joot Nyalo Timo Mondo Gidag gi Mor kod Kuwe?

1. Ang’o momiyo riwo kend e yo maler konyo e miyo joot obed ma mor?

Wach maber wuok kuom Jehova, ma en Nyasaye ma mor, ma dwaro ni joot obed ma mor. (1 Timotheo 1:11) En e ma ne ochako kend. Kend moriw e yo maler miyo joot dak gi mor nikech gipidho nyithindo ka gin gi kuwe. Jokristo onego oluw chike mag piny ma gidakie kodok korka riwo kend e nyim sirkal.​—Som Luka 2:1, 4, 5.

Nyasaye neno kend nade? Odwaro ni kend obed riwruok mosiko e kind dichwo gi dhako. Jehova dwaro ni dichwo gi dhako mokendore obed joma ogenore. (Jo-Hibrania 13:4) Ketho kend osine. (Malaki 2:16) Kata kamano, Jokristo nyalo ketho kendgi mi gidonj e kend machielo ka po ni achiel kuomgi oterore. ​—Som Mathayo 19:3-6, 9.

2. Dichwo gi dhako onego odag e yo mane?

Jehova ne ochueyo dichwo gi dhako mondo gikonyre e kindgi. (Chakruok 2:18) Nikech dichwo e wi ot, onego opidh joode kendo opuonjgi Wach Nyasaye. Onego oher chiege ahinya. Chwo gi mon onego oherre kendo oluorre. Nikech chwo gi mon gin joma orem, onego giikre ng’wono ne jowetegi mondo gidag gi mor kod kuwe.​—Som Jo-Efeso 4:31, 32; 5:22-25, 33; 1 Petro 3:7.

3. Be onego iwe jaodi ka kend maru ok dhi maber?

Ka po ni uyudo pek moko e kend maru, onego utim kinda mondo umed nyiso hera e kindu. (1 Jo-Korintho 13:4, 5) Wach Nyasaye ok nyis ni pogo dak nyalo konyo e tieko chandruoge mapile mag kend.​—Som 1 Jo-Korintho 7:10-13.

4. Nyasaye dwaro ni nyithindo otim ang’o?

Jehova dwaro ni mondo ubed ma mor. Omiyou puonj mabeyo ma nyiso kaka unyalo bedo ma mor ka pod un rowere. Odwaro ni uti gi puonj ma jonyuolu miyou mondo ngimau odhi maber. (Jo-Kolosai 3:20) Jehova bende dwaro ni ubed ma mor nikech utiyone kod Wuode.​—Som Eklesiastes 11:9–12:1; Mathayo 19:13-15; 21:15, 16.

5. Jonyuol nyalo timo ang’o mondo nyithindgi obed ma mor?

Onego uti matek mondo umi nyithindu chiemo, kar dak, kod lewni. (1 Timotheo 5:8) Kata kamano, mondo nyithindu obed ma mor, dwarore bende ni upuonjgi mondo giher Nyasaye kendo giher puonjge. (Jo-Efeso 6:4) Hera ma iherogo Nyasaye nyalo miyo nyathini bende ohere. Ka ipuonjo nyathini Wach Nyasaye, puonjgo nyalo konye bedo gi paro mowinjore.​—Som Rapar mar Chik 6:4-7; Ngeche 22:6.

Nyithindo dhi maber ka ijiwogi kendo ipuoyogi. Bende dwarore ni oriegi kendo okumgi. Tiegogi e yo ma kamano ritogi mondo kik gidonj e timbe manyalo hinyogi. (Ngeche 22:15) Kata kamano, kum ok onego obed ma hinyo nyithindo.​—Som Jo-Kolosai 3:21.

Joneno mag Jehova oloso buge mopogore opogore mondo okony jonyuol kod nyithindo. Bugegi oting’o puonj ma ni e Muma.​—Som Zaburi 19:7, 11.