Ti Maber gi Kinde ma In-go Sama Ilendo
Joneno mag Jehova notiyo gi seche 1,945,487,604 e higa mar 2014 mar tijwa, kendo mano nyiso maler ni wang’ado mar siko ka wadich e tij Jehova. (Zab. 110:3; 1 Kor. 15:58) Nikech “ndalo modong’ nok,” be wanyalo tiyo gi kinde ma wan-go e lendo ne ji mang’eny kaka nyalore?—1 Kor. 7:29.
Mondo wati maber gi kinde ma wan-go, dwarore ni wabed joma oikore timo lokruok. Kuom ranyisi, kapo ni itiyoga gi yor lendo moro to ikawo sa achiel kata mokalo kapok iwuoyo gi ng’ato, be inyalo timo lokruok mondo iti gi yo machielo ma nyalo miyo iwuo gi ji mang’eny? En adier ni alwora mwalendoe opogore opogore. Kata kamano, paro ma luwogi nyalo konyi tiyo maber gi kinde ma in-go mondo kik ‘igo yamo.’—1 Kor. 9:26.
Lendo mar Ot ka Ot: Kuom higni mang’eny, jolendo osebedo ka chako tij lendo gi ot ka ot mondi, kapok gichako lendo e yore mamoko. Kata kamano, nikech weg udi mang’eny dhiga e tich godiechieng’, donge wanyalo temo lendo ot ka ot e seche mag odhiambo sama ji mang’eny oseduogo e udi? E seche mag odiechieng’, wanyalo yudo nyak ka walendo e nderni kata kuonde ohala.
Lendo Kuonde ma Ji Mang’eny Yudoree: Onego uket mesa kod troli kuonde ma ji mang’eny yudoree e alwora mar kanyaklau. (Som Tijwa mar Pinyruoth ma Julai 2013 ite mar 5.) Kapo ni kwan mar ji odok chien e kama uketoega mesa kata troli, Komiti Matayo Tije Kanyakla nyalo ng’ado mondo jolendo odhi kamachielo ma ji mang’eny yudoree e alworau.
Dok Limbe kod Tayo Puonjruok mag Muma: Be inyalo chano mondo idog limbe kata tayo puonjruok mag Muma e kinde ma yore mamoko mag lendo ok nyal tiyonwa maber? Kuom ranyisi, kapo ni ji mang’eny yudore e udi chieng’ Ngeso gokinyi, donge wanyalo lendo ot ka ot mondi, kae to eka wadhi e puonjruok mag Muma e seche mag odhiambo?
Kata obedo wanyalo kwano seche ma watiyogo e lendo sa moro amora ma walendo, wabedo mamor moloyo ka wayudo nyak e tijwa mar lendo. Kapo ni iyudo ni nitie sa moro sie ma ka itiyo gi yor lendo moro to ok kel nyak, tem ane tiyo gi yo machielo. Kwa Jehova e lamo mondo okonyi tiyo maber gi kinde ma in-go sama ilendo, nimar en e “Ruodh keyo.”—Mat. 9:38.