Governing Body Hnên Aṭanga Lehkha Thawn

Jehova Hmangaihtu Duh Takte U:

Isua chuan: “Thutak in hria ang a, thutak chuan bâwih a bân ang che u,” a ti a. (Johana 8:​32) Mi ­tichaktu ṭawngkam a va ni êm! Ni e, dâwt thu a hluar êm êmna he ‘ni hnuhnûng’ hun khirh tak kârah pawh hian thutak chu hriat theih a ni. (2 Timothea 3:⁠1) ­Pathian Thu, Bible-a hrilhfiah thutak i hriat hmasak ber hun chu i hre chhuak thei em? Chu hun chu a va phûrawm êm!

Mahse, thutak hriatna dik neih leh mi dangte hnêna hrilh chhâwn a pawimawh ang tlukin, thutak nunpui chu a pawimawh bawk a ni. Thutak nunpui tûr chuan Pathian hmangaihnaa kan invawn ṭhat a ngai a. Chutah chuan eng nge tel? Isua’n a thih hma zâna a thusawi hian he zawhna hi a chhâng a ni. Tirhkoh rinawmte hnênah chuan: “Nangnin ka thupêkte in zawm chuan ka hmangaihin in awm reng ang; keiin ka Pa thupêkte ka zâwm a, a hmangaihin ka awm reng ang bawk hian,” tiin a sawi.​​—⁠Johana 15:⁠10.

Isua chu a Pa thupêkte zawmna hmangin Pathian hmangaihnaah a awm reng tih chhinchhiah ang che. Chutiang bawk chu kan tân pawh a ni. Pathian hmangaihnaa invawng ṭha tûr chuan, kan nî tin nunah thutak kan nunpui a ngai a. Chumi tlaiah, Isua chuan: “Chûng thil chu in hriat chuan ti ula in eng a thâwl ang,” tiin a sawi bawk a ni.​​—⁠Johana 13:⁠17.

He lehkhabu hian “chatuan nunna neihtîrna khawp . . . Pathian hmangaihnaah” i invawn ṭhat theih nâna thutak nunpui zêl tûra a ṭanpui che chu kan beisei tlat a ni.​​—⁠Juda 21.