SULA MAR 10
Yesu gi Joodgi Dhi Jerusalem
YESU PENJO JOPUONJ PENJO KA OJAHIGNI APAR GARIYO
YESU LUONGO JEHOVA NI ‘WUON MARE’
En dwe mar Mach kata April kama. Ma e kinde ma jood Josef kaachiel gi osiepegi kod wedegi dhiga Jerusalem higa ka higa. Gidhi e sawo mar Pasaka kaka chik dwaro. (Rapar mar Chik 16:16) Wuok Nazareth nyaka mwalo Jerusalem en wuodh kilomita 120. En kinde mag dich ahinya kendo ma ji rito gi siso. Yesu ma koro jahigni 12, orito sawono gi siso makende ahinya mondo oyud thuolo mar dhi e hekalu kendo.
Yesu kod joodgi ok ne sawono mana kaka mar odiechieng’ achiel kende. Odiechieng’ ma luwo Pasaka e ma bedoga chakruok mar odiechienge abiriyo mag Sawo mar Makate Maonge Thowi. (Mariko 14:1) Odiechiengno bende ikwano kaka mar Pasaka. Mondo giwuog Nazareth dalagi, gibed Jerusalem mi gichak giduog kendo, kawogiga jumbe madirom ariyo kama. Higani to gikawo kinde makalo kanyo nikech wach moro e wi Yesu. Mano otudore gi chandruok moro ma gifwenyo sama giduogo ka gia Jerusalem.
Sama Josef gi Maria wuotho ka gidok, giparo ni Yesu ni e kind wedegi kod osiepegi ma giwuothogo kanyachiel ka gichomo nyandwat. Kata kamano, ka piny yuso gifwenyo ni Yesu onge. Omiyo, gichako manye e kind jowuoth wetegi, to ok giyude. Wuowino olal nono! Kuom mano, Josef kod Maria dok Jerusalem mondo gimanye.
Gimanye kuom odiechieng’ mangima to ok giyude. Pod ok giyude kata mana e odiechieng’ mar ariyo. Gikone, e odiechieng’ mar adek giyude e hekalu ma nigi ute mopog opog mang’eny. Giyude kobet e dier jopuonj moko ma Jo-Yahudi. Owinjogi, openjogi penjo, kendo giwuoro rieko ma en-go.
Maria penje kama: “Nyathina, isetimonwa kama nang’o? An kod wuoru wasechandore ahinya ka wamanyi.”—Luka 2:48.
Yesu wuoro gimomiyo ok ne ging’eyo kama entie. Openjogi kama: “Ang’o momiyo ne umanya? Ne ok ung’eyo ni nyaka abed e od Wuora?”—Luka 2:49.
Ka koro giseyude, Yesu dok Nazareth kanyachiel gi Josef kod Maria, kendo odhi nyime luwo kaka gichike. Yesu dongo kendo riekone medore. Kata obedo ni pod otin, Nyasaye kod ji medo bedo mamor kode. Ee, chakre tinne, Yesu keto ranyisi maber, ok mana kuom weche mag lamo kende, to bende e nyiso luor ne jonyuolne.