Tije Gedo ma Notieki ka Pok Tuo mar Korona Ochakore

Kaka imedo batisi ji alufe galufe higa ka higa, e kaka dwarore ni wabed gi kuonde momedore ma ilamoe Jehova. Nikech mano, Migawo Mochung’ ne Gedo e piny mangima ne chano gero kata loso kuonde mokethore e ute mag lamo ma kwan-gi okalo 2,700 e higa mar tijwa mar 2020.a

Kata kamano, tije ma ne gisechanogo ne ok onyalore nikech tuo mar korona. Komiti mar Gocho mar Bura Matayo, nochungo tije mag gedo ma nosechan e piny mangima mondo girit ngima owete gi nyimine ka giluwo chike ma sirkende noketo. To pod e ma e higa mar tijwa mar 2020, ka ne tuo mar korona pok ochakore, noyudo oseger kata oselos kuonde ma nokethore e utewa mag lamo mokalo 1,700. E wi mano, noseger kata loso kuonde mokethore e ofise mokalo 100. Ne ane kaka ariyo kuom kuonde ma noger motiekgo osekelo ne owete gi nyimine ber.

Ofis ma Cameroon. Ofiswa machon ne ni Douala, ne tin ahinya kendo ne dwarore ni otimne lokruoge moko madongo. Komiti mar Gocho ne paro timo lokruoge ma ne dwarore e ofisno, kata kamano, lokruogego ne dhi kawo pesa mang’eny moloyo nengo odno. Bende, ne ginono ka ginyalo gero ofis machielo manyien, kata ng’iewo ot manyien kae to giloke obed ofis. Kata kamano, weche ma ne ginonogo duto ne ok onyalre.

E kindego, owetewa nofwenyo ni sirkal ne chano gero ndara moro ma ne dhi kalo but achiel kuom Ute Chokruok mag Alwora man yo nyandwat mar Douala. Ndarano ne dhi miyo chopo kuno obed mayot, kendo gik mamoko bende ne koro dhi yudore e yo mayot. Alwora kaka mano e ma ofis ne dwaro ahinya. Kuom mano, Bura Matayo nopwodho mondo opog lowo ma nogerie Od Chokruok ma Alwora, kendo kanyo ogerie ofis manyien.

Joneno notiyo kanyachiel gi kontrakta mamoko ma nomi tich, kendo timo kamano nokonyo e kungo pesa kod thuolo. Pesa ma notigo e tijno ne tin ahinya kopim gi pesa ma ne igeno ni ne idhi tigo. Ne okung pesa mokalo siling’ milion 200 mag Kenya! Jo Bethel nodar modhi e ofis manyienno ka pok tuo mar korona ochakore.

Jo Bethel man Cameroon sani odak e ute mabeyo, kendo gitiyo e ofise mabeyo moloyo ma ne gintie chon. Kendo gineno ofis manyienno mana ka mich moa kuom Jehova. Owadwa moro gi jaode nowacho kama: “Wadwaro ni wati matek mondo wanyis ni wakawo mapek mich majaberni.”

Ofis mar Loko Dhok mar Tojolabal man Mexico. Kuom higni mang’eny, jolok dho Tojolabal ne tiyo e ofis mar Central Amerka man but taon mar Mexico. Kata kamano, dhokno iwacho ahinya-ahinya e gwenge mag Altamirano kod Las Margaritas, ma yudore chiegni kilomita 1,000 kiwuok e taon mar Mexico. Mano nomiyo ok yot ne joloko medo lony margi e dhok ma ne giloko mar Tojolabal. Bende, ne ok yot yudo owete gi nyimine molony e dhokno ma nodak e alworago ma ne nyalo konyo e tij loko buge, kaachiel gi mako dwol mitiyogo e vidio kod miwinjo.

Nikech wechego, Komiti mar Ndiko mar Bura Matayo ne dwaro ni jolokogo odar odhi e alwora ma ne iwachoe dhokno. Omiyo, ofis nong’ado ni ne gidhi ng’iewo ot moro, kendo loke mondo obed ofis. Timo kamano ne dhi miyo gikung pesa mang’eny moloyo gero ofis manyien, kata chulo ot dwe ka dwe.

Winj ane kaka achiel kuom joloko man kanyo wacho kaka wachno osekonye. Owacho kama: “Kuom higni apar ma nasetiyoe kaka jaloko ka ne wan e ofis maduong’, ne pok aromoga gi joot ma ne wacho dhok ma waloko. Sani to koro ofiswa ni e chuny kama iwachoe dho Tojolabal. Aromoga gi joma wacho dhokno pile ka pile. Mano osemiyo amedo lony e dhokno kendo osekonya ahinya e tija mar loko dhok.”

Tije Monego Otim e Higa mar Tijwa ma 2021

E higa mar tijwa mar 2021, wachano gero kata loso kuonde mokethore e ofise 75 mag loko dhok, kod e ute mitimoe skunde motudore gi weche Nyasaye, ka po ni mano biro nyalore. Tije moko mag gedo pod biro dhi nyime e bad ofise moko aboro, moriwo nyaka gero ofis ma Ramapo, New York, kaachiel gi daro ofise man Argentina kod Italy. E wi mano, dwarore ni oger Ute Romo manyien mokalo 1,000, olos kuonde ma sani itimoe romo 6,000, kendo olos kuonde mokethore e Ute Romo 4,000.

Pesa mitimogo tijegi duto a kanye? Owadwa Lázaro González, ma en achiel kuom owete ma ni e Komiti mar Bad Ofis ma Central Amerka nodwoko penjono sama nowuoyo e wi tij gero Ofis mar Loko Dhok mar Tojolabal. Nowacho kama: “E alwora man e bwo ofiswa, ji yutogi ok ber ahinya. Omiyo, ka di ne ok wayudo kony moa kuom riwruok mar owete e piny ngima, di ne ok obedonwa mayot gero Ofis Milokoe Dhok ma sani konyo owetewa ma wacho dhokno. Chiwo ma owete gologa e piny mangima osemiyo wagero ofis e alwora miwachoe dhokno, kendo mano osekonyo joloko dhokno timo tijno kama iwachoe dhokno. Dwaher goyo erokamano maduong’ ne riwruok mar owete e piny mangima kuom chiwogi duto.” Tijego duto itimo nikech chiwo migologa mondo osirgo tij piny mangima, kendo ng’enygi igologa kokalo kuom websaitwa mar donate.jw.org.