Loso Osiep ma ne Nie Kindi gi Jehova Kendo

HIGA ka higa, owete gi nyimine mang’eny idwokoga e kanyakla. Par ane kaka wachno keloga ‘mor mang’eny e polo.’ (Luka 15:7, 10) Ka po ni in achiel kuom joma osedwok e kanyakla, inyalo bedo gadier ni Yesu, malaike, kod Jehova mor ahinya neno ka iyiero chung’ kor adiera kendo. Kata kamano, nitie pek moko minyalo romogo sama itemo loso osiep ma ne nie kindi gi Jehova kendo. Moko kuom pekgo gin mage? To gin ang’o minyalo timo mondo ilogi?

PEK MOKO MINYALO ROMOGO

Owete gi nyimine moko pod winjoga ka chunygi onyosore kata bang’ kosedwokgi e kanyakla. Gima kamano bende notimore ne Ruoth Daudi. Kata mana bang’ ka nosewene richone, pod nowacho kama: “Richona ohewa.” (Zab. 40:12; 65:3) Bang’ ka osedwok ng’ato e kanyakla, pod onyalo bedo gi wich-kuot kata winjo ka chunye chande kuom higni mang’eny. Isabellea ma ne ogol e kanyakla kuom higni mokalo 20 nowacho kama: “Pod teknaga ahinya yie ni Jehova nyalo weyona richona.” Ka po ni chunyi onyosore, yot ahinya mondo winjruokni gi Jehova odog chien kendo. (Nge. 24:10) Kik iyie mondo gima kamano otimreni.

Jomoko winjoga ka chunygi onyosore ahinya nikech giparoga ni ok ginyal timo duto ma dwarore e loso osiep ma ne nie kindgi gi Jehova kendo. Bang’ ka ne osedwok Antoine e kanyakla, nowacho kama: “Nanenoga mana ka gima wiya nowil gi gik moko duto ma natimoga chon ka ne pok ogola e kanyakla.” Paro ma kamago nyalo miyo jomoko odikre ka pok gichako timo kinda e tij Jehova kendo.

Wati ane gi ranyisi moro e lero wachno. Sama yamo mager oketho ot moro ma ng’ato oseloso ma jaber, ng’atno nyalo winjo ka chunye onyosore ahinya koparo apara thuolo kod kinda ma dwarore e loso odno kendo. E yo ma kamano, ka po ni richo moro maduong’ ma ne itimo e ma noketho osiep ma ne nie kindi gi Jehova, inyalo paro ni biro dwarore ni itim gik moko mang’eny mondo ichak ilose kendo. Kata kamano, nitie joma biro konyi timo gik ma dwarorego.

Jehova kwayowa niya: “Biuru walos weche.” (Isa. 1:18) Isetimo gik mang’eny ahinya mondo ‘ilos weche’ e kindi gi Jehova. Jehova oheri ahinya nikech okang’ misekawono. Par ni isemiyo Jehova wach ma dodwokgo ng’at ma siko jare, ma en Satan!​—Nge. 27:11.

Kuom timo kamano, in iwuon isesudo machiegni gi Jehova, kendo osingo ni obiro sudo machiegni kodi. (Jak. 4:8) Kata kamano, kata obedo ni owete gi nyimine biro mor ni iduogo e kanyakla, pod nitie gik mamoko ma dwarore ni itim. Dwarore ni iteg hera miherogo Jehova Wuonu manie polo kendo osiepni. Ere kaka inyalo timo mano?

KET CHENRO MAR GIK MINYALO TIMO SAMA ILOSO WINJRUOKNI GI JEHOVA KENDO

Tem keto chenro mar gik ma inyalo chopo. Nyaka bed ni pod iparo adiera ma ne ihango puonjori e wi Jehova kod singo momiyowa ni obiro kelo paradiso e piny ka. Kata kamano, koro dwarore ni ilos chenro maber mondo idag e ngima mar Jakristo. Kuom ranyisi, dwarore ni ichak lendo, idhi e chokruoge ma ok ibari, kendo imanyga thuolo mag bedo gi Jokristo weteni. Ne ane moko kuom gik moko minyalo timo.

Wuo gi Jehova pile. Wuonu manie polo ong’eyo ni chunyi nyalo chandi ma chop kama ineno ni tekni wuoyo kode e lamo. (Rumi 8:26) Kata kamano, ‘lam alama ma ok iwe,’ kendo inyis Jehova kaka igombo bedo osiepne. (Rumi 12:12) Andrej wacho kama: “Najabedoga gi wich-kuot kendo chunya ne chandaga ahinya. Kata kamano, bang’ lamo ka lamo, nawinjoga ka koro agonyora, kendo ka chunya okue.” Ka po ni ok ing’eyo gima inyalo kwayo e lamo, inyalo somo weche mag lamo ma Ruoth Daudi nolamo bang’ ka noseloko chunye gadier. Wechenego yudore e Zaburi 51 kod 65.

Puonjri Muma pile ka pile. Mano biro konyi bedo gi yie motegno, kendo hera miherogo Jehova biro medore. (Zab. 19:7-11) Felipe nowacho kama: “Winjruok ma ne nie kinda gi Jehova nobedo mayom yom mi atimo richo nikech ne aonge gi chenro mar puonjruok Muma pile ka pile. Ne ok adwar ni gima kamano ochak otimrena kendo, omiyo, nang’ado ni ne adhi keto chenro maber mar puonjruok Muma.” In bende inyalo timo kamano. Ka po ni diher ng’eyo moko kuom weche minyalo nono e puonjruok ma mari iwuon, inyalo wuoyo gi Jakristo moro motegno mondo okonyi timo kamano.

Los osiep ma ne nie kindi gi Jokristo weteni kendo. Moko kuom joma idwokoga e kanyakla paroga ni owete gi nyimine osin kodgi. Larissa nowacho kama: “Wiya ne kuotga ahinya. Naparo apara kaka nasendhogo kanyakla. Parono nochanda kuom kinde malach.” Par ni jodong-kanyakla kod Jokristo mamoko motegno oikore konyi mondo ichak ilos winjruok ma ne nie kindi gi Jehova. (Ne sanduk ma wiye wacho ni, “Gik ma Jodong-Kanyakla Nyalo Timo.”) Gimor ahinya ni iduogo e kanyakla kendo gigombo ni ngimani odhi maber!​—Nge. 17:17.

En ang’o minyalo timo mondo isud machiegni gi kanyakla? Riwri kodgi e gik ma gitimo, kaka dhi e chokruoge ma ok ibari kaachiel gi timo tij lendo gi kinda. Ere kaka mano biro konyi? Felix nowacho kama: “Owete gi nyimine ne rito arita chieng’ ma ne adhi duogo e kanyakla. Ne girwaka gi mor. Giduto ne gikonya neno ni an bende an achiel kuom jo kanyakla. Ne gikonya neno ni Jehova noseweyona, kendo ne gikonya ng’eyo kaka nanyalo dhi nyime tiyo ne Jehova kendo.”​—Ne sanduk ma wacho ni, “Gik Minyalo Timo.”

KIK CHUNYI OL!

Satan biro dhi nyime keloni chandruoge mondo onyosgo chunyi sama itemo loso osiep ma ne nie kindi gi Jehova. (Luka 4:13) Ikri ne chandruoge mobiro kelonigo kuom tego winjruok ma in-go gi Jehova sani.

Jehova nosingo wechegi e wi rombene: “Anamany rombo molal, anaduok ma orwenyo, anatue motur gi law, kendo anateg ma yom yom.” (Eze. 34:16) Jehova osekonyo owete gi nyimine mang’eny ma noloko chunygi gadier bang’ timo richo, mi giloso winjruok ma ne gin-go kode kendo. Bed gadier ni oikore konyi mondo in be ilos osiep motegno kode kendo.