Bug Muma Namba 63​—2 Johana

Jandiko: Jaote Johana

Ne Ondike: Efeso, kata machiegni

Ne Otiek Ndike: Chiegni 98 E.N.

BARUP Johana mar ariyo chuok, ma nyalo bedo ni ne ondike e oboke achiel mar papyrus⁠​—⁠​to kata kamano opong’ gi puonj mogundho. Ondike ne “minwa moyier kendo ni nyithinde.” Josomo moko mag Muma neno ni nitie ng’at moro ma ne ondikne baruano, nikech nying’ mar “Kyria” (matiende en “miyo” e dho-Grik) ne en nying’ ma sie mitiyogo e kindeno. Jomoko to neno ni Johana ne ndiko ne kanyakla moro mar Jokristo koluonge ni “minwa moyier.” Nyalo bedo ni ne otim kamano mondo ochoch pach josand. Ka en kamano, to kare mos mawacho ni ‘nyithind nyameru omosou,’ mayudore e giko baruani nyalo bedo ni gin mag joma nie kanyakla machielo. Omiyo barua mar ariyoni ne ok en mar ji duto kaka mano ma nokwongo, nimar nenre ni ne ondike ne ng’at achiel kata ne kanyakla moro achiel.​​—⁠⁠Kwan 1.

² Onge kiawa ni Johana ema nondiko baruani. Jandiko luongore owuon ni “an jaduong’.” Kuom adier, mani nyiso ni jalo ne en Johana, to ok mana nikech koro hike ne ng’eny, to bende nikech ne en achiel kuom “sirini” (Gala. 2:⁠9) kendo jaote mogik, kendo kuom adier ne en “jaduong’” ei kanyakla mar Jokristo. Ne ong’ere ahinya, kendo ne onge gima chielo ma ne dwarore mondo eka josomo mage ong’eye ni en ng’a. Bedo ni en e jandiko bende nenore kuom yo mondikgo baruani, machalo kaka ondik Injili mar Johana. Mana kaka barua mokwongo, nenre ni barua mar ariyo nondiki e Efeso kata machiegni gi kanyo, chiegni higa 98 E Ndalowa. Kowuoyo kuom Johana mar Ariyo kod Adek, Cyclopedia mar McClintock kod Strong wacho ni: “Kaluwore gi chal ma gin-go, wanyalo ng’ado ni barupe ariyogo ne ondiki mapiyo bang’ barua Mokwongo ma nondik Efeso. Giduto giwuoyo kuom chike koda puonj matayo timbe mopogore opogore ma ne oket wechegi chuth ei Barua mokwongo.”a Gima riwo lwedo ni baruani en adier en ni Irenaeus, ma nodak e kind higini mag 100-200 nwoyo wechege, kendo Clement Ja-Alexandria, ma nodak e kindeno bende noyie kode.b Barupe Johana bende ni e oboke mar Muratorian Fragment.

³ Mana kaka Johana Mokwongo, gimomiyo nondik baruani ne en nikech jopuonj mag miriambo ne temo ketho yie mar Jokristo. Johana dwaro chiwo siem ne josombe kuom joma kamago mondo omi ging’e jogo, mi giwere kodgi, ka gidhi nyime wuotho e adiera, kendo ei hera.

GIMOMIYO BUGNI KONYO

⁵ Nenre ni e kinde mag Johana, mana kaka e ndalogi, ne nitie jomoko ma ne ok mor siko ei puonj Kristo moket e lela kendo e yo mayot. Ne gidwaro gimoro machielo ma ne nyalo jimbo sunga ma ne gin-go, gima ne nyalo miyo ging’awore mi gibed marom gi jorieko mag pinyni, kendo ne giikore ketho kendo kelo pogruok ei kanyakla mar Jokristo mondo eka gichop dwachgi maricho. Johana ne ogeno ahinya kuwe mar kanyakla ma ne bedoe nikech hera koda puonj makare e winjruok gi Wuoro koda Wuowi. Onego wagen ahinya winjruok mayudore ei kanyakla e kindegi, ka wakwedo tudruok kata moso jogo ma weyo yie ka giluwo puonj machielo mopogore gi ma wayudo ei Ndiko mowuok e much Nyasaye. Ka wadhi nyime wuotho kaluwore gi chike Nyasaye, kendo ka watimo kamano gi ilo mogundho chuth mayudore e riwruok madier mar Jokristo, wanyalo bedo gadier ni “ng’wono, gi miwafu, gi kuwe nobed kodwa moa kuom Nyasaye Wuoro, kendo kuom Yesu Kristo, Wuod Wuoro, e adiera gi hera.” (Kwan 3) Kuom adier, barup Johana mar ariyo nyiso maler gweth mag bedo ei achiel kaka Jokristo.

[Weche moler piny]