Yore Momedore mag Lendo e Lela

1. Jokristo mokwongo noketonwa ranyisi mane maber?

¹ Jokristo mokwongo ne lendo ot ka ot, to ok mano kende. Ne gilendo e lela bende. (Tich 20:20) Kuom ranyisi, seche moko ne gilendoga e hekalu, nikech ne ging’eyo ni ji mang’eny ne yudore kuno. (Tich 5:42) Kane jaote Paulo ni Athene, ne olendo pile e chirni. (Tich 17:17) E kindegi bende, yo maduong’ ma watiyogo e tero ne ji wach maber en lendo ot ka ot. Kata kamano, walendo bende kuonde michungoe mtokni, kuonde ohala, kuonde ma ji yueyoe, nderni ma ji ng’enyie, koda kamoro amora ma ji nyalo yudoree. Kata obedo ni ijiwo jolendo duto mondo olend e lela, wan gadier ni jolendo mang’eny biro yudo thuolo mar tiyo gi yore moko ariyo momedore mag lendo e lela.

2. En yo mane mar lendo ma nochak tem tigo chakre Novemba 2011?

² Lendo Mitimo e Yo Makende Kuonde ma Ji Ng’enyie e Taon: Mana kaka ne oler e Kitabu cha Mwaka—2013, e ite mag 16 kod 17, jolendo ne ochako temo tiyo gi yor lendo moro e dala mar New York chakre Novemba 2011. Owete ne dhi e nderni ma ji ng’enyie e taon kae to gichano buge e dhok mogwaro e mesni kata e gik midhiro (trolleys) kendo ne giketo kalatese madongo manyiso nying buge ma gichiwo. Odiechieng’ kodiechieng’ ji alufe ne kadho kuondego, moriwo nyaka joma odak e ute maok oyiene Joneno donjoe, kaachiel gi joma ok yot yudo e utegi. Ji mang’eny nohero bugewago. E dwe moro ma nyocha okalo, owetego nochiwo gasede 3,797 kod buge 7,986. Ji mang’eny ma nokadho kuondego ne okwayo mondo opuonjruok kodgi Muma kendo moko kuomgi nowacho kaka inyalo tudruok kodgi. To nikech gima duong’ ma nomiyo ochak ti gi yor lendoni en chako puonjruok Muma gi ji, owete nokowo nonro mag jogo mapiyo ne kanyakla mowinjore mondo omanygi.

3. Ere kaka idwa ti gi yorni e okang’ momedore?

³ Nikech yorni kelo nyak nyowuoyo, sani koro idwa time e okang’ momedore e piny ngima e taonde ma ji ng’enyie. Ofis ka ofis ema biro yiero taonde minyalo tiye gi yorni e pinjegi. Taondego onego obed gi stend madongo mag mtokni, kembe gi ohelni madongo, kata lendni mang’eny. Mano biro miyo joma wuotho ka dhi e dijegi obed mang’eny e nderni mag taondno. Ofis ema biro tudore gi kanyakla ma biro tiyo gi yorni kendo miyogi weche momedore. Kinde mang’eny, jopainia mapile kod makende ema ibiro tigo, kata obedo ni nitie kuonde moko ma inyalo tiye gi jopainia makonyo.

4. Lendo kuonde ma ji ng’enyie e taon itimo e yo mane?

⁴ Kaka Itime: Jopainia ma lendo e yo makendeni ritoga mondo ji ema obi kama gichanoe bugeno. Sama ng’ato ochopo irgi, ginyise ni okaw buk moro amora modwaro. Kae to ginyalo dwoko penjo moro amora ma ng’atno nyalo bedogo ka gitiyo gi Ndiko. Ka ng’atno okawo buk, jopainiago ok bi nyise wach chiwo. To ka ng’atno openjogi kama wayudoe pesa mar siro tijwa, jopainiago biro lerone ni ka doher chiwo gimoro, to onyalo oro e ofis kotiyo gi adres mowinjore kuom moket e buk mokawono. To bende, jopainiago nyalo penjo ng’atno niya: “Be diher mondo ng’ato olimi kama idakie?” kata “Be ing’eyo bende ni wan gi chenro mar puonjruok gi ji Muma?”

5. Owadwa gi nyaminwa moro mokendore oseyudo ber mage kuom tiyo gi yor lendoni?

⁵ Yorni osekelo nyak mang’eny ndi. Owadwa gi nyaminwa moro mokendore nondiko kama: “Sama wachung’ kama wachanoe bugewa kendo neno ji mang’eny ka kalo, waneno ayanga kaka pod tich ng’eny mar chopo ne ji gi wach maber e piny ngima. Sama waneno ji mang’eny kamano kendo paro kaka Jehova dewo ng’ato ka ng’ato, wayudo mijing’o mar dhi nyime keto tij lendo obed mokwongo e ngimawa. Sama waneno joma rawo kama wachanoe buge, watemo paro kaka nyaka bed ni Jehova nono chunygi mondo oyudie joma owinjore. Wanyalo wacho gadier ni sani koro watiyo machiegni moloyo gi malaike ma bende tiyo tijni.”

6. (a) En yo mane machielo ma kanyakla mang’eny biro tiyogo e lendo, to opogore nade gi lendo mitimo e yo makende kuonde ma ji ng’enyie e taon? (b) Ere kaka kanyakla mokiewo nyalo bedo gi tudruok maber sama gilendo e lela?

⁶ Lendo e Yo Makende ma Kanyakla Ema Chano e Alworagi: Mopogore gi lendo mitimo e yo makende kuonde ma ji ng’enyie e taon, nitie yo machielo ma buche mang’eny mag jodong-kanyakla ema biro chano e alworagi. E yo machieloni, jolendo chano buge e mesa kata e trolley kuonde ma ji mang’eny kaloe, ka gitimo kamano mana e alwora mar kanyaklagi. Mano opogore gi yor lendo ma nokwong ler nikech e mokwongono, ofis yiero jopainia kowuok e kanyakla mopogore opogore mondo gilend e taon moro ma ofis ema oyiero.—Ne sanduk mawacho ni “Tudruok Maber Dwarore.”

7. Ere kaka jodong-kanyakla biro chano yor lendoni kuonde ma mano nyaloree?

⁷ Jodongo biro nono kabe nitie kuonde ma ji mang’eny kaloe e alwora mar kanyaklagi kendo nono kabe ginyalo chano lendo e yo ma kama. Ginyalo keto trolley kata mesgo kuonde kaka stend madongo mag mtokni, kuonde ma ji yueyoe, nderni ma ji ng’enyie, ute madongo ma nigi dukni e igi, kolej kata yunivasiti, paw ndege, kod kuonde ma ji ohero timoe nyasi kata romo moko. Nyalo bedo maber ka gichano bugego kamoro achiel maok gisik gilokre-gilokre kendo kanyalore to gibed kanyo e odiechienge kod seche machal. Oseyudore ni chano buge e ute madongo ma nigi dukni e igi kelo nyak moloyo chanogi e dho duka achiel ma joma dhiye thoro keto pachgi mana kuom gima oterogi kanyo. Kuonde machalo kaka bath nderni molos ne joma wuotho gi tiendgi ber ndi gi chano buge e trolley moro matin. Ibiro ket kalatese molos e yo makende e Websaitwa manyiso nying gasede mag Ohinga mar Jarito gi Amkeni! koda mar bug Muma Puonjo, kendo jodongo ema biro gologi e Websaitwa. Kalatesego ibiro losi mondo otigo e lendo e yorni kende. Jogo ma biro tiyo gi yor lendoni biro time e yo machalre achala gi lendo mitimo e yo makende kuonde ma ji ng’enyie e taon, kendo onego giluw paro ma jarit tij lendo biro bedo ka miyogi. Ka ng’ato onyiso jolendogo kaka ginyalo tudore kode, to ok odak e alwora mar kanyaklagi, gibiro pong’o fom mar Tafadhali Fuatia Upendezi (S-43) kendo miyo jagoro.

8. Kapo ni kanyaklau onge gi kuonde minyalo tiye gi yore ariyo ma oseler motelo, pod unyalo tiyo gi yore mage e chopo ne ji mang’eny?

⁸ Lend Kamoro Amora ma Ji Yudoree: Nitie kanyakla moko ma onge gi alwora ma nigi kuonde ma ji ng’enyie ma ginyalo lendoe ka gitiyo gi mesa kata trolley. Kata kamano, ijiwo jolendo manie kanyakla kaka mago mondo oti gi yore mamoko ma ginyalo chopogo ne ji mang’eny e alworagi. Kuom ranyisi, be nitie chirni kata dukni e alworau? Be nitie kuonde ma ji ohero yueyoega kata timoe romo moko e alworau? Be nitie kuonde ma ojatimie nyasi moko e alworau? Ka en kamano, unyalo lendo ne ji kuonde kaka mago.

9. Ang’o momiyo onego watim kinda e lendo kamoro amora ma ji nyalo yudoree?

⁹ Jehova dwaro ni “ji duto okwo, kendo ging’e adiera chuth.” (1 Tim. 2:4) Omiyo, wadwaro ni water wach Pinyruoth ne ji mang’eny kaka nyalore kapok giko ochopo. (Math. 24:14) E alwora mang’eny, ok yot yudo ji e utegi. Kata kamano, wanyalo yudo thuolo mar wuoyo kodgi sama walendo e lela. Samoro mano kende e yo ma jomoko nyalo yudogo thuolo mar winjo wach maber. Kuom mano, watimuru kinda e manyo ji kamoro amora ma ginyalo yudoree mondo wachop tijwa chuth.—2 Tim. 4:5.

[Sanduku e ite mar 5]

Tudruok Maber Dwarore

Oseyudore ni nitie kinde moko ma jolendo ma a e kanyakla mokiewo lendo kamoro achiel e seche machal e kuonde kaka wang’ yore, kuonde chungo mtokni, kuonde ohala, koda e stend mag mtokni. Seche moko bende, jolendo mawuok e kanyakla mokiewogo osetero gasede bang’ jowetegi e kuonde milwokonee ji lewni, kuonde ma ji bedoe ka girito donjo e ofis moro, kod kuonde mamoko. Mano miyo joma odak kata ma tiyo kuondego chwanyore kata mana e seche ma jolendogo ok odhi kuondego e seche machal. Omiyo, ber ka wadhi mana e alwora mar kanyaklawa sama wadwaro lendo e lela.

Ka jolendo diher lendo e alwora mar kanyakla machielo mokiewo kodgi, nyalo bedo maber ka giwuoyo gi jarit tj lendo mar kanyaklagi. Jarit tij lendogino biro penjo jarit tij lendo mar kanyakla ma gikiewogono kabe ginyalo lendo e alworagino. Nitie kanyakla moko ma tiyo gi dhok mopogore opogore to gilendo e alwora achiel. E kuonde ma kamago, nyalo bedo maber ka jorit tij lendo mag kanyaklago owinjore maber kaka gibiro tiyo e alworano mondo kik gichwany joma odak e alworano kayiem nono. Ka nitie tudruok maber, gik moko duto biro timore e yo “maber kendo makare.”—1 Kor. 14:40.