Be Inyalo Lendo Seche mag Odhiambo?

1. Kaluwore gi buk moro, gin kinde mage ma jaote Paulo ne lendo e ot ka ot?

¹ Buk moro miluongo ni Daily Life in Bible Times wacho ni jaote Paulo ne lendo e ot ka ot ‘chakre sa 10 odhiambo nyaka otieno.’ Ok wanyal ng’eyo gadier ka mano e chenro ma Paulo ne luwo, kata kamano, wang’eyo ni noikore ‘timo duto nikech wach maber.’ (1 Kor. 9:​19-​23) Mano nyiso ni Paulo nochanore maber mondo olend ot ka ot seche ma ji yudore e udi.

2. Ang’o momiyo ber lendo e seche mag odhiambo?

² Kuonde mang’eny, jolendo oseng’iyo dhi ot ka ot e seche mag okinyi. Kata kamano, be pod mago e seche maberie moloyo mar lendo ot ka ot e alworau? Painia moro wacho kama kuom alworagi: “Ok yot yudo ji e utegi godiechieng’. Ng’eny ji yudore mana seche mag odhiambo.” Lendo e seche mag odhiambo nyalo miyowa thuolo maber moloyo mar tero ne joma chwo wach maber. E sechego, pach weg udi okuwe kendo yotnegi wuoyo gi ji. Ka jodong-kanyakla neno ni lendo e seche mag odhiambo nyalo kelo nyak e alworau, onego gitim chenro mar bedo gi romo mar dhi lendo e sechego.

3. Ere kaka wanyalo nyiso rieko sama walendo e seche mag odhiambo?

³ Ti gi Rieko: Rieko dwarore ahinya sama walendo e seche mag odhiambo. Kuom ranyisi, kapo ni ilimo ng’ato sama odich, kaka sama ochiemo, inyalo nyise ni ibiro duogo bang’e. Ka mudho olil, chung’ kama wuon ot nyalo nenie, kendo iwach nyingi mapiyo gi gima okeli. Nyalo bedo maber bende ka ulendo machiegni machiegni kendo kama ler nitie moromo. Kik ilim ji e seche ma gichiegni nindo. (2 Kor. 6:3) Ka un e alwora ma ok ber wuothe gotieno, temuru ulend ka mudho pok olil.​—⁠Nge. 22:3.

4. Gin ber mage mwayudo ka walendo e seche mag odhiambo?

⁴ Ber Mwayudo: Tijwa mar lendo bedoga mamit ahinya sama wayudo joma wawuoyogo. To kaka wamedo wuoyo gi ji mang’eny, e kaka wamedo yudo thuolo mang’eny mag konyo ji mondo ‘gikwo kendo ging’e adiera chuth.’ (1 Tim. 2:​3, 4) Donge nyalo bedo maber ka itimo lokruok moko e chenroni mondo ilend e seche mag odhiambo?