Lendo e Yo Makende Kuonde ma Ji Ng’enyie Kelo Nyak
1. Kanyakla ma nigi kuonde ma ji mang’eny wuothoe osebed kijiwo mondo otim ang’o?
1 Kanyakla ma nigi kuonde ma ji mang’eny wuothoe osebed kijiwo mondo gilend e yo makende kuonde ma kamago, ka gichano buge e mesa kata e trolley. Ka ochan buge e trolley kata gimachielo matin, jalendo achiel chung’ kata bet e bath gima ochanie bugego. To ka ochan buge e mesa, jolendo ariyo nyalo chung’ kata bet kanyo. Jolendogo onego otem bedo mamor kendo bwonjo e yo ma nyalo ywayo joma kalo. Ka bugego omako wang’ ng’at ma kadho, jalendo achiel nyalo chako kode mbaka. Kuom ranyisi, onyalo chako kama: “Be isegaparo gima Muma puonjo kuom wachni?” Mopogore gi jolendo manie mesa kata trolley, jolendo ariyo mamoko kata jalendo achiel nyalo lendo ne joma kadho gi chien matin, kama jowetene mamoko manie mesa kata trolley nyalo nenogie kendo tudore kodgi ka mano dwarore.
2. Chiw ane ranyisi moro manyiso kaka lendo e yo makende kuonde ma ji ng’enyie osekelo nyak.
2 Lendo e yo makendeni osemiyo ji mang’eny ochako puonjore Muma. Kuom ranyisi, nyako moro manie kolej ne dwaro timo nonro moko e wi Joneno mag Jehova, to pok ne oyudo kama Od Romo nitie. Kae to juma maluwo, ne opo koneno mesa mochanie buge ei kolej ma ne osomoeno. Ne olos chenro mondo opuonjre Muma, kendo chop sani, osebatise, to ok mano kende. En bende sani ohero yor lendo makendeni.
3. Jolendo moko wacho ang’o kuom yor lendo makendeni?
3 Nyaminwa moro ma osebedo ka tiyo gi yorni nowacho kama: “Nitie joma rawo kama wantieno mondo gikaw gasede manyien. Moko to pok nowinjo nyaka nene ni nitie jomoko ni Joneno mag Jehova. Aneno ni lendo e yo makendeni biro miyo ji mang’eny owinj wach maber.” Nyaminwa moro machielo to nowacho kama: “Mae en yor lendo makende adier nikech ji e ma biro iri, to kinde mang’eny gibiro ka gidwaro ng’eyo weche momedore, kata kapo ni moko kuomgi seche moko ok dwar puonjruok.”
4. Ang’o momiyo onego wachan buge kamoro achiel, e odiechienge machal, kendo e seche machal juma ka juma?
4 Mondo wayud nyak maber, onego wachan buge kamoro achiel, e odiechienge machal, kendo e seche machal juma ka juma. Timo mano miyo ji ng’iyo gi kuondego, mi chop kama koro ok giluor kawo buge kata penjo penjo. Be kanyaklau osetimo chenro mar lendo e yo makendeni? Ka en kamano, to kare samoro in bende inyalo tiyo gi yorni e ‘lando Pinyruodh Nyasaye’ kuonde duto.—Luka 9:60.