Lendo mar Ot ka Ot
1. En penjo mane ma wanyalo bedogo kaluwore kod wach mar lendo ot ka ot, to nikech ang’o?
1 “Jogo ma olony e yore mopogore opogore mag lando Adiera biro yie ni kampen mar lendo ot ka ot ka itiyo kod buk miluongo ni MILLENIAL DAWN, gie sani, e yo maber moloyo mar lando Adiera.” Mani e gima ne ondiki e gaset mar Zion’s Watch Tower mar Julai 1 higa mar 1893, ka ojiwo ber manitie e timo tij lendo mar ot ka ot. E piny mangima, ji oseng’eyo ni mano en gima itimo gi Joneno mag Jehova. Be podi mano e yo maber mar lendo kata obedo ni ji ok yudore e mier kata utegi e pinje moko?
2. Ndiko siro nade tij lendo mar ot ka ot?
2 En Wach Maduong’ Kendo ma Osir kod Ndiko: Lendo mar ot ka ot en gima Ndiko osiro. Yesu ne ooro jolupne 70 ka oketogi ji ariyo ariyo mondo gidhi e ute ji. (Luka 10:5-7) Kinde matin bang’ tho Yesu, Muma wacho kuom jolupne niya: “To pile, e Hekalu kendo e dala [“ot ka ot,” Luo NT], ne ok giweyo puonjo kendo yalo ni Yesu en Kristo.” (Tich 5:42) Jaote Paulo bende ne puonjo gi kinda ka odhi ot ka ot.—Tich 20:20.
3. Gin ber kaka mage mayudore kuom timo lendo mar ot ka ot?
3 Lendo mar dhi ot ka ot podi e yo maber kendo maduong’ moloyo mar lando wach maber e kindewagi. En e yo ma konyowa tiyo e yo maber kendo mochanore ka ‘wadwaro’ jogo mowinjore. (Math. 10:11) Kinde duto ka ji ni e pacho, gibedo joma yueyo kendo man thuolo. Wuoyo kodgi wang’ gi wang’—winjo kaka giloso, neno kaka giwinjo, kendo neno kaka gidak—chiwonwa thuolo mar fwenyo gigo ma gihero kata mana machando chunygi. Mano chiwonwa thuolo majaber kinde duto mar twak kodgi e yo malach.
4. Ang’o ma wanyalo timo mondo okonywa timo lendo mar ot ka ot e yo maber kendo mowinjore?
4 Tim Lokruok e Chenro Magi: Jaote Paulo noikore kinde duto mar timo lokruok e chenro mage owuon mana “nikech Wach Maber.” (1 Kor. 9:23) Nyalore mondo wan bende watim lokruok e chenro magwa mag lendo mondo walendi seche ma ji mang’eny nyalo yudore e mier kata e utegi, kaka seche mag odhiambo, giko juma, kata e odiechienge ma sirkal oketo mag yueyo. Ndik piny udi kata mier ma ok uyudoe ji, kendo temuru dok e thuolo machielo e odiechieng’no, kata mana e odiechieng’ machielo mar juma.
5. Inyalo kony e yo mane jogo ma nigi midekre mondo giriwore gi jomoko e tij lendo mar ot ka ot?
5 Kata jogo ma nigi midekre bende nyalo lendo ot ka ot. Kamoro wanyalo timo chenro mondo warawnegi ka wadhi e mier ma ginyalo chopoe e yo mayot, mondo omigi thuolo mar tiyo tijni e okang’ ma gin giwegi ginyalo. Nyaminwa moro ma ne muche tin ne nyalo mana dhi e ot achiel bang’ nus sa. Kata kamano, ne en gi mor mogundho kendo ne owinjo maber bang’ riwruok gi Jokristo mamoko e tiyo tij lendono.
6. Ang’o momiyo onego wajiwre mondo wabed joma tiyo tij lendo mar ot ka ot kinde duto?
6 Kokalo kuom tij lendo mar ot ka ot, ji mang’eny manyiso kido mamuol ka mag rombe podi yudore. Jalendo moro ne odwong’o dhoot moro, ma onyise ni: “Machiegni donji. Ang’eyo ni in ng’a. Ooyudo alemo mondo Nyasaye oorna ng’ato okonya, to bang’ mano to awinjo ka ng’ato dwong’o dhoot. Nyasaye owinja ma oori.” Gik mabeyo ma waneno e tijni nyiso maler ni Jehova gwedho yo ma walendogo mar dhi ot ka ot. (Math. 11:19) Jiw chunyi mondo ibed ng’atno ma lendo ot ka ot kinde duto.