Lendo e Yor Simo Nyalo Tiyo Maber
1. Ang’o momiyo lendo e yor simo nyalo tiyo maber e tijwa mar lendo?
1 Ang’o momiyo owinjore wanon ka wanyalo tiyo gi simo e tijwa mar lendo? Nikech en yo machielo mar konyo jomoko mondo oyud ng’eyo makare makelo warruok. (2 Pet. 3:9) Kata obedo ni yo maduong’ mwatiyogo e lando wach maber mar Pinyruodh Nyasaye en lendo mar ot ka ot, waikore bende mar tiyo gi yore mamoko mondo walend ne joma ok yudore e utegi.—Math. 24:14; Luka 10:1-7; Fwe. 14:6.
2. Ere kaka lendo mitiyoe gi simo ichano?
2 Kaka Ichane: Mana kaka chenro mitimo ne lendo mar ot ka ot, alwora mar lendo mitiyoe gi simo bende ichiwo ne jolendo. Ng’ato nyalo lendo e yorno ka en kende kata ka gin grup matin mar ji ariyo kata ji adek. Kama jalendo oyiero mondo olendie kotiyo gi simo onego obed ma onge koko. Jolendo mang’eny yudo ni ginyalo lendo gi simo e yo maber ka gibet kama mesa nitie kendo bedo gi gik ma pile gitiyogo e tij lendo mar ot ka ot.
3. Ang’o monego waket e paro seche ma walendo e yor simo?
3 Kaka Ilendo Kitiyo gi Simo: Seche ma walendo ka watiyo gi simo, onego wachiw wach ma wan-go e yor goyo mbaka. Joma eka chako lendo gi simo nyalo somo ne wuon ot weche ma giseiko, to onego gitim kamano e yor goyo mbaka. Weche michakogo wuoyo ma yudore e bug Kutoa Sababu, Tijwa mar Pinyruoth, kod trakt mar Bende Diher Ng’eyo Adiera? nyalo konyo ahinya. Seche ma iiko weche mibiro tiyogo, yier wach mibiro wuoyoe, ik penjo, kendo ikri mar tiyo gi ndiko moko matin e chiwo dwoko. Mana kaka itimo pile e tij lendo inyalo chano mar chiwo buge ma ilendogo ot ka ot. Par wechegi: Bed mos kendo kik iwuo mapiyo. Bed ng’at ma nyiso luor, mahore, kendo mawuoyo gi ng’ato kaka osiepne, nikech ng’ato nyalo fwenyo kidogo kata e simo. Chik iti sama wuon ot wacho gima nie pache, kendo inyis ni iyie gi paro mochiwo kigoyone erokamano kuom parogo. Tang’ kik inyise chenro mar golo chiwo, nikech mano nyalo winjore ka gima ikwayo pesa kitiyo gi simo.
4. Lendo ma itiyoe gi simo nyalo konyowa nade e alworawa mar lendo?
4 Ng’at ma iwuoyogo e yor simo nyalo bedo ng’at maok wuothi, matuwo, kata ma chenrone miyo ok bedne mayot yude e ot. Nitie joma odak kuonde ma nigi rangeye miloro, kata e udi maok donjie ka pok omiyi rusa. Omiyo, seche mwatimo kinda mar tiyo tijwa mar lendo, non ka inyalo tiyo gi yor lendo gi simo.