Pogo Ber gi Rach: Puonj ma Nyalo Konyowa
Ne ane weche moko ang’wen ma ji tara gi tara osefwenyoe ni puonj mag Muma nyalo konyogie e pogo ber gi rach.
1. Kend
Ji nigi paro mopogore opogore e wi kend kod gima ginyalo timo mondo gibed mamor e kend.
MUMA WACHO KAMA: “Ng’ato ka ng’ato kuomu nyaka her chiege kaka oherore owuon; to dhako bende onego omi chwore luor matut.”—Jo-Efeso 5:33.
TIEND NDIKONO: Nyasaye e ma nochako chenro mar kend, omiyo, ong’eyo gik ma dwarore ni joma okendore otim mondo kend margi obed gi mor. (Mariko 10:6-9) Joma okendore nyalo bedo mamor ka ng’ato ka ng’ato kuomgi oketo pache kuom gima onyalo timo mondo oteg kend margi kar keto pache kuom gima nyawadgi ok tim. Dichwo mohero chiege timone gik mabeyo kendo orite. To dhako momiyo chwore luor biro nyiso mano e yo mowuoyogo kode kod gik motimone.
KAKA MUMA OSEKONYO JOMOKO: Kend mar Quang gi Thi, ma wuok Vietnam ne ok dhi maber. Quang ne ok dewga jaode. Owacho kama: “Ne ok adewga Thi, kendo natimoga gik ma ne kuodo wiye.” Thi ne dwaro ni giketh kend margi. Nowacho kama: “Nawinjo ka ok anyal dhi nyime geno jaoda kata miye luor.”
Gikone, Quang gi Thi nopuonjore Muma kendo ne gichako tiyo gi ndiko mar Jo-Efeso 5:33 e kend margi. Quang wacho kama: “Ndikono nokonya ng’eyo gimomiyo onego abed mang’won gi Thi, kendo atim gik ma miyo owinjo ni ahere kendo arite maber. Timo kamano osemiyo ochako hera kendo miya luor.” Thi to wacho kama: “Kaka amedo tiyo gi ndiko mar Jo-Efeso 5:33 kendo miyo jaoda luor, e kaka amedo winjo ni ohera, orita maber, kendo abedo gi chuny mokuwe.”
Mondo iyud weche momedore e wi kend, som gaset mar Nenuru! Na. 2 higa 2018 ma wiye wacho ni, “Weche 12 Manyalo Konyo Joot Odag gi Kuwe,” ma yudore e jw.org/luo.
2. Kaka Waneno Jomamoko
Ji timonega jomamoko gik maricho nikech oganda ma giwuokie, piny ma gidakie, kaka ginenore gi oko, din ma gilemoe, kata kaka gineno weche mag nindruok.
MUMA WACHO KAMA: “Miuru ji duto duong’.”—1 Petro 2:17.
TIEND NDIKONO: Muma ok puonjwa ni wabuon jomamoko nikech piny kata oganda ma giae, kata nikech paro ma gin-go e wi nindruok e kind chuech machal. Kar mano, ojiwowa ni wachiw luor ne ji duto, bed ni gia e oganda mane, gidak e piny mane, kata giyie gi puonj mage. (Tich Joote 10:34) Kata ka ok wayie gi gik ma jomamoko oyiego kata ma gitimo, pod onego wamigi luor kendo wanyisgi ng’wono.—Mathayo 7:12.
KAKA MUMA OSEKONYO JOMOKO: Nochak puonj Daniel ka pod otin ni joma wuok e pinje mag Asia ne ok gin jo mabeyo kendo ni ne ginyalo kelo hinyruok ne pinygi. Mano nomiyo ochako chayo ng’ato ang’ata ma wuok Asia kendo nonyalo kata yanyogi e lela. Daniel wacho kama: “Naneno ni akedo ne pinywa. Ne ok ane ni gik ma natimogo ne richo.”
Gikone, Daniel nopuonjore Muma. Owacho kama: “Ne dwarore ni alok pacha chuth. Ne nyaka achak neno jomamoko kaka Nyasaye nenogi kendo ng’eyo ni waduto warom e wang’ Nyasaye bed ni wawuok e oganda mane.” Daniel lero kaka tinde owinjo sama oromo gi joma wuok e oganda machielo. Owacho kama: “Tinde ok aket pacha kuom oganda ma ng’ato ae. Ahero ji duto kendo an gi osiepe ma wuok e pinje mopogore opogore.”
Mondo iyud weche momedore, som gaset mar Amkeni! Na. 3 higa 2020, ma wiye wacho ni, “Je, Inawezekana Kuushinda Ubaguzi?” ma yudore e jw.org/sw.
3. Pesa
Ji mang’eny manyo mwandu ka giparo ni mano nyalo kelonegi mor kod ngima maber e kinde mabiro.
MUMA WACHO KAMA: “Rieko nyalo geng’o chandruok mana kaka pesa bende konyo, to gima rieko oloyogo pesa en ni: Rieko reso ngima ng’at man kode.”—Eklesiastes 7:12.
TIEND NDIKONO: En adier ni dwarore ni wabed gi pesa, kata kamano, pesa ok nyal miyowa mor madier kata geno mar kinde mabiro. (Ngeche 18:11; 23:4, 5) Kar mano, wanyalo yudo mor madier kendo bedo gi geno mar kinde mabiro ka watiyo gi rieko mar Nyasaye ma yudore e Muma.—1 Timotheo 6:17-19.
KAKA MUMA OSEKONYO JOMOKO: Cardo ma wuok Indonesia noketo pache e manyo mwandu. Owacho kama: “Ne an gi gimoro amora ma ng’ato nyalo gombo bedogo. Nanyalo dhi bayo kamoro amora ma adwaro, ng’iewo gimoro amora ma chunya gombo, obed ot kata mtoka.” Mwandunego nolal mana ka yamo. Owacho kama: “Jomoko nowuonda, ma pesa ma nasebedo ka atiyone matek kuom higni mang’eny nolal mana ka diemo wang’. Natiyo gi thuolo mang’eny e manyo mwandu, to gikone nadong’ mana ka piny ochama, achara, kendo akuyo.”
Cardo nochako tiyo gi puonj ma Muma chiwo e wi pesa. Tinde ok oketo pache e manyo mwandu, kendo oyiero dak e ngima mayot. Owacho kama: “Sani an gi mor madier nikech an gi mwandu ma nengone tek, tiende ni winjruok maber gi Jehova. Gie sani, anyalo nindo mayom kendo mokuwe ma onge gima chando chunya.”
Mondo iyud weche momedore e wi paro ma Muma nigo kuom pesa, som sula ma wacho ni, “Be Somo kod Pesa Nyalo Miyo Idag Maber e Kinde Mabiro?” e Ohinga mar Jarito Na. 3 higa 2021 ma yudore e jw.org/luo.
4. Nindruok
Ji nigi paro mopogore opogore e wi nindruok.
MUMA WACHO KAMA: “[Wereuru] gi terruok. Ng’ato ka ng’ato kuomu onego ong’e kaka onyalo chiko ringrene e yo maler kendo e yor luor, ok ka uoworu gi gombo mag terruok kaka ogendni ma ok ong’eyo Nyasaye timo.”—1 Jo-Thesalonika 4:3-5.
TIEND NDIKONO: Muma nyisowa ni onego wabed gi tong’ e weche mag nindruok. Timbe mag “terruok” oriwo chode, nindruok e kind joma ok okendore, nindruok e kind chuech machal, kata nindo gi le. (1 Jo-Korintho 6:9, 10) Nindruok en mich moa kuom Nyasaye ne joma okendore kende.—Ngeche 5:18, 19.
KAKA MUMA OSEKONYO JOMOKO: Miyo moro ma wuok Australia miluongo ni Kylie wacho kama: “E kinde ma ne an rawera, naparo ni ka adonjo e timbe mag nindruok to ne adhi winjo ka ohera kendo orita maber. To kare ne ok en kamano. Nawinjo ka chunya onyosore kendo piny nochama.”
Bang’e, Kylie nopuonjore Muma kendo nochako tiyo gi paro ma Muma chiwo e wi wach nindruok. Owacho kama: “Naneno kaka puonj mag Muma nyalo geng’onwa hinyruok kod lit ma ok ochuno ni wayudi. Sani awinjo ka ohera gi hera madier kendo an gi chuny mokuwe nikech atimo gik moko e yo ma Jehova dwaro. Tiyo gi puonj mag Muma osekonya ahinya kendo geng’ona lit ma ng’ato nyalo yudo ka otimo gik moko e yore owuon!”
Mondo iyud weche momedore, som sula ma wacho ni, “Ang’o ma Muma Wacho e Wi Dak Kanyachiel ka Pok Ukendoru?” ma yudore e jw.org/luo.
Jachuechwa konyowa ng’eyo gik mabeyo monego watim kod gik maricho ma ok onego watim. Kata obedo ni luwo chikege ma tayo timbe mabeyo seche moko nyalo bedo matek, wayudo ber mathoth sama waluwogi. Wanyalo bedo gadier ni ka waluwo chikego, to wabiro yudo mor madier kendo mosiko.