Kaka Wanyalo Lendo ka Watiyo gi Mesa Kata Troli

Lendo mitiyoe gi mesa kata troli osekonyo ahinya e ywayo joma chunygi ni kare e adiera. (Joh. 6:44) Kuom mano, osebed kijiwo jodongo mondo ochan kaka jolendo e kanyaklagi nyalo tiyo gi yorno e lendo kuonde ma ji ng’enyie e alworagi. To nikech troli kata mesa mwatiyogo ok gin miguro kamoro achiel, ok ochuno ni nyaka wakwa rusa kuom jotich sirkal. Ng’a gini mowinjore lendo ka gitiyo gi yorno? Gin jolendo ma tiyo gi rieko, ma dimbore, kendo molony e wuoyo gi ji. Weche ma luwogi nyalo konyowa yudo nyak sama walendo kwatiyo gi yorno.

Gik Monego Watim:

Wuo gi ji kimor kendo iikri konyo joma kalo kanyo. Jolendo moko bwonjoga gi joma kalo kae to gimosogi gi mor. Kapo ni ng’ato ng’iyo buge mupedho sama okalo kanyo, inyalo wachone ni, “In thuolo kawo buk moro amora midwaro.”
Chung’ kama owinjore. Nitie kuonde moko ma jolendo oseyudo ni giyudo nyak ka gichung’ machiegni gi kama giketoe buge. Jolendo moko to neno ni ka gichung’ machiegni to mono ji biro kanyo, omiyo gichung’ mabor matin nyaka sama gineno ka ng’ato biro machiegni gi kanyo. Sama ng’ato biro kama iketoe buge, tem ane chako wuoyo kode, inyalo nyise kama, “Be isegapenjorie penjono?”
Tem ahinya tiyo gi Muma sama iwuoyo gi ng’ato.
Ka ng’ato okawo bugewa mwatiyogago e puonjruok Muma gi Ji kaka bug Muma Puonjo, lerne chenro mar puonjruok Muma. Inyalo tugone vidio mar Ang’o Momiyo Onego Ipuonjri Muma?
Ka nyalore, kwa ng’at mokawo bugewa mondo onyisi kaka inyalo tudori kode kendo. Kapo ni iwuoyo gi ng’at ma ok odak e alworau, pong’ fom mar Tafadhali Fuatia Upendezi (S-43), kae to imi jagoro mar kanyaklau mapiyo kaka nyalore.