Wanyalo Dak Nyaka Chieng’!

1. Ere kaka paro matut kuom singo ma Jehova omiyowa mar ngima ma nyaka chieng’ muloga chunywa?

JEHOVA osingo ne joma winje ni gibiro yudo “ngima ma nyaka chieng’.” (Rumi 6:23) Sama waparo matut kuom singo ma Jehova omiyowano, wamedoga here ahinya. Parie wachni: Wuonwa manie polo oherowa ahinya ma onge gimoro amora ma nyalo pogowa kode.

2. Ere kaka singo mar ngima ma nyaka chieng’ konyowa?

² Singo ma Nyasaye omiyowa mar ngima ma nyaka chieng’ konyowa nano sama waromo gi tembe. Kata sama jowasikwa bwogowa gi tho, ok wabi ketho chike Jehova. Nikech ang’o? Achiel kuom gik momiyo ok wanyal timo kamano en ni wan gadier ni kata ka watho, Jehova biro chierowa kendo obiro miyowa ngima ma nyaka chieng’. (Joh. 5:28, 29; 1 Kor. 15:55-58; Hib. 2:15) Ang’o momiyo wanyalo bedo gadier ni wanyalo dak nyaka chieng’? Ne ane weche ma luwogi.

JEHOVA BIRO BETIE NYAKA CHIENG’

3. Ang’o momiyo wanyalo bedo gadier ni Jehova nyalo miyowa ngima ma nyaka chieng’? (Zaburi 102:12, 24, 27)

³ Wang’eyo ni Jehova nyalo miyowa ngima ma nyaka chieng’ nikech en e Soko mar ngima kendo obiro dak nyaka chieng’. (Zab. 36:9) Ne ane moko kuom ndiko ma konyowa ng’eyo ni Jehova osebetie nyaka nene kendo ni obiro betie nyaka chieng’. Zaburi 90:2 wacho ni Jehova en “Nyasaye ma nyaka nene kendo nyaka chieng’.” Zaburi 102 bende jiwo mana wachno. (Som Zaburi 102:12, 24, 27.) Janabi Habakuk nowacho kama e wi Wuonwa manie polo: “A Jehova, donge in e Nyasaye ma nyaka chieng’? A Nyasacha, Jalerna, in ok inyal tho.”​—Hab. 1:12.

4. Be en gima onego ochandwa ka po ni ok wanyal ng’eyo kaka Jehova osebetie nyaka nene kod kaka obiro betie nyaka chieng’? Ler ane.

⁴ Be iyudoga ka tekni yie ni Jehova osebetie nyaka nene kendo ni obiro betie “nyaka chieng’”? (Isa. 40:28) Nitie jomamoko ma bende oseyudo ka teknegi yie gi wachno. Elihu nowacho kama e wi Nyasaye: “Hike ng’eny ma dhano ok nyal kwano.” (Ayub 36:26) Kata kamano, bedo ni ok wawinj tiend wach moro, mano ok nyis ni wachno ok en adier. Kuom ranyisi, kata obedo ni ok wanyal ng’eyo chuth kaka ler mar chieng’ losore, mano ok nyis ni ler onge. Kamano bende, ok en gima yot ne dhano ng’eyo kaka Jehova osebetie nyaka nene kendo kaka obiro betie nyaka chieng’. To wachno koro ok nyis ni Nyasaye ok bi dak nyaka chieng’. Ngima Jachuechwa ok otenore kuom gik ma wang’eyo kata ma ok wang’eyo. (Rumi 11:33-36) Nochako betie kata ka ne pok ochue gik ma kelo ler, kuom ranyisi wang’ chieng’. Wan gadier ni Jehova “e ma nochueyo piny gi tekone” kendo ne entie ka ne pok “oyaro polo gi lony mare.” (Jer. 51:15; Tich 17:24) Wach machielo momiyo wan gadier ni wanyalo dak nyaka chieng’ en mane?

NOCHUEWA MONDO WADAG NYAKA CHIENG’

5. En geno mane ma jonyuolwa mokwongo ne nigo?

⁵ Gik moko duto ma ngima ma Jehova nochueyo e piny kae, ne ok ochue mondo odag nyaka chieng’ mak mana dhano kende. Nochue dhano gi geno mar dak nyaka chieng’. Kata kamano, Jehova nonyiso Adam niya: “Olemb yath ma kelo ng’eyo ber gi rach kik icham. Nikech chieng’ michame, to initho.” (Cha. 2:17) Ka di ne Adam gi Hawa owinjo Jehova, di ne ok githo. Nenore ni bang’ kinde moko, Jehova ne dhi yienegi chamo “olemb yadh ngima.” Mano ne dhi miyo gibed gadier ni Jehova ne dwaro ni ‘gidag nyaka chieng’.’b​—Cha. 3:22.

6-7. (a) En ang’o machielo ma nyiso ni dhano ne ok ochue mondo otho? (b) En ang’o ma diher timo e kinde mabiro? (Ne pichni.)

⁶ Josayans moko osefwenyo ni obwongowa nigi nyalo mar kano weche mang’eny ahinya moloyo weche duto ma onyalo kano e ngimawa ma sani. Sula moro ma nogo e higa 2010 e gaset mar Scientific American Mind, nowacho ni obwongowa nigi nyalo mar kano weche mang’eny ahinya ma nyalo romore gi programbe mag TV minyalo nyis kuom higni mokalo 300. Nenore ni obwongowa nyalo kano weche mokalo kanyo. To mano nyiso ni Jehova nochueyo obwongowa gi nyalo mar kano weche mathoth moloyo mana weche monyalo kano kuom higni 70 kata 80.​—Zab. 90:10.

⁷ Jehova bende nochueyo dhano gi gombo mar dak nyaka chieng’. Muma wacho ni Nyasaye “oseketo ngima ma nyaka chieng’ e chuny dhano.” (Ekl. 3:11) Mano en achiel kuom gik momiyo wanenoga tho kaka jasigu. (1 Kor. 15:26) Sama watuo, be wajwang’oga ajwang’a ngimawa mondo koro watho? Ooyo. Kinde mang’eny, wadhiga e osiptal kendo wamuonyoga yath mondo wachangi. Adiera en ni watimoga duto ma wanyalo mondo kik watho. Kendo sama ng’ato otho, bed ni ng’atno tin kata oti, wawinjoga malit ahinya e chunywa. (Joh. 11:32, 33) Nenore maler ni Jachuechwa ma jahera di ne ok ochueyowa gi gombo mar dak nyaka chieng’ ka po ni dwache ne en ni dhano otho. Kata kamano, pod nitie weche moko madongo ma miyo wabedo gadier ni nochuewa mondo wadag nyaka chieng’. Wanonuru ane gik ma Jehova notimo e kinde mokalo kod motimo sani ma miyo wabedo gadier ni dwaro ma ne en-go mokwongo ne dhano pok olokore.

DWACH JEHOVA POK OLOKORE

8. Isaya 55:11 puonjowa ang’o e wi dwach Jehova ne dhano?

⁸ Kata obedo ni Adam gi Hawa notimo richo mi gikelo tho ne nyithindgi, dwach Jehova ne dhano to pok olokore. (Som Isaya 55:11.) Pod ogombo ahinya miyo dhano ma winje ngima ma nyaka chieng’. Wachno nenore maler ka wanono gik ma Jehova osewacho kata mosetimo mondo ochop dwacheno.

9. En ang’o ma Nyasaye osingonwa? (Daniel 12:2, 13)

⁹ Jehova osingo ni obiro chiero jomotho, kendo miyogi thuolo mar dak nyaka chieng’. (Tich 24:15; Tito 1:1, 2) Ayub ne ni gadier ni Jehova gombo chiero jomotho. (Ayub 14:14, 15) Janabi Daniel nong’eyo ni ibiro chier jomotho kendo ni ibiro migi thuolo mar dak nyaka chieng’. (Zab. 37:29; som Daniel 12:2, 13.) Jo-Yahudi ma nodak e ndalo Yesu bende nong’eyo ni Jehova ne dhi miyo jotichne “ngima mochwere.” (Luka 10:25; 18:18) Yesu nowuoyo nyadinwoya e wi singono, kendo en owuon nochiere.​—Mat. 19:29; 22:31, 32; Luka 18:30; Joh. 11:25.

10. Chier ma notimore e ndalo machon nyiso ang’o? (Ne picha.)

¹⁰ Jehova e Jachiw Ngima kendo en gi teko mar chiero jomotho. Nomiyo Elija teko mar chiero wuod chi liel moro ma nodak Zarefath. (1 Ru. 17:21-23) Kinde moko bang’e, nomiyo Elisha teko mar chiero wuod miyo moro ma Nya-Shunem. (2 Ru. 4:18-20, 34-37) Joma Elija gi Elisha nochierogo kod jomamoko ma bende nochier, nyiso ni Jehova nigi teko mar dwoko ne jomotho ngima. Ka ne Yesu nie piny ka, gik ma notimo nonyiso ni Wuon-gi nomiye teko mar chiero ji. (Joh. 11:23-25, 43, 44) Sani koro Yesu ni e polo kendo “osemiye teko duto e polo gi piny.” Omiyo, en gi nyalo mar chiero “ji duto manie liete” ka gin gi geno mar dak nyaka chieng’.​—Mat. 28:18; Joh. 5:25-29.

11. Ere kaka misango mar Yesu miyowa thuolo mar dak nyaka chieng’?

¹¹ Ang’o momiyo Jehova noyie mondo Wuode mohero otho tho malit? Yesu nochiwo dwoko mar penjono ka nowacho niya: “Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.” (Joh. 3:16) Kuom chiwo misango mar Wuode mondo oum richowa, Nyasaye noyawonwa thuolo mar yudo ngima ma nyaka chieng’. (Mat. 20:28) Jaote Paulo nolero wach ma notudore gi dwach Nyasayeno ka nondiko niya: “Nimar ka tho nobiro kokalo kuom ng’ato achiel, jo motho bende ibiro chier kokalo kuom ng’ato achiel. Mana kaka kuom Adam dhano duto tho, e kaka bende kuom Kristo dhano duto biro bedo mangima.”​—1 Kor. 15:21, 22.

12. Ere kaka Pinyruoth biro konyo e chopo dwach Jehova ne dhano?

¹² Yesu nopuonjo jolupne ni gilem mondo Pinyruodh Nyasaye obi mondo dwach Nyasaye otimre e piny. (Mat. 6:9, 10) Achiel kuom dwaro mag Nyasaye en ni dhano odag e piny ka nyaka chieng’. Mondo dwarono ochopi, Jehova oseketo Wuode mondo obed Ruoth mar Pinyruodh Mesia. Nyasaye osebedo ka choko ji 144,000 koa e piny mondo gibi giti gi Yesu e chopo dwacheno.​—Fwe. 5:9, 10.

13. Ang’o ma Jehova osebedo ka timo e kindegi, to ang’o ma in iwuon onego itim?

¹³ Jehova sani choko ‘oganda mang’ongo’ kendo otiegogi mondo gibed raia mag Pinyruodhe. (Fwe. 7:9, 10; Jak. 2:8) Kata obedo ni joma nie oganda mang’ongono odak e piny mopong’ gi luoro kod lwenje, gitemo matek mondo weche kaka mago kik mi gibuon jowetegi nikech oganda ma giae kata dhok ma giwacho. Ng’ato ka ng’ato kuomgi osethedho liganglane e yor ranyisi mobedo kwer. (Mika 4:3) Kar riwo lwedo lwenje mosemiyo ji mang’eny otho, gin gidich gi konyo ji yudo “ngima madier” kuom puonjogi e wi Nyasaye madier kod dwache. (1 Tim. 6:19) Joutegi nyalo kwedogi kata ginyalo yudo pek mag yuto nikech giriwo lwedo Pinyruodh Nyasaye, kata kamano, Jehova nenoga ni giyudo gik moko duto ma gichando. (Mat. 6:25, 30-33; Luka 18:29, 30) Wechego konyowa bedo gadier ni Pinyruodh Nyasaye nitie kendo ni obiro dhi nyime chopo dwach Jehova.

NGIMA MABER OKAYO MACHIEGNI

14-15. Ere kaka Jehova biro chopo singone mar tieko tho chuth?

¹⁴ Yesu sani locho e polo kendo obiro neno ni singo duto mag Jehova ochopo kare. (2 Kor. 1:20) Chakre higa mar 1914, Yesu osebedo ka loyo jowasike. (Zab. 110:1, 2) Machiegnini, Yesu kod joloch wetene biro loyo piny marachni kuom tieko joma richo kod gik maricho duto.​—Fwe. 6:2.

¹⁵ E kinde loch mar Higni Aluf Chiel mar Yesu, jomotho ibiro chier kendo dhano ma winjo Nyasaye ibiro mi ngima makare chuth. Bang’ tem mogik, joma Jehova biro ng’ado ni gin joma kare biro bedo “weg piny, kendo ginidagie nyaka chieng’.” (Zab. 37:10, 11, 29) Wamor ni “jasigu mogik ma ibiro tiek en tho.”​—1 Kor. 15:26.

16. En ang’o maduong’ monego ochwalwa tiyo ne Jehova?

¹⁶ Mana kaka waseneno, Wach Nyasaye siro geno ma wan-go mar dak nyaka chieng’. Genono nyalo konyowa chung’ motegno e kinde matek mag ndalo gikogi. Kata kamano, ok onego watim gik ma moro Jehova mana nikech wagombo dak nyaka chieng’. Nitie gik mamoko monego ochwalwa tiyone. Wach maduong’ momiyo wadwaro siko ka wamakore gi Jehova kod Yesu en ni waherogi ahinya. (2 Kor. 5:14, 15) Herano chwalowaga mondo waluw ranyisi margi kendo watim kinda e lando ne jomamoko geno ma wan-go. (Rumi 10:13-15) Kaka wamedo puonjore bedo joma ohero jowetegi kendo jochiwo, e kaka wabiro bedo joma Jehova diher makogo osiep nyaka chieng’.​—Hib. 13:16.

17. En ting’ mane ma ng’ato ka ng’ato kuomwa nigo? (Mathayo 7:13, 14)

¹⁷ Be wabiro bedo e kind joma biro yudo ngima ma nyaka chieng’? Jehova oseyawonwa thuolo mar yudo ngima ma kamano. Koro wan e ma wan gi ting’ mar neno ni wasiko e yo ma terowa e ngima ma nyaka chieng’. (Som Mathayo 7:13, 14.) Ngima biro chalo nade e kinde ma wabiro dak nyaka chieng’? Wabiro nono dwoko mar penjono e sula ma luwo.