“En Nyasach . . . Jogo Mangima”

Be tho nigi teko moloyo Nyasaye? Ooyo ngang’! Ere kaka tho kata “jasigu” moro amora dibed gi teko maloyo ‘Nyasaye Manyalo Duto’? (1 Jo Korintho 15:26; Wuok 6:3) Nyasaye nigi teko mar gonyo ji e twech mar tho kokalo kuom chier, kendo osingo ni notim kamano e piny manyien.a Ang’o momiyo wanyalo geno singono? Nikech dwoko ma Yesu Wuod Nyasaye chiwo miyowa geno.​—Som Mathayo 22:31, 32.

Kowuoyo gi jo Saddukai, ma gin joma ne ok oyie kuom chier, Yesu nowacho kama: “To kuom wach chier a kuom jo motho, pok usomo wachno ma ne Nyasaye oluwonu niya, ‘An e Nyasach Ibrahim, kendo Nyasach Isaka, kendo Nyasach Jakobo’? Nyasaye ok en Nyasach jo motho to mar jogo mangima.” E ndikoni, Yesu ne wuoyo kuom weche ma ne Nyasaye onyiso Musa e bungu ma ne liel mach chiegni higni madirom 3,500 mosekalo. (Wuok 3:​1-6) Kaluwore gi Yesu, weche ma Jehova nowacho ne Musa ni​—“An e Nyasach Ibrahim, kendo Nyasach Isaka, kendo Nyasach Jakobo”​—nyiso ni chier en singo ma nyaka chopi. E yo mane?

Ng’e ni e kinde ma Jehova nowuoyoe gi Musa, noyudo ka Ibrahim, Isaka, gi Jakobo nosetho chon​—Ibrahim kuom higni 329, Isaka kuom higni 224, to Jakobo kuom higni 197. To ema pod Jehova nowacho niya: “An e” Nyasachgi to ok ni “ne An” Nyasachgi. Jehova nowuoyo kuom jotichne adek machon-go ka gima pod ne gingima. Nikech ang’o?

Yesu nolero niya: “Nyasaye ok en Nyasach jo motho to mar jogo mangima.” Non ane tiend wechego. Kapo ni onge chier, Ibrahim, Isaka, koda Jakobo dhi siko nyaka chieng’ e twech mar tho. Ka dine en kamano, to Jehova dobedo Nyasach jomotho. Mano donyiso ni tho nigi teko moloyo Jehova kendo ni Jehova onge gi teko mar chiero jotichne mosetho.

Kare ang’o ma wanyalo wacho e wi Ibrahim, Isaka, Jakobo, koda jotich Jehova duto mosetho? Yesu nowacho adierani: “E nyim Nyasaye, ji duto ngima.” (Luka 20:38, The Bible in Luo, 1976) Kuom adier, singo mar Jehova mar chiero jotichne mosetho en singo manyaka chopi, kendo mano e momiyo Nyasaye neno ka gima jotichnego ngima. (Jo Rumi 4:⁠16, 17) Jehova biro paro jotichnego duto nyaka chop kinde moseketo mobiro chierogie.

Be imor ng’eyo ni ibiro neno jogo mihero mosetho? Ka mano mori, ng’e ni Jehova nigi teko duto mar tieko tho. Onge gima nyalo tame chopo singone mar chiero jomotho. Donge nyalo bedo maber kipuonjori weche momedore e wi chier koda e wi Nyasaye mabiro chiero ji? Timo kamano biro miyo isud machiegni gi Jehova, “Nyasach . . . jogo mangima.”