SULA MAR 34
Ere Kaka Wanyalo Nyiso ni Wahero Jehova?
Be sani ihero Nyasaye moloyo kinde ma nichako puonjori Muma? Be diher medo tego osiep manie kindi kode? Ka en kamano, bed gadier ni Jehova neno kaka imedo here, kendo en bende obiro medo heri kendo riti. Inyalo nyiso nade ni ihere?
1. Wanyalo nyiso nade ni wahero Jehova?
Wanyiso ni wahero Jehova ka waluwo chikene. (Som 1 Johana 5:3.) Ok ochunwa timo kamano. Kar mano, omiyowa thuolo mar yiero ka be wabiro luwo chikene kata ooyo. Nikech ang’o? Jehova dwaro ni waluw chikene ‘koa e chunywa.’ (Jo-Rumi 6:17) Mano tiende ni Jehova dwaro ni waluw chikene nikech wahere, to ok nikech ochunowa timo kamano. Kare mar 3 gi mar 4 mar bugni biro konyi ng’eyo kaka inyalo nyiso ni ihero Jehova kuom timo gik ma more kendo sin gi gik mosin-go.
2. Ang’o momiyo nyalo bedonwa matek nyiso ni wahero Jehova?
“Ng’at makare yudo chandruoge mang’eny.” (Zaburi 34:19) Waduto wanyagore gi nyawo ma wan-go. Bende, wanyalo bedo gi pek mag yuto, inyalo timnwa gik ma ok kare, kendo wanyalo yudo chandruoge mamoko. Sama wayudo chandruoge, nyalo bedonwa matek timo gik ma Jehova dwaro ni watim. Mano en nikech timo gik makare ok yotga. Kata kamano, sama itimo gik ma Jehova dwaro ni itim, inyiso ni ihere moloyo gimoro amora. E wi mano, inyiso ni imakori kode motegno. En bende obiro makore kodi motegno. Ok obi jwang’i.—Som Zaburi 4:3.
TIM NONRO
Non gimomiyo Jehova bedo mamor sama iluwo chikene, kod gima nyalo konyi siko kimakori kode.
3. Wach moro maduong’ momaki
Kaluwore gi bug Ayub, Satan nohango ne Ayub wach moro. Wachno ne ok omako Ayub kende, to omako nyaka dhano duto ma dwaro tiyo ne Jehova. Som Ayub 1:1, 6–2:10, kae to uwuo e wi penjo ma luwogi:
Satan nowacho ni Ayub luwo chike Jehova nikech ang’o?—Ne Ayub 1:9-11.
En ang’o ma Satan wacho e wi dhano duto te moriwo nyaka in?—Ne Ayub 2:4.
Som Ayub 27:5b, kae to uwuo e wi penjo ma luwoni:
Ayub nonyiso nade ni ohero Jehova gi chunye duto?
Ayub nonyiso ni ohero Jehova kuom siko komakore kode
Wanyiso ni wahero Jehova ka wadhi nyime makore kode
4. Tim gik ma moro chuny Jehova
Som Ngeche 27:11, kae to uwuo e wi penjo ma luwogi:
Jehova winjo nade sama ibedo mariek kendo iluwo chikene? Ang’o momiyo iwacho kamano?
5. Inyalo makori gi Jehova
Hera ma waherogo Jehova jiwowa mondo walend ne jomoko. Ka wadhi nyime makore kode motegno, wabiro dhi nyime lendo kata e kinde ma ok yot timo kamano. Tug VIDIO, kae to uwuo e wi penjo ma luwogi:
Be iyudoga ka tekni wuoyo gi jomoko e wi Jehova?
Ang’o ma nokonyo Grayson mondo olo luoro ma ne en-go?
Yot ahinya mondo wamakre gi Jehova sama wahero gik mohero kendo wasin gi gik mosin-go. Som Zaburi 97:10, kae to uwuo e wi penjo ma luwogi:
Kaluwore gi gik ma isepuonjori, gin gik mage ma Jehova ohero? To gin gik mage ma osin-go?
Ang’o ma nyalo konyi hero gik mabeyo kendo sin gi gik maricho?
6. Wayudo ber sama waluwo chike Jehova
Luwo chike Jehova konyowaga kinde duto. Som Isaya 48:17, 18, kae to uwuo e wi penjo ma luwogi:
Be iparo ni kinde duto Jehova ong’eyo gik ma kelonwa ber? Ang’o momiyo iwacho kamano?
Ere kaka gik ma isepuonjori e Muma kod gik miseng’eyo e wi Jehova osekonyi?
PARO MA JOMOKO NIGO: “Ok anyal moro Nyasaye kata atim mana ang’o.”
En ndiko mane minyalo somo ne ng’ato mondo inyise ni gik motimo nyalo moro Jehova kata chwanye?
PUONJ MADUONG’
Wanyalo nyiso ni wahero Jehova ka waluwo chikene kendo makore kode kata e kinde ma timo kamano ok yot.
Ang’o ma ipuonjori?
Ranyisi mar Ayub opuonji ang’o?
Ibiro nyiso nade ni ihero Jehova?
Ang’o ma biro konyi mondo isik kimakori gi Jehova?
MED TIMO NONRO
Ne ane kaka inyalo makori motegno gi Jehova kod kanyakla.
Non weche momedore e wi miriambo ma Satan wacho e wi dhano.
“Ayub Norito Timne Matir” (Muma Oting’o Ote Mane? kare mar 6)
Non ane kaka rowere bende nyalo nyiso ni gihero Jehova.
Ere kaka rawera ma yudo akwede koa kuom mbesene nyalo makore motegno gi Nyasaye?