SULA MAR 40
Ere Kaka Wanyalo Bedo Maler e Wang’ Nyasaye?
Par ane miyo moro ma iko wuode matin mondo odhi e skul. Oneno ni wuodeno olwokore kendo ni orwako lewni maler. Mano miyo wuodeno bedo gi ngima maber kendo jomamoko bende neno ni jonyuolne orite maber. Mana kaka janyuol diher ni nyathine obed maler, e kaka Jehova bende dwaro ni wabed maler e pachwa, timbewa, dendwa, kod wechewa. Bedo maler konyowa wawegi kendo Jehova bende yudo duong’.
1. Wanyalo nyiso nade ni wan joma ler?
Jehova nyisowa niya: “Nyaka ubed jo maler.” (1 Petro 1:16) Mano nyiso ni nyaka wabed maler e timbewa kod e yore mamoko mag ngimawa. Wanyalo rito ler mar dendwa ka walwokore kendo rwako lewni maler. Bende, onego wane ni utewa kod gik ma watiyogo e wuoth kaka mtokni osiko ka ler. E wi mano, wanyalo rito Kingdom Hall mondo obed maler. Sama wabedo maler e yorego, wamiyo Jehova duong’.—2 Jo-Korintho 6:3, 4.
2. Gin timbe mage ma nyaka wawerego mondo wabed maler?
Muma jiwowa ni ‘wapwodhre kuom gik moko duto ma chido ringruok kod paro.’ (2 Jo-Korintho 7:1) Mano nyiso ni onego wawere gi gimoro amora ma nyalo chido dendwa kata pachwa. Gik ma waparo onego omor Jehova, omiyo onego watim duto ma wanyalo mondo wakwed paro maricho. (Zaburi 104:34) Bende, watemo mondo wechewa obed maler.—Som Jo-Kolosai 3:8.
Ang’o kendo ma dwarore mondo wasik ka waler? Nitie gik mamoko ma bende nyalo chido dendwa. Gigo oriwo ndawa, miraa, yedhe ma mero ji, yedhe ma ogo marfuk, kod tiyo gi yedhe e yo ma ok owinjore. Omiyo, onego wawere gi gik ma kamago. Sama wawere kodgi, wabedo gi ngima maber kendo wanyiso ni wamiyo ngima luor. Bende, watemo mondo wabed maler ka wakwedo timbe mochido kaka tugo gi duong’wa e tieko gombo mag nindruok kod neno ponografi. (Zaburi 119:37; Jo-Efeso 5:5) Weyo timbegi nyalo bedo matek, kata kamano, Jehova nyalo konyowa weyogi.—Som Isaya 41:13.
TIM NONRO
Non ane kaka bedo maler miyo Jehova duong’ kod kaka wanyalo weyo timbe mochido.
3. Rito dendwa mondo obed maler miyo Jehova duong’
Wanyalo ng’eyo kaka Jehova neno wach ler ka wanono chike ma nomiyo Jo-Israel. Som Wuok 19:10 kod 30:17-19, kae to uwuo e wi penjo ma luwogi:
Kaluwore gi ndikogo, Jehova neno nade wach rito ler mar dendwa?
Gin ang’o ma onego itim kinde duto mondo isik ka iler?
Nyaka wakaw thuolowa kendo watim kinda mondo wabed maler. Mano nyalore bed ni wamewo, wadhier, kata wadak kanye. Tug VIDIO, kae to uwuo e wi penjo ma luwo.
Ere kaka rito gigewa ka ler nyalo miyo joma walendonegi omi Jehova duong’?
4. Weri gi timbe mochido
Jehova nyalo konyowa mi wawere gi tim moro amora marach
Ka imadhoga ndawa kata itiyoga gi yedhe mamero ji, inyalo ng’eyo kaka weyogi nyalo bedo matek ahinya. Ang’o ma nyalo konyi weyogi? Tem paro kaka tim marachno ketho ngimani. Som Mathayo 22:37-39, kae to uwuo e wi kaka madho ndawa kata tiyo marach gi yedhe nyalo . . .
ketho winjruok ma ng’ato nigo gi Jehova.
ketho winjruok ma ng’ato nigo gi joode kod joma ni machiegni kode.
Los chenro ma nyalo konyi weyo tim moro mochido.a Tug VIDIO.
Som Jo-Filipi 4:13, kae to uwuo e wi penjo ma luwoni:
Ere kaka lemo, puonjruok Muma, kod dhi e chokruoge ma ok wabare nyalo miyowa teko mar loyo timbe mochido?
5. Kwed paro kod timbe ma ok ler
Som Jo-Kolosai 3:5, kae to uwuo e wi penjo ma luwogi:
Ere kaka wang’eyo ni neno ponografi, oro ote, piche, kata vidio mochido ne ng’ato, kod tugo gi duong’ni e tieko gombo mag nindruok gin timbe mochido e wang’ Jehova?
Be bedo ni Jehova dwaro ni wabed gi timbe maler en gima kare? Ang’o momiyo iwacho kamano?
Non ane kaka inyalo kwedo paro mochido. Tug VIDIO.
Yesu notiyo gi ranyisi ma nyiso ni nyaka watim duto ma wanyalo mondo timbewa osik ka ler. Som Mathayo 5:29, 30, kae to uwuo e wi penjo ma luwoni:
Yesu ne ok wach ni watim gik miwuoye e ndikono aching’, kar mano notemo wacho ni nyaka wakaw okang’. En okang’ mane ma ng’ato nyalo kawo mondo kik obed gi paro mochido?b
Jehova mor ahinya gi kinda mitimo sama ikedo mondo ilo paro mochido. Som Zaburi 103:13, 14, kae to uwuo e wi penjo ma luwoni:
Ka po ni itemo matek mondo iweri gi tim moro mochido, ere kaka ndikono nyalo konyi mondo idhi nyime kedo matek?
Lwar piny ok e giko ng’wech
Ka watemo timo gimoro to otamowa, yot ahinya mondo chunywa ojog ma wawere kode. Kata kamano, par ane wachni: Sama jang’wech ochwanyore mi olwar piny, mano ok nyis ni ok obi tieko ng’wejno, kata ni koro onego ochak ng’wejno gie tiende. E yo ma kamano bende, sama idok e tim moro mochido misebedo ka inyagorigo, mano ok nyis ni ok inyal weyo timno chuth. Bende, mano ok nyis ni kinda ma isetimo e kedo gi timno odhi kayiem nono. Sama idok e tim moro marach misebedo ka ikedogo, mano ok e giko ng’wech; ikier akiera. Kik chunyi ol! Jehova biro konyi mondo ilo tim marachno.
PARO MA JOMOKO NIGO: “Ang’iyo gi timni ma ok anyal weyo.”
En ndiko mane ma inyalo somo ne ng’ato mondo inyisego ni Jehova nyalo konye loyo tim moro mochido?
PUONJ MADUONG’
Wamoro Jehova sama warito dendwa, pachwa, kod timbewa mondo obed maler.
Ang’o ma ipuonjori?
Ang’o momiyo dwarore ahinya ni wabed maler?
Gin gik mage ma wanyalo timo e ngimawa mondo wanyis ni wan joma ler?
Ere kaka wanyalo rito pachwa kod timbewa mondo osik ka ler?
MED TIMO NONRO
Gin ang’o minyalo timo mondo ibed maler kata ka yutoni ni piny?
Ne ane gik ma inyalo timo mondo iwe madho ndawa.
Non ane kaka ng’iyo ponografi nyalo hinyi.
“Ponografi Nyalo Hinyi e Yore Mage?” (Ohinga mar Jarito, Agost 1, 2013)
Ne ane gik ma nokonyo dichwo moro mondo owe ng’iyo ponografi.
“Ne Asiko Apodho, To Gikone ne Achung’” (Ohinga mar Jarito Na. 4 2016)
a Wich ma wacho ni “Kaka Inyalo Weyo Madho Ndawa” ma yudore e kare mar “Med Timo Nonro” e sulani, nyisowa gik ma wanyalo timo mondo wawere gi tim moro marach ma waseng’iyogo.
b Mondo ing’e kaka inyalo loyo tim mar tugo gi duong’ni e tieko gombo mag nindruok, som sula ma wiye wacho ni “Ere Kaka Anyalo Weyo Tim mar Tugo gi Duong’na e Tieko Gombo mag Nindruok?” ma yudore e bug Penjo ma Rowere Ohero Penjore—Dwoko Makonyo, Buk Mokwongo, sula mar 25.