7 TEHNATE

A AWMZIA

Tehna chu nunpui atâna i thlan mi mal tehnate a ni a. Entîr nân, thil engkimah dik taka tih i tum em? I tum a nih chuan, i fate chu chutiang nungchang ṭha chu nei tûrin i duh ngei ang.

Tehnaah chuan rilru lama tehnate a tel bawk. Entîr nân, rilru dik tak putu chu mi taima, fel taka thil ti ṭhîn, leh mi dangte ṭhatna tûr ngaihtuahtu a ni a—chûngte chu i naupan lai aṭanga i neih ngai miziate a ni.

BIBLE THU BUL: “Naupang chu a kalna âwm kawngah chuan zirtîr ula, a upat hun pawhin a thlah lo vang.”—Thufingte 22:6.

A PAWIMAWH CHHAN

Tûn lai thiamna khawvêlah hian, nungchang ṭha hi thil pawimawh tak a ni. Nu pakhat Karyn-i chuan: “Thununna ṭha lo chu electronic hmanraw tinah hian hmuh tûr a awm reng a, kan fate chuan kan bula an ṭhut reng lai pawhin, thil ṭha lo eng emaw an lo en reng thei zu nia!” tiin a sawi.

BIBLE THU BUL: “Puitlingte chuan . . . chhia leh ṭha fiah tûrin an hriat theihnate chu an sawizawi tawh.”—Hebrai 5:14.

Rilru ṭha neih pawh hi thil pawimawh tak a ni. Chutah chuan (“khawngaih takin” tih leh “ka lâwm e” tih ang chi) hawihhâwm taka mite biak leh mi dangte chunga ngaihsakna lantîrna a tel a—mite chuan an mihringpuite aia electronic lam thilte an ngaihsak tawh zâwk avângin rilru ṭha tak nei an tlêm tawh hle a ni.

BIBLE THU BUL: “Miin in chunga an tiha in duh tûr ang zêlin mi chungah pawh ti ve rawh u.”—Luka 6:31.

I TIH THEIHTE

I nungchang ṭha chu lantîr rawh. Entîr nân, inneih hmaa mipat hmeichhiatna hman hi thil sual a ni tih zirtîrna dawngtu tleirâwlte chuan chu chu an pumpelh tlângpui tih zir bingnain a târ lang.

THURAWN: Tehna chungchâng sawiho nân tûn hnaia thilthleng pakhat hmang rawh. Entîr nân, chanchinbu-ah dân bawhchhiatna târ lan a nih chuan: “Mi ṭhenkhatin mi dang chunga thinrimna an hrîkthlâk dân hi a râpthlâk khawp mai. Engvângin nge chutiang mi an rawn nih theih nia i rin?” tiin i sawi thei a ni.

“Naupangte hian thil dik leh dik lo an hriat loh chuan, eng nge dik a, nge nge dik lo tih an tân thliar hran a harsa viau vang.”—Brandon-a.

Rilru put hmang ṭha chungchâng zirtîr rawh. Naupangte pawhin “khawngaih takin,” tih leh “ka lâwm e,” tih ṭawngkamte hman dân leh mi dangte chunga zahna lantîr dân chu an zir thei a. “Naupangte chuan chhûngkuaah, school-ah, leh khawtlângahte tel ve nia inhriatna an neih poh leh mahni tân chauh ni lovin, mi dang chunga ngilneihna lantîr chu an tân a awlsam lehzual ang,” tiin Parenting Without Borders tih lehkhabu chuan a sawi.

THURAWN: Naupangte chu mi dangte thil tihsak a hlutzia hre tûrin in chhûng sekrek thawhtîr ang che.

“Kan fate’n in chhûng sekrek an thawk ṭhîn a nih chuan, mahnia an khawsak hunah harsatna an tâwk lo vang a. Mawhphurhna lâk nachâng hretute an ni ang.”—Tara-i.