Nying’ Nyasaye Yudore e Udi Manie Hoho
ST. MORITZ. Be ing’eyo kama iluongo gi nying’no? Nyalo bedo ni ing’eyo kanyo nimar ong’ere ahinya kaka kama ji ohero dhiye e yueyo mar rusa, kendo oyudore kama iluongo ni Engadine Valley e piny Switzerland. Kata kamano, St. Moritz en mana achiel kuom kuonde mabeyo mosebedo kaywayo ji kama maber ahinyani e hoho manie kind gode mopong’ gi baraf, e piny Switzerland machiegni gi tong’ mopogo pinyno gi piny Italy. Bende kanyo oting’o kar dak mar le mag bungu mong’ere kaka Swiss National Park, ma en kama ber miwuoro moting’o yien gi le ma kitgi opogore opogore, makelo pak ne Jachwechwa Maduong’, Jehova. (Zab. 148:7-10) Gimachielo mayudore, en gik manyiso kit ngima mar joma ne odak kanyo e kind higini mag 1600.
Yo ma ogergo udi mang’eny mayudore e hohono nyalo mori ahinya neno. Yot yudo ka nying’ Nyasaye ondiki e nyim ot, kaka e wi dhoot. E higini miche mosekalo, ji nohero bero oko mar utegi ka gindiko weche e kor udi, kendo payo weche e kor ot, kata payogi e kite. Kae inyalo neno picha mar ot e gweng’ mar Bever. Loko mar weche mondiki e odno en ni: “E higa mar 1715. Jehova e chakruok, kendo Jehova e giko. Gik moko duto nigi Nyasaye, kendo onge gima onge kode.” Ee, weche ma ne ondik chon-go oting’o nying’ Nyasaye nyadiriyo.
Bende inyalo neno weche moko ma ne ondiki chon moloyo mago, e gweng’ mar Madulain. Wechego wacho kama: “Zaburi 127. Ka Jehova ok ogero ot, tich matek mar jogedo en kanono. Lucius Rumedius. E higa mar 1654.”
Ang’o momiyo nying’ Nyasaye yudore e lela kamano e hohoni? Chon e ndalo ma jomoko ne obalo gi din mar Katholik ma gichako Protestant, Muma ne ogo e dho Romansh, ma en dhok motudore gi dho Latin ma ne itiyogo e Engadine. Kuom adier, en e buk ma ne okwong loko e dhokno. Kokalo kuom gima ne gisomo ei Wach Nyasaye, ji mang’eny ma ne odak kanyo ne ok ndik mana nyingegi giwegi kende oko mar utegi, to bende ne gindiko weche ma gigolo ei Muma, kendo wechego noting’o nying’ Nyasaye.
Ee, nyaka chil kawuono, wechego podi lando nying’ Jehova kendo pake, to mano en bang’ higini mang’eny nyaka ne ndik wechego. Welo kaachiel gi jokanyo ihinyo gwel mondo gipuonjre weche momedore kuom Jehova Nyasaye kokalo kuom dhi e ot machielo man kanyo moting’o nyinge—Od Romo mar Joneno mag Jehova man Bever.
[Picha En mar manie ite mar 7]
© Stähli Rolf A/age fotostock