1, 2. Kaluwore gi Ezekiel 47:1-12, Ezekiel neno ang’o, to mano puonje ang’o? (Ne picha manie chak sulani.)

EZEKIEL neno kendo gimoro makende e fweny mar hekalu: Aora moro mol kowuok kama oger maber kendo maler! Tem ane paro ka Ezekiel manyo kama pi malerno wuokie. (Som Ezekiel 47:1-12.) Ochakore gi kama ler kae to owuok e dho rangach man yo wuok chieng’ mar hekalu. Malaika tayo Ezekiel ka giwuok e hekalu kendo gipimo bor mar pigno ka gidhi. Malaikano nyiso Ezekiel ni okal e pigno nyadinwoya. Ezekiel fwenyo ni kaka omedo dhi e kaka pigno medo bedo matut, ma chopo kama ng’ato nyaka go abal eka okale!

² Ezekiel fwenyo ni pigno donjo e Nam Chumbi kendo kamoro amora ma pigno riwore gi pi chumbino, ochango pigno kendo omiyo rech bedo mang’eny kanyo. Oneno ka yiende mopogore opogore nie bath aorano. Dwe ka dwe, gigolo olembe mamit kod oboke ma chango ji. Nyaka bed ni neno magi duto nomiyo Ezekiel obedo gi kuwe kod geno. Kata kamano, fweny ma ne oneno e wi hekaluni, ne mule nade kaachiel gi Jo-Yahudi ma noter e tuech? To fwenyno mulowa nade e kindegi?

Kaka Aora ma Ezekiel Noneno e Fweny Nomulo Joma Nie Tuech

3. Ang’o momiyo Jo-Yahudi machon nong’eyo ni aora ma ne Ezekiel oneno e fweny ne en mana aora mar ranyisi?

³ Kuom adier, Jo-Yahudi machon nong’eyo ni aora miwuoyeno ne en aora mar ranyisi. Nyalo bedo ni weche ma nokorgo noparonegi weche ma ne Joel ondiko higni piero ariyo mokalo e wi duoko lamo madier. (Som Joel 3:18.) Ka ne Jo-Yahudi ma ne nie tuech nosomo weche mag Joel, ne ging’eyo ni gode ne ok nyal ‘pong’ gi divai mamit’ kendo ‘chak ne ok nyal mol’ koa e gode matindo; kendo ne ging’eyo ni pi ne ok nyal bubni “ka wuok e od Jehova.” E yo ma kamano bende, Jo-Yahudi nong’eyo ni fweny ma ne Ezekiel oneno e wi aora, ne wuoyo mana e wi aora mar ranyisi.a To kare en wach mane ma Jehova ne temo nyisogi? Ndiko konyowa ng’eyo moko kuom tiend weche miwuoyoe e fwenyno. Kata kamano, wadwaro nono gik moko adek ma wanyalo puonjore e fwenyno.

4. (a) Aora ma ne Ezekiel oneno e fweny ne nyalo miyo Jo-Yahudi ogen gueth mage kowuok kuom Jehova? (b) Ere kaka weche motigo e Muma ni “aora” kod “pi” miyo wabedo gadier ni Jehova biro guedho joge? (Ne sanduk ma wiye wacho ni “Aoche mag Gueth Moa Kuom Jehova.”)

⁴ Aora ma kelo gueth. E Muma, aoche kod pi ojatigago kiwuoyo kuom gueth mosiko mag Jehova. Ezekiel noneno aora ma kamano ka mol koa e hekalu. Fwenyno ne nyalo miyo jo Nyasaye obed gadier ni gibiro yudo gueth mag Jehova mana ka gimakore gi lamo madier. Guethgo gin mage? Jodolo ne dhi miyogi kendo weche ma tayogi. To nikech nichiwo misengni e hekalu, ne ginyalo bedo gadier ni ne idhi wenegi richogi. (Eze. 44:15, 23; 45:17) Omiyo, ne gidhi bedo maler kendo mana ka gima olwokgi gi pi maler ma wuok e hekalu.

5. Ere kaka aora ma Ezekiel noneno e fweny, konyowa bedo gadier ni gueth biro betie ne ji duto?

⁵ Be ji duto ne dhi yudo gueth? Fwenyno konyowa yudo dwoko mar penjono nikech onyiso yo ma pi medorego. Ochako kotin kae to mana bang’ mail achiel kende, obedo aora matut! (Eze. 47:3-5) Jo-Yahudi ne nyalo nyuolore ma bed mang’eny thurgi, kata kamano, gueth mag Jehova to ne dhi bedo mang’eny ahinya ma chop dwachgi duto. Aorano ne nyiso ni ne gidhi bedo gi gueth mogundho!

6. (a) Fweny ma ne Ezekiel oneno ne oting’o wach mane ma chiwo geno? (b) Wechego miyowa siem mane? (Ne weche moler piny.)

⁶ Pi ma chiwo ngima. Aora ma ne Ezekiel oneno e fweny ne mol ka tero pige e Nam Chumbi, to mano ne miyo thoth gik man kanyo bedo mangima. Ne ni pigego nomiyo rech mang’eny obedo mangima mana ka rech mopogore opogore ma yudore e Nam Maduong’ kata Nam Mediterania. Ohand rech ne dhi maber e dho wadh Nam Chumbi, ma yudore e kind taonde ariyo ma ne ni maboyo. Malaika nowacho niya: “Gik moko [duto] nobed mangima kamoro amora ma pigno molie.” Be mano nyiso ni pi ma ne wuok e od Jehova ne chopo kuonde duto e Nam Chumbi? Ooyo. Malaikano nolero ni nitie kuonde moko ma ne dhi bedo gi thidhia nikech pi ngima ne ok dhi chopo kuno. Pi ma ni kuondego pod ‘ne dhi bedo gi chumbi.’b (Eze. 47:8-11) Omiyo, fwenyno ne miyo ji geno ni lamo madier ne dhi chango ji kendo miyo gidag maber. Kata kamano, nitie siem moro ma wayudo kanyo: Nitie jomoko ma ne ok dhi rwako gueth mag Jehova kendo mano ne dhi miyo ok changgi.

7. Yiende ma ne otwi e bath aora ma ne Ezekiel oneno e fweny, nomiyo Jo-Yahudi ma noa e tuech geno mane?

⁷ Yiende ma chango ji kendo miyo ji bedo gi chiemo. To nade yiende ma ne nie bath aora? Gimedo bero fwenyno, donge? Bende, gikonyowa winjo tiend fwenyno e yo maber. Onge kiawa ni paro kaka yiendego ne dhi nyago olembe mamit dwe ka dwe ne moro Ezekiel gi Jo-Yahudi wetene! Mano ne nyalo miyo gibed gadier ni Jehova ne dhi pidhogi gi chiemb chuny. To be mago kende e gueth ma ne gidhi yudo? Ne ni oboke mag yiendego ne dhi “chango ji.” (Eze. 47:12) Jehova nong’eyo ni ne dhi dwarore ni ochang joma noa e tuechgo e yor chuny, to mano e gima notimo. Weche mamoko ma nokor e wi duoko lamo madier lero kaka notimo kamano, mana kaka ne wapuonjore e Sula mar 9 mar bugni.

8. Ang’o ma nyiso ni weche ma ne Ezekiel oneno e fweny ne dhi chopo e okang’ malach?

⁸ Kata kamano, kaka ne waneno e Sula mar 9, joma noduogo koa e tuech noneno mana moko kuom weche ma nokorgo. Gin giwegi e ma ne gimiyo moko kuom weche ma nokorgo ok ochopo. Ere kaka Jehova ne nyalo guedhogi to ne gisiko ka ging’anyone, ok giluw chikene, kendo gijwang’o lamo madier? Jo-Yahudi ma nomakore gi Jehova to ne winjo malit ahinya nikech timbe maricho mag jomoko. Kata kamano, jotich Nyasaye to nong’eyo ni kinde duto singo mag Jehova chopoga. (Som Joshua 23:14.) Omiyo, ne ging’eyo ni nitie chieng’ moro ma weche ma ne Ezekiel okoro ne dhi timore e okang’ malach. To mano ne dhi bedo karang’o?

Aora Mol e Kindewagi!

9. Fweny ma ne Ezekiel oneno e wi hekalu chopo e okang’ malach e kinde mage?

⁹ Mana kaka ne waneno e Sula mar 14 mar bugni, fweny ma ne Ezekiel oneno e wi hekalu ne dhi chopo e okang’ malach e “ndalo mag giko,” ma gin kinde ma lamo madier ne idhi ting’ malo moloyo kinde moro amora. (Isa. 2:2) Ere kaka fweny ma ne Ezekiel onenono chopo e kindewagi?

10, 11. (a) Gin gueth mage ma wayudo e kindewagi? (b) Ere kaka gueth mag Jehova osemedore mochopo dwaro mag ji e ndalo mag gikogi?

¹⁰ Aora ma kelo gueth. Pi mamol koa e od Jehova paronwa gueth mage e kindewagi? Kuom adier, pigno paronwa gik moko duto ma konyowa bedo gi winjruok maber gi Jehova. To maduong’ie moloyo, en teko ma misango mar Yesu nigo, ma miyo inyalo wenwa richowa. Adiera ma yudore e Wach Nyasaye bende ipimo gi pi ma chiwo ngima kata pi ma lwokowa mondo wabed maler. (Efe. 5:25-27) Ere kaka waseyudo gueth ma kamago e kindewagi?

¹¹ E higa mar 1919 ne nitie mana jotich Jehova matin kendo ne gimor ahinya gi chiemb chuny ma ne giyudo. E higni mang’eny ma noluwo, kwan-gi nomedore ahinya. E kindewagi, kwan mar jotich Nyasaye okalo milion aboro. Be osemed lernwa adiera ma yudore e Muma? Ee! Nitie adiera moko mang’eny ma oselernwa. Kuom higni mia achiel mosekalo, jotich Nyasaye oseyudo Mumbe, buge, gasede, brosua, kod trakt mang’eny. Mana kaka aora ma ne Ezekiel oneno e fweny, adiera mag Muma osebedo mang’eny ahinya ma nyalo tieko riyo mar ng’eyo wach Nyasaye ma ji mathoth nigo e piny ngima. Buge ma lero Muma mogo e otas osebedoe kuom kinde malach ahinya. To sani, inyalo yudo bugego e websaitwa mar jw.org, e dhok mokalo 900! Ere kaka adierago mulo joma chunygi nikare?

12. (a) Adiera mag Muma oseloko ngima ji e yo mane? (b) Fwenyno miyowa siem mane e kindewagi? (Ne bende weche moler piny.)

¹² Pi ma chiwo ngima. Nonyis Ezekiel niya: “Gik moko [duto] nobed mangima kamoro amora ma pigno molie.” Tem ane paro kaka adiera ma yudore e Muma osebedo mang’eny ne joma osebiro e paradisowa mar ranyisi. Adiera mag Muma osemulo chuny ji mang’eny ahinya kendo konyogi bedo gi yie kuom Jehova. Kata kamano, fwenyno miyowa siem moro: Ok ji duto ma biro siko komako adierago. Mana kaka kuonde motimo thidhia kod chuodho ma ne nitie e Nam Chumbi e fweny ma Ezekiel noneno, nitie jomoko ma ne ok dhi rwako adiera kendo ne gidhi tamore tiyo gi puonj mag Muma.c Kik wayie mondo gima kamano otimrenwa!​—Som Rapar mar Chik 10:16-18.

13. Gin puonj mage ma wanyalo yudo kuom yiende ma ne Ezekiel oneno e fweny?

¹³ Yiende ma chango ji kendo ma miyo ji bedo gi chiemo. Be yiende ma notwi e bath aora ma Ezekiel noneno e fweny nyalo miyowa puonj ma jiwowa e kindewagi? Ee! Par ni yiendego ne golo olembe mamit dwe ka dwe, kendo obokegi ne chango ji. (Eze. 47:12) Omiyo, mano paronwa ni watiyo ne Nyasaye ma miyowa chiemb chuny mogundho. To maduong’ie moloyo, ochangowa e yor chuny. E kindewagi, ji mang’eny ok winj tiend adiera ma yudore e Muma. Mopogore gi mano, parie apara gik ma Jehova miyowa. Be isegatieko somo sula moro e bugewa, kata tieko wero wer moro e chokruogewa madongo, kata tieko neno vidio kata program mar Jw Broadcasting ma iwinjo kimor nikech chiemb chuny miyudo? Kuom adier, ipidhowa maber. (Isa. 65:13, 14) Be chiemb chuny ma imiyowa miyo wabedo gi winjruok maber gi Nyasaye? Puonj mabeyo ma wayudo ma wuok e Muma, konyowa mondo waked matek mondo kik wadonj e richo kaka terruok, ich-lach, kod bedo ma onge yie. Jehova bende oseketo chenro ma nyalo konyo Jokristo motimo richo madongo mondo giyud kony sama gituo e yor chuny. (Som Jakobo 5:14.) Kuom adier, wan gi gueth mang’eny mana kaka inyisowa e fweny ma ne Ezekiel oneno e wi yiende motwi e bath aora.

14, 15. (a) Kuonde ma otimo thidhia ma ne Ezekiel oneno e fweny puonjowa ang’o? (b) Aora ma ne Ezekiel oneno e fweny konyowa nade e kindegi?

¹⁴ Bende, wanyalo puonjore gimoro e wi kuonde motimo thidhia ma ne ok ochang. Ok dwaher timo gimoro amora ma monowa yudo gueth mag Jehova e ngimawa. Nyalo bedo gima rach ahinya ka ok ochangwa mana kaka ji mang’eny manie pinyni ma ok bi changi. (Mat. 13:15) Wamor ahinya nikech wayudo gueth mang’eny ma molnwa mana ka aora. Wanyalo paro aora ma ne Ezekiel oneno e fweny, sama wapuonjore adiera ma yudore e Wach Nyasaye, sama walando adierago ka wan e tij lendo, kod sama itayowa, ihoyowa kendo ikonyowa gi jodongo ma osetieg maber gi jatich mogen kendo mariek. Aorano chango gik moko kendo omiyo gibedo mangima kuonde duto ma omolie!

¹⁵ To fweny ma wuoyo e wi aorano biro chopo nade e kinde ma biro? Mana kaka wabiro neno, aorano biro mol e okang’ malach moloyo e paradiso ma biro.

Kaka Fwenyno Biro Chopo e Paradiso

16, 17. (a) Pi ngima biro bedo mang’eny e Paradiso e yo mane? (b) Gin gueth mage ma wabiro yudo e paradiso?

¹⁶ Par ane ni in e Paradiso, kendo in gi osiepeni gi joodu, kendo umor ma tamre gi nono. Nono fweny ma ne Ezekiel oneno e wi aora, nyalo konyi goyo picha maler e wi kaka ngima biro chalo e kindeno. E yo mane? Par ane kendo weche adek madongo ma yudore e fwenyno.

¹⁷ Aora ma kelo gueth. Aora mar ranyisino biro kelo gueth mang’eny e Paradiso; gueth mag ringruok kod mag chuny. E kinde loch Yesu mar higni aluf achiel, Pinyruodh Nyasaye biro konyo joma omakore gi Jehova mondo giyud ber mar rawar e okang’ malach moloyo. Mos mos, ji biro bedo makare chuth! Tuoche, lakteche, nas, kod kad mitiyogo e thieth ok bi betie kendo! Pi ngimano biro mol kuom ji milionde mang’eny motony e Har–Magedon, ma gin ‘oganda mang’ongo’ ma biro tony e “masira maduong’.” (Fwe. 7:9, 14) Kata kamano, gueth ma mol ka pigo, biro bedo matin kopim gi gueth mang’eny ma biro bang’e. Mana kaka fweny ma ne Ezekiel oneno, aorano biro yarore mondo ochop dwaro mag dhano e yo momedore.

18. Ere kaka ‘aora mar pi ngima’ biro medo bubni e kinde Loch Kristo mar Higni Aluf Achiel?

¹⁸ Pi ma chiwo ngima. E kinde Loch Kristo mar Higni Aluf Achiel, “aora . . . mar pi ngima” biro bubni. (Fwe. 22:1) Ibiro chier ji bilionde kendo gibiro yudo thuolo mar dak e Paradiso nyaka chieng’! Gueth ma Jehova biro kelo kokalo kuom Pinyruodhe, biro riwo chiero jomotho mosenindo aninda e lowo kuom higni mang’eny. (Isa. 26:19) Kata kamano, be ji duto mibiro chier biro dak nyaka chieng’?

19. (a) Ang’o ma nyiso ni adiera manyien biro betie e Paradiso? (b) E kinde ma biro, jomoko “nobed chumbi” e yo mane?

¹⁹ Ng’ato ka ng’ato kuomwa nyaka tim yiero. Ng’e ni ibiro yaw buge manyien modol e kindeno. Omiyo, pi ngima mowuok kuom Jehova biro riwo adiera moko manyien. Donge paro wachno miyo ibedo mamor? Kata kamano, nitie jomoko ma biro tamore luwo chike manyien ma Jehova biro chiwo. Moko nyalo ng’anyo e kinde Loch Kristo mar Higni Aluf Achiel, kata kamano, ok bi yienegi ketho kuwe e Paradiso. (Isa. 65:20) Gibiro paronwa kuonde motimo chuodho, thidhia, kod “chumbi” ma ne Ezekiel oneno e fweny. To mano kaka joma otamore modho pi ngima biro bedo jo mofuwo! Bang’ Loch Kristo mar Higni Aluf Achiel, nitie joma biro ng’anyo ma riw Satan lwedo. Ji duto ma biro tamore riwo lwedo loch makare mar Jehova, biro yudo kum achiel ma en tho ma nyaka chieng’.​—Fwe. 20:7-12.

20. En chenro mane ma biro konyowa e kinde Loch Kristo mar Higni Aluf Achiel ma paronwa yiende ma ne Ezekiel oneno e fweny?

²⁰ Yiende ma chango ji kendo miyo ji bedo gi chiemo. Jehova ok dwar ni ngima ma nyaka chieng’ obawa. Mondo thuolo makendeno kik bawa, obiro timo chenro kendo ma chalo gi yiende ma ne Ezekiel oneno e fweny. Kata kamano, e Paradiso, wabiro yudo gueth mang’eny e yor ringruok kod e yor chuny. Yesu kod ji 144,000 biro locho kaka ruodhi e polo kuom higni aluf achiel. Kaka jodolo, ji 144,000 biro tiyo gi misango mar Yesu e konyo dhano momakore gi Nyasaye mondo gibed joma kare chuth. (Fwe. 20:6) Chenro mar bedo gi gueth e yor ringruok kod e yor chuny, biro paronwa yiende ma notwi e bath aora ma ne Ezekiel oneno e fweny. Yiendego ne nyago olemo kendo ne gin gi oboke ma chango ji. Fweny ma ne Ezekiel oneno, chalre gi fweny machielo ma ne jaote Johana oneno. (Som Fweny 22:1, 2.) Oboke ma ne Johana oneno, ne “ichangogo ogendni.” Ji tara gi tara momakore gi Nyasaye biro yudo ber nikech tij dolo mar ji 144,000.

21. Paro matut e wi fweny ma ne Ezekiel oneno e wi aora mulo ngimani nade, to ang’o ma wabiro nono? (Ne sanduk ma wiye wacho ni “Pi Matin Mamol Bedo Pi Mang’eny!”)

²¹ Donge paro matut e wi aora ma ne Ezekiel oneno e fweny miyo ibedo gi chuny mokuwe kod geno? Mano kaka kinde maber mopong’ gi mor ritowa! Parie apara wachni: Kuom higni mang’eny mokalo, Jehova nokoro weche mang’eny ma ne nyalo konyowa ng’eyo kaka ngima ne dhi chalo e kinde ma biro. Mos mos, wan bende osekonyowa mondo wang’e kaka weche ma nokorgo chopo. Be ibiro betie e kindego? Inyalo penjori ka be in bende ibiro bedo gi kari e Paradiso. We koro wane kaka weche mogik ma ne Ezekiel okoro, miyo wabedo gadier gi wachno.

1, 2. (a) Ang’o ma Jehova nyiso Ezekiel? (b) Gin penjo mage ma wabiro nono?

EZEKIEL oa neno fweny moro ma nyaka bed ni noparone gik ma notimore higni 900 mokalo, e kinde Musa kod Joshua. E kindeno, Jehova nonyiso Musa tong’ mar Piny Manosingi kae to bang’e nonyiso Joshua kaka onego opog pinyno e kind dhoudi mag Israel. (Kwan 34:1-15; Jos. 13:7; 22:4, 9) To koro e higa mar 593 K.K.P., Jehova nyiso Ezekiel gi joma ne en-go e tuech mondo gipog Piny Manosingi ne dhoudi mag Israel kendo!​—Eze. 45:1; 47:14; 48:29.

² Ezekiel kod joma ne en-go e tuech nonego opuonjre ang’o kuom fwenyno? Ang’o momiyo fwenyno jiwo jotich Nyasaye e kindegi? Be weche manie fwenyno biro chopo e okang’ malach e kinde ma biro?

Fweny Moting’o Weche Ang’wen ma Jiwowa

3, 4. (a) Fweny mogik ma ne Ezekiel oneno nojiwo joma noter e tuech e yore mage ang’wen? (b) Wabiro nono singo mane e sulani?

³ Sula ochiko mag bug Ezekiel wuoyo e wi fweny mogik ma ne Ezekiel oneno. (Eze. 40:1–48:35) Fwenyno ne nyiso kaka Jo-Israel ma noter e tuech ne idhi duok e pinygi kendo fwenyno ne jiwogi e yore ang’wen. Ne ojiwgi e yore mage? Mokwongo, ne idhi duok lamo madier e hekalu mar Nyasaye. Mar ariyo, jodolo kod jokwath mabeyo e ma ne dhi tayo oganda. Mar adek, ji duto ma ne dhi dok Israel ne dhi yudo lowo. Kae to mar ang’wen, Jehova ne dhi bedo kodgi mi odag kodgi kendo.

⁴ Sula mar 13 kod 14 mar bugni nonyiso kaka singo ariyo mokwongo ne dhi chopo gadier, ma gin dwoko lamo madier kod bedo gi jokwath mabeyo ma ne dhi tayogi. E sulani, wabiro wuoyo e wi singo mar adek, ma ne nyiso kaka ne idhi pog lowo. E sula ma luwo, wabiro wuoyo e wi kaka Jehova nosingo ni obiro bedo kodgi.​—Eze. 47:13-21; 48:1-7, 23-29.

‘Asemiyou Pinyni Mondo Obed Maru’

5, 6. (a) E fweny ma ne Ezekiel oneno, en piny mane ma ne idhi pog? (Ne picha manie chak sulani.) (b) Ang’o momiyo ne ochiw fweny ma nyiso kaka ne idhi pog lowo?

⁵ Som Ezekiel 47:14. E fweny moro, Jehova nonyiso Ezekiel piny ma ne dhi chalo ka “puoth Eden.” (Eze. 36:35) Kae to Jehova nowacho niya: “Ma e piny ma ubiro pogo ne dhoudi 12 mag Israel.” (Eze. 47:13) “Piny” ma ne idhi pogno ne en piny Israel ma ne idhi duokie joma owuok e tuech. Bang’e, mana kaka ondik e Ezekiel 47:15-21, Jehova nonyiso adimba tong’ mar pinyno duto.

⁶ Ang’o momiyo ne ochiw fweny ma nyiso kaka ne idhi pog lowo? Yo ma ne onyisgigo tong’ mar pinygi ma ne idhi duokgie nomiyo Ezekiel kod jowetene ma ne nie tuech obedo gadier ni ne idhi duokgi e pinygi. Nyaka bed ni weche ma ne Jehova olero adimbago nojiwo ahinya chuny joma ne nie tuech! Be en adier ni jotich Nyasaye machon-go noyudo lowo kaka nosingnegi? Ee, ne giyudo.

7. (a) Gin gik mage ma nochako timore e higa mar 537 K.K.P., to giparonwa ang’o? (b) En penjo mane ma wadwaro kwongo nono?

⁷ E higa mar 537 K.K.P., ma en higni 56 nyaka Ezekiel ne yud fweny, ji mang’eny ma noter e tuech nochako dok e piny Israel mondo gidag kuno. Gik ma notimorego paronwa gimoro makende ma osebedo ka timore ne jotich Nyasaye e kindewagi. Gin bende nopognegi lowo e yo moro. E yo mane? Jehova noyiene jotichne mondo odonj e paradiso mar ranyisi kendo dak kuno. Omiyo, ka wanono kaka Jehova noduoko Jo-Israel e Piny Manosingi, mano nyalo puonjowa weche mathoth e wi kaka ne idhi duok paradiso mar ranyisi ne jotich Nyasaye e kindewagi. To ka pok wanono puonjgo, we wakwong wanon ane penjoni: “Ang’o momiyo wanyalo bedo gadier ni wan-gi paradiso mar ranyisi e kindewagi?”

8. (a) Jehova nowilo oganda mar Jo-Israel masie gi oganda mane? (b) Paradiso mar ranyisi en ang’o? (c) Nochako bedoe karang’o, to jomage modak e iye?

⁸ E fweny ma Jehova ne omiyo Ezekiel motelo, nonyise kaka weche ma nokor e wi kaka ne idhi duok Jo-Israel thurgi ne dhi chopo e okang’ malach bang’ ka ‘Daudi jatichne,’ ma en Yesu Kristo ochako locho. (Eze. 37:24) Yesu nochako locho e higa mar 1914. Chop kindeno, noyudo Israel mar roho ma gin Jokristo mowal nosekawo kar Israel masie kendo ne gisebedo oganda Nyasaye kuom kinde malach. (Som Mathayo 21:43; 1 Petro 2:9.) Kata kamano, Jehova ne ok owilo Israel masie kod Israel mar roho kende, to nowilo nyaka piny Israel masie gi paradiso mar ranyisi. (Isa. 66:8) Mana kaka ne waneno e Sula mar 17, paradisowa mar ranyisi en kama okuwe, mopong’ gi chiemb chuny, kendo kama Jokristo mowal modong’ e piny lamoe Jehova chakre higa mar 1919. (Ne sanduk mar 9B ma wiye wacho ni, “Tuech Norumo e Higa mar 1919”) Kaka kinde ne medo kalo, joma nigi geno mar dak e piny ma gin “rombe mamoko,” bende nochako dak e paradiso mar ranyisi. (Joh. 10:16) Kata obedo ni paradiso mar ranyisi dhi nyime bedo maber kendo medo yarore e kindewagi, wabiro yudo gueth mogundho mana bang’ Har–Magedon.

Kaka ne Idhi Pog Lowo

9. Gin weche mage ma Jehova nolero adimba e wi kaka ne idhi pog lowo?

⁹ Som Ezekiel 48:1, 28. Bang’ ka noseket kiewo mag lobno, Jehova nolero kaka koro ne idhi pog lobno. Ne ochiko adimba kaka ne idhi pog lowo ne dhoudi 12 mag Israel, koa yo nyandwat nyaka milambo. Dhood Dan e ma nochak pog lowo ma ne ni yo nyandwat kae to ne otiek gi dhood Gad ma ne ni yo milambo. Moro ka moro kuom lopego ne nigi tong’ kata kiewo ma ne chakore yo wuok chieng’ nyaka Nam Maduong’ kata Nam Mediterania ma ne ni yo podho chieng’.​—Eze. 47:20.

10. En jip mane ma fwenyni nomiyo joma ne nie tuech?

¹⁰ En jip mane ma fwenyni nomiyo joma ne nie tuech? Yo ma Ezekiel nolerogo kaka ne idhi pog lowo nomiyo joma noter e tuech obedo gadier ni tij pogo lowo ne dhi timore e yo mochanore. E wi mano, yo ma ne ipogogo lobno e kind dhoudi 12 ne nyiso gadier ni ji duto ma ne dhi dok thurgi ne dhi yudo lowo. Onge ng’at ang’ata ma ne dhi bedo ma onge lowo kata kama nonyalo dakie.

11. Gin puonj mage ma wanyalo yudo e fweny ma ne wuoyo e wi wach pogo lowo? (Ne sanduk ma wiye wacho ni “Pogo Lowo.”)

¹¹ E kindewagi, gin puonj mage ma wanyalo yudo e fwenyno? Piny Manosingi ne nigi lowo moromo jodolo, Jo-Lawi, jodongo ma rito piny, kod jomamoko duto ma ne wuok e dhoudi 12 mag Israel. (Eze. 45:4, 5, 7, 8) E yo ma kamano bende, paradisowa mar ranyisi nigi thuolo moromo Jokristo mowal modong’ e piny, joma tayowa, kod ji duto manie ‘oganda mang’ongo’.a (Fwe. 7:9) Kata bed ni wan-gi migawo matin ma romo nade e riwruok mar oganda Jehova, wanyalo bedo gadier ni nitie kama duong’ ma wamako e paradisowa mar ranyisi. Mano kaka wachno jiwowa ndi!

Pogruok Ariyo Madongo Mantie e Fwenyno Mulowa e Yo Mane?

12, 13. Gin weche mage sie ma Jehova nowacho e wi wach pogo lowo?

¹² Moko kuom weche ma Jehova nowacho e wi kaka onego opog lowo nomako dho Ezekiel nikech ne gipogore gi ma ne Nyasaye omiyo Musa. We wane ane ariyo kuomgi. Achiel wuoyo e wi lowo, to machielo wuoyo e wi joma nodak e lobno.

¹³ Mokwongo, lowo. Nochik Musa ni opog lowo maduong’ ne dhoudi madongo, to lowo matin ne dhoudi matindo. (Kwan 26:52-54) Kata kamano, e fweny ma ne Jehova omiyo Ezekiel, nonyise ni ng’ato ka ng’ato biro yudo “pok ma romre gi owadgi.” (Eze. 47:14) Omiyo, dhoudi 12 mag Israel ne idhi pog lowo marom, are tong’ mar nyandwat nyaka mar milambo. Jo-Israel duto ne dhi yudo gik mabeyo ma ne nyak e Piny Manosingi, bed ni ne giwuok e dhoot mane kata mane.

14. Ere kaka weche ma ne Jehova ochiko e wi jodak nopogore gi ma nochiwo e Chik Musa?

¹⁴ Mar ariyo, joma ne dhi dak e lobno. Chik Musa ne rito jodak kendo ne miyogi thuolo mar lamo Jehova, en mana ni ne ok pognegi lowo. (Lawi 19:33, 34) Kata kamano, gima Jehova nonyiso Ezekiel, nopogore gi gima ne nie Chik ma ne osemiyogi. Jehova nonyise niya: “Jopinje mamoko modak e kindu biro yudo lowo koa kuom dhoot mosebedo kodakgo.” Chikno nomiyo Jehova ogolo pogruok maduong’ ma ne nitie e kind “Jo-Israel” kod jodak. (Eze. 47:22, 23) Ji duto ma nodak e Piny Manosingi ma ne Ezekiel oneno ne ok buon e yo moro amora, to ne gilamo Nyasaye ka gin gi winjruok.​—Lawi 25:23.

15. Weche ma ne Jehova owacho e wi lowo kod joma ne dhi dak e iye konyowa fwenyo wach mane e wi Jehova?

¹⁵ Nyaka bed ni weche ma ne Ezekiel oyudo e wi lowo kod joma ne dhi dakie nojiwo ahinya joma ne nie tuech. Ne ging’eyo ni Jehova ne dhi miyogi lowo bed ni ne gin Jo-Israel kata jodak ma ne lamo Jehova. (Ezra 8:20; Neh. 3:26; 7:6, 25; Isa. 56:3, 8) Wechego nomiyo gibedo gadier gi wach moro makende, ni Jehova ogeno jotichne duto. (Som Hagai 2:7.) E kindegi, waduto wageno adierano, bed ni wan gi geno mar dak e polo kata e piny.

16, 17. (a) Gin ber mage ma wayudo sama wanono weche motudore gi lowo kod joma odak e iye? (b) Ang’o ma wabiro nono e sula ma luwo?

¹⁶ Gin ber mage ma wayudo sama wanono weche motudore gi lowo kod joma odak e iye? Iparonwa ni e riwruok mar oganda Jehova, ji onego obed ma romre kendo gibed gi kuwe kod winjruok. Jehova ok buon ji. Onego wapenjre niya: ‘Be aluwo ranyisi mar Jehova mar bedo ng’at ma ok buon ji? Be achiwo luor ne Jokristo wetena ma ok ang’iyo ni giwuok e oganda mane kata gidak nade?’ (Rumi 12:10) Wamor ahinya ni Jehova omiyowa thuolo marom e paradiso mar ranyisi kama wanyalo tiyone gi chunywa duto kendo yudo gueth momiyowa.​—Gal. 3:26-29; Fwe. 7:9.

¹⁷ We koro wanon ane wach mar ang’wen mantie e fweny mogik ma nomi Ezekiel ma wuoyo e wi kaka Jehova ne dhi bedo gi joge ma ne nie tuech. Gin puonj mage ma wanyalo yudo e singono? Wabiro yudo dwoko e sula ma luwo.

1, 2. (a) En lowo mane ma nonego oket tenge? (Ne picha manie nyim buk.) (b) Fwenyno nokonyo joma ne nie tuech mondo gibed gadier gi wach mane?

E FWENY mogik ma ne omi Ezekiel, nonyise lowo moro ma nonego oket tenge mondo otigo e yo moro makende. Lowo ma noket tengeno ne ok omi dhoot moro amora mar Israel, to nowale ne Jehova. Ezekiel bende neno dala moro ma nigi nying makende. Fwenyni konyo joma nie tuech mondo gibed gadier gi wach moro maduong’, ma en ni Jehova biro bedo kodgi ka gidok thurgi.

² Ezekiel leronwa e yo matut kaka lowo mowalno ne chalo. We wanon ane wechego nikech jotich Jehova nyalo puonjore weche mang’eny kuomgi.

‘Lowo Maler Kaachiel gi Dala’

3. Lowo ma ne oket tenge ne Jehova ne opog e kidienje abich mage, to ang’o ma ne itimo kuondego? (Ne sanduk ma wiye wacho ni “Lowo Mowal ne Nyasaye.”)

³ Lowo malerno ne en bede 25,000 (kata kilomita 13) koa yo nyandwat nyaka milambo kendo bede 25,000 koa yo wuok chieng’ nyaka podho chieng’. Lobno duto niluongo ni “ka ma ochiw ne Nyasaye.” Lobno nopog didek. Lowo ma malo ne en mar Jo-Lawi kae to ma diere noket tenge ne jodolo kod hekalu. Kuonde ariyogo e ma niluongo ni ‘lowo maler.’ Lowo ma mwalo kata “lowo modong’” ne en mar “jo ma odak e dala maduong’.”​—Eze. 48:15, 20.

4. Lowo ma noket tenge ne Jehova nyalo puonjowa ang’o?

⁴ Lowo ma nowal ne Jehova nyalo puonjowa ang’o? Ka ne okwong oket tenge lowo ma nowal ne Jehova kae to bang’e oket tenge lowo ma nopog ne dhoudi, Jehova nonyiso ayanga ni lowo ma noket tenge ne weche mag lamo ne en gima duong’ ahinya. (Eze. 45:1) Onge kiawa ni joma ne nie tuech nopuonjre gik mang’eny e yo ma nopoggo lowo. Lamo Jehova e gima nonego obed motelo e ngimagi. E kindewagi bende, waketo motelo weche motudore gi lamo, kaka puonjruok Wach Nyasaye, dhi e chokruoge mag Jokristo, kod dhi e tij lendo. Ranyisi mar Jehova konyowa ng’eyo ni onego waket gik motudore gi lamo e ma obed mokwongo e ngimawa.

“Dala Maduong’ Nobed e Diere”

5, 6. (a) Dala ne en mar ng’a? (b) Dalano ne ok ochung’ ne ang’o, to ang’o momiyo wawacho kamano?

⁵ Som Ezekiel 48:15. Gima duong’ ma nomiyo oket “dala” kod alworane ne en ang’o? (Eze. 48:16-18) Jehova nosenyiso Ezekiel e fweny niya: “Enobed dala maduong’ ne Jo-Israel duto.” (Eze. 45:6, 7) Omiyo, dalano kaachiel gi lowo ma ne olwore ne ok en ‘lowo maler’ ma ne onego ‘ochiw ne Jehova.’ (Eze. 48:9) Ka wan-gi wachno e paro, we wanon ane gima wanyalo puonjore e chenro mar bedo gi dala.

⁶ Ka pok wanono puonj ma wanyalo yudo e chenro mar bedo gi dala, nyaka wakwong wang’e gima dalano ok ochung’ne. Dalano ok en Jerusalem ma ne oger kendo kaachiel gi hekalune. Ang’o momiyo wawacho kamano? En nikech dala ma ne Ezekiel oneno e fweny ne onge gi hekalu. Bende, dalano ne ok ochung’ ne taonde ma ne nie piny Israel. Nikech ang’o? En nikech joma ne oa e tuech kata nyikwagi ne ok ogero dala moro amora ma chal gi ma ne Ezekiel oneno e fweny. E wi mano, dalano ne ok nie polo. Ang’o momiyo wawacho kamano? En nikech dalano noger “kuonde mamoko” mopogore gi kuonde ma ne oket tenge ne lamo madier.​—Eze. 42:20.

7. Dala ma ne Ezekiel oneno en mane to nenore ni ochung’ ne ang’o? (Ne picha manie chak sulani.)

⁷ To kare dala ma ne Ezekiel oneno ochung’ ne ang’o? Par ni noneno dalano e fweny achiel achiel ma nonenoe lowo mipogo. (Eze. 40:2; 45:1, 6) Wach Nyasaye nyisowa ni lowo ma nipogono ne en mar ranyisi, omiyo dalano bende en dala mar ranyisi. E yo machuok, dalano en ang’o? Wach motigo ni “dala” kelo paro moro mar joma odak kanyachiel e yo mochanore. Omiyo, dala ma ne Ezekiel oneno ma borne gi lachne ne romre, nyalo bedo ni ochung’ ne chenro mar telo mochanore maber.

8. Chenro mar telo itiyogo kanye, to ang’o momiyo wawacho kamano?

⁸ Chenro mar telono itiyogo kanye? Fweny ma ne Ezekiel oneno nyisowa ni dalano nie paradiso mar ranyisi. Omiyo, e kindegi chenrono tiyo e kind jotich Nyasaye. Bedo ni dalano noger kuonde mamoko mopogore gi kuonde ma ne oket tenge ne lamo maler nyiso ang’o? Oparonwa ni dalano ok nie polo to en chenro mar telo manie piny ma konyo ji duto manie paradiso mar ranyisi.

9. (a) Gin jomage ma tayo chenro mar telo manie piny? (b) Yesu biro timo ang’o e kinde Loch mar Higni Aluf Achiel?

⁹ Gin jomage ma tayo chenro mar telo manie piny? E fweny ma Ezekiel noneno, ng’at ma ne tayo chenrono e dala niluongo “jaduong’ ma rito piny.” (Eze. 45:7) Notiyo kaka jarit kendo ne ok en jadolo kata Ja-Lawi. Jaduong’no paronwa jodong-kanyakla ma kindegi ma ok gin Jokristo mowal. Jokwath ma dewowago wuok e “rombe mamoko” kendo gibolore ne loch mar Kristo manie polo. (Joh. 10:16) E kinde Loch mar Higni Aluf Achiel, Yesu biro yiero jodongo kata “jotelo” mowinjore “e piny.” (Zab. 45:16) Kitayogi gi loch mar Kristo manie polo, jodongogo biro rito jotich Nyasaye e kinde higni aluf achielgo.

“Jehova ni Kanyo”

10. Dala ma ne Ezekiel oneno iluongo nade, to mano miyo wabedo gadier gi wach mane?

¹⁰ Som Ezekiel 48:35. Nying dalano ne en “Jehova ni Kanyo.” Nyingno miyo wabedo gadier ni Jehova nie dalano. Ka ne Jehova onyiso Ezekiel kama dalano ne nitie, ne chal ka gima onyiso joma ne odhi e tuechgo niya: ‘Abiro bedo kodu kendo!’ To mano kaka wachno nojiwogi!

11. Gin puonj mage ma wanyalo yudo e fweny ma Ezekiel ne oneno e wi dala kod tiend nying dalano?

¹¹ Gin puonj mage ma wanyalo yudo e fweny ma Ezekiel ne onenono? Nying dalano paronwa ni Jehova ni kodwa sani, kendo obiro bedo kodwa kinde duto. Nying dalano jiwonwa adiera makendeni: Ni dalano chopo chenro mag Nyasaye to ok ni okete kanyo mondo omi dhano moro amora duong’. Kuom ranyisi, Jehova ok omiyo jotelo mag dalano ratiro mar pogo lowo, kata obedo ni dhano to nyalo neno ni mano en tich mowinjore gi jotelogo. Kar mano, Jehova dwaro ni jotelogo ochiw luor ne migepe kod lope mosemiyo jotichne moriwo nyaka ‘jochan.’​—Nge. 19:17; Eze. 46:18; 48:29.

12. (a) En ang’o makende ma yudore e dalano, to wachno puonjowa ang’o? (b) Fwenyno paro ne jodong-kanyakla wach mane maduong’?

¹² En ang’o machielo makende ma ne yudore e dala ma niluongo ni “Jehova ni Kanyo”? Kata obedo ni taonde machon ne nigi ohinga kod rangeye manok, dalani to ne nigi rangeye 12! (Eze. 48:30-34) Rangeye mang’enygo (moro ka moro kuom ohinga ne nigi rangeye adek) ne nyiso ni jotelo manie dalano ne gin joma chopo irgi yot kendo jotich Nyasaye duto ne nyalo dhi irgi. E wi mano, bedo ni dalano ne nigi rangeye 12 nyiso ni ng’ato ang’ata ne nyalo donjo e dalano nikech ne en “dala maduong’ ne Jo-Israel duto.” (Eze. 45:6) Rangeye 12 mag dalano parone jodong-kanyakla wach moro maduong’. Jehova dwaro ni gibed joma chopo irgi yot kendo moikore konyo ji duto manie paradiso mar ranyisi.

Jotich Nyasaye Donjo Mondo Gilam Nyasaye Kendo Giti e Dalano

13. Jehova nowacho ang’o e wi migepe mopogore opogore ma ji ne dhi timo?

¹³ We wadog ane chien e kinde Ezekiel mondo wane weche momedore ma ne ondiko e wi fweny mar pogo lowo. Jehova wuoyo e wi joma timo migepe mopogore opogore. “Jodolo ma dhi e nyim Jehova” ne chiwo misengni kendo tiyone. “Jo-Lawi ma tiyo e hekalu” nonego ‘orit hekalu kendo gitim tije mamoko monego otim kuno.’ (Eze. 44:14-16; 45:4, 5) E wi mano, jotich ma ne ni machiegni gi dalano nonego oti gi kinda. Ne gin jotich mage?

14. Jotich ma ne tiyo machiegni gi dala paronwa ang’o?

¹⁴ Jotich ma ne tiyo machiegni gi dalano ne gin “Jo-Israel duto.” Nitie migawo ma ne gimako. Tijgi ne en puro mondo ‘jo ma tiyo e dalano ocham gik monyak kanyo.’ (Eze. 48:18, 19) Be chenrono paronwa thuolo moro ma wan-go e kindewagi? Ee. E kindegi, ji duto manie paradiso mar ranyisi nigi thuolo mar riwo lwedo Jokristo mowal kod owete manie ‘oganda mang’ongo’ ma Jehova oseyiero mondo otawa. (Fwe. 7:9, 10) Yo maduong’ ma wanyalo nyisogo ni waluwo chenrono en kuom riwo lwedo jatich mogen kendo mariek.

15, 16. (a) Ang’o kendo ma yudore e fweny ma ne Ezekiel oneno? (b) Wan gi thuolo mar timo tije mage ma chalo gi ma ne Ezekiel oneno e fweny?

¹⁵ Fweny ma ne Ezekiel oneno bende nigi wach moro ma mulo tijwa mar lendo. En wach mane? Jehova nowacho ni dhoudi 12 ma ok gin Jo-Lawi ne dhi tiyo kuonde moko ariyo: e laru mar hekalu kod kuonde kwath mag dalano. Ne gidhi timo ang’o kuondego? E laru mar hekalu, dhoudi duto ‘biro e nyim Jehova’ mondo gichiwne misengni. (Eze. 46:9, 24) To komachielo, ji duto ma wuok e dhoudigo ne dhi riwo lwedo dalano kuom puro puothene. En ang’o ma wanyalo puonjore kuom jotich ma jokindago?

¹⁶ E kindewagi, oganda mang’ongo nigi thuolo mar timo tije ma chalo gi ma ne ji timo e fweny ma ne Ezekiel oneno. Gilamo Jehova “e hekalu mare” kuom chiwo misengni mag pak. (Fwe. 7:9-15) Gitimo kamano kuom dhi e tij lendo kendo kuom chiwo paro e chokruoge mag Jokristo. Gineno yorego kaka ting’ maduong’ ma gin-go nikech mano en yo ma gilamogo Nyasaye achiel kachiel. (1 We. 16:29) E wi mano, jotich Nyasaye mathoth riwo lwedo riwruok mar oganda Nyasaye e yore mang’eny. Kuom ranyisi, gikonyo e gero kendo rito Ute Romo kod bad ofise kendo gikonyo e timo tije moko mang’eny mitimo gi riwruok mar oganda Jehova. Jomoko riwo lwedo tijego kokalo kuom chiwo mag pesa ma gigolo. Gichalo joma puro puothe mag dala e yor ranyisi ka gitimo kamano “ne duong’ mar Nyasaye.” (1 Kor. 10:31) Gitiyo tijgi gi kinda kendo ka gimor nikech ging’eyo ni Jehova “mor ahinya gi misengni ma kamago.” (Hib. 13:16) Be itiyo gi thuolo kaka mago e yo maber?

“Warito Polo Manyien gi Piny Manyien”

17. (a) En ang’o ma ne Ezekiel oneno e fweny ma wabiro neno ka timore e okang’ malach e kinde ma biro? (b) E kinde Loch Kristo mar Higni Aluf Achiel, gin jomage ma biro yudo ber koseyier joma tayowa?

¹⁷ E kinde ma biro, be wabiro neno ka fweny ma Ezekiel noneno e wi pogo lowo chopo e okang’ malach? Ee! Par ane wachni: Ezekiel noneno ka lowo maler ma nonego ochiw ne jodolo ne nie dier dalano. (Eze. 48:10) E yo ma kamano bende, bang’ Har–Magedon Jehova biro bedo kodwa kata bed ni wadak kanye. (Fwe. 21:3) E kinde Loch Kristo mar Higni Aluf Achiel, chenro mar telo ma biro betie, tiende ni joma ibiro yier mondo orit jotich Nyasaye e piny, biro tayo ji duto ma biro dak e “piny manyien,” e yor hera.​—2 Pet. 3:13.

18. (a) Ang’o momiyo wanyalo bedo gadier ni jotelo ma ibiro yier biro riwo lwedo pinyruodh Nyasaye? (b) Nying dalano konyowa bedo gadier gi wach mane?

¹⁸ Ang’o momiyo wanyalo bedo gadier ni chenrono biro riwo lwedo loch mar Nyasaye? En nikech Wach Nyasaye nyisowa maler ni dala manie piny ma nigi rangeye 12 chal gi Jerusalem manyien manie polo ma bende nigi rangeye 12, moting’o ji 144,000 ma biro locho gi Kristo. (Fwe. 21:2, 12, 21-27) Mano nyiso ni jotelo manie piny biro riwo lwedo gik moko duto ma Pinyruodh Nyasaye manie polo biro chikogi ni gitim. Ee, nying dalano ma en “Jehova ni Kanyo,” konyowa bedo gadier ni lamo madier biro siko ka medore nyaka chieng’ e Paradiso. To mano kaka kinde maber oritowa nyime kae!