Lend gi Chir Kuonde Ohala
1. Ang’o momiyo chunywa ok onego onyosre kapo ni waneno ni lendo kuonde ohala ok yotnwa?
1 Be iwinjoga kiluor lendo kuonde ohala? Ka en kamano, kik chunyi nyosre nikech kata mana Paulo ma ne en jalendo maok oluor bende ne nyaka ‘tim chir’ eka olendi. (1 Thes. 2:2) We wanon ane moko kuom parruok ma jolendo jobedogo e wach lendo kuonde ohala to gi kaka wanyalo nyagore kodgi.
2. Ang’o momiyo ok onego wapar ni wabiro chwanyo joma tiyo kuonde ohala?
2 Dibed ni Chungo Tijgi Kuom Dakika Matin Biro Chwanyogi? Joma tiyo kuonde ohala oikore wuoyo gi ng’ato ang’ata, omiyo ok kawgi gi wuoro ka ng’ato odhi e ohandgi apoya. Kinde mang’eny gibiro wuoyo kodi maber nikech ginyalo neni kaka jal manyalo bedo jang’iewo margi. Ka irwakori maler kendo ibuonjo kodgi, gibiro miyi luor.
3. Ang’o mwanyalo timo mondo kik wachwany jong’iewo?
3 Be Biro Chuno ni Alend Kata Seche ma Jong’iewo Thoth? Ka nyalore, lend e seche ma kuondego ok odich ahinya, kaka sama oa yawgi. Rit nyaka sama maneja kata jal man kanyo ni kende eka iwuo kode. Wuo machuok ahinya.
4. Ang’o mwanyalo wacho seche ma walendo kuonde ohala?
4 Ang’o Mowinjore Awachi? Kapo ni nitie jotich mang’eny kanyo, wuo gi jatendgi. Inyalo wacho kama: “Wang’eyo ni ok yot yudo jo ohala e utegi, e momiyo alimou kar tich kae. Ang’eyo ni udich, omiyo abiro wuoyo mana machuok.” Mondo mi kik par ni wan jouso, nyalo bedo maber ka ok wawacho chenro mar chiwo mak mana ka ng’ato openjowa kaka wasiro tijwa. Kaluwore gi kit ohala ma itimo kanyo, inyalo kwayo jatelo rusa mar wuoyo gi jotich mamoko. Lendnegi kitiyo gi wich ma ne iwuoyoe gi jatendgi. Kapo ni jatich moro odich, wuo kode machuok kae to iwene trakt. Kapo ni wuoyo gi jotichgo ok nyalre, samoro inyalo yieni weyo buge kama giduto ginyalo nenogie kata kawogi.
5. Ang’o momiyo oneg walend gi chir kuonde ohala?
5 Mana kaka Yesu gi Paulo notimo, in bende inyalo lendo gi chir kuonde ohala. (Math. 4:18-21; 9:9; Tich 17:17) Kwa Jehova mondo okonyi ibed gi chuny mokuwe kod chir. (Tich 4:29) Nikech yot ahinya yudo ji kuonde ohala, donge nyalo bedo maber ka itemo ane lendo kuondego?