Penjo Moa Kuom Josombwa
Ka ne Daudi ondiko e Zaburi 61:8 ni obiro ‘siko’ kopako nying Nyasaye gi wer, dibed ni notemo wacho ni nodhi timo kamano ma ok otho nyaka chieng’?
Ooyo. Weche ma Daudi nondikogo ne ni kare kendo adier.
Ne ane weche ma nondiko e wes mamoko ma chalo gi mano: “Anasik ka apako nyingi gi wer, kendo abiro chopo singruokna odiechieng’ kodiechieng’.” “A Jehova Nyasacha, abiro paki gi chunya duto, abiro miyo nyingi duong’ nyaka chieng’.” “Abiro pako nyingi nyaka chieng’.”—Zab. 61:8; 86:12; 145:1, 2.
Daudi ne ok tem medo chumbi kowacho ni en ok obi tho. Nong’eyo gima Jehova noseng’ado, ni dhano ne dhi tho nikech richo kendo Daudi owuon noyie ni en bende ne en jaricho. (Cha. 3:3, 17-19; Zab. 51:4, 5) Nong’eyo maber ni jotich Jehova mamoko ma ne nigi yie motegno kaka Ibrahim, Isaka, kod Jakobo bende notho. Kendo Daudi nong’eyo maler ni en bende nodhi tho. (Zab. 37:25; 39:4) Kata kamano, weche ma nondiko e Zaburi 61:8 ne nyiso gombo ma ne en-go mar pako Jehova ndalo duto, tek mana ni pod nongima.—2 Sa. 7:12.
Nitie sama Daudi ne ndikoga weche ma wuoyo e wi ngimane owuon mana kaka wanyalo neno e weche manie wi Zaburi 18, 51, kod 52. E Zaburi 23, Daudi nopimo Jehova gi jakwath ma tayo rombene, ma duogo chunygi, kendo ma ritogi maber. Daudi ne en jakwath ma chalo kamano kendo nodwaro tiyo ne Jehova e ndalo ‘duto mag ngimane.’—Zab. 23:6.
Par bende ni Jehova e ma notayo Daudi mondo ondik wechego. Gik ma nondiko noting’o weche moko ma nokor ma ne dhi timore bang’e. Kuom ranyisi, e Zaburi 110, Daudi nowuoyo kuom kinde ma Ruodhe ne ‘dhi bet e bat korachwich mar Nyasaye’ e polo, kendo nidhi mi Ruodhno teko mang’eny. Nikech ang’o? Mondo olo jowasik Nyasaye kendo “[ong’ad] bura ne ogendni” e piny. Daudi ne nie anyuola ma Mesia ne dhi wuokie, kendo Mesiano ne dhi locho ka en e polo kaka jadolo ma nyaka chieng’. (Zab. 110:1-6) Yesu nowacho ni weche ma nokor e Zaburi 110 ne wuoyo kuome kendo ni wechego ne dhi chopo e kinde mabiro.—Mat. 22:41-45.
Ee, Jehova notayo Daudi mondo ondik weche e wi ndalone ka ne pod ongima kod kinde mabiro ma ne idhi chiere mondo oyud thuolo mar pako Jehova nyaka chieng’. Kuom mano, Zaburi 37:10, 11, 29 wuoyo kuom gik ma notimore e piny Israel e kinde ma nondikgie kod ma biro timore e kinde mabiro.—Ne paragraf mar 8 e sula ma wacho ni “Inibed Koda e Paradiso,” ma yudore e gasedni.
Kuom mano, Zaburi 61:8 kod ndiko mamoko ma chalo gi mano nyiso ni Daudi ne gombo pako Jehova e Israel machon nyaka e thone. Bende, ginyiso gima Daudi biro timo e kinde mabiro ka Jehova ochiere.