“Thutak Thlarau” I Dawng Tawh Em?
“Pa . . . chuan ṭanpuitu dang a pe ang che u, chatuana in hnêna awm tûrin; chu chu thutak thlarau a ni.”—JOHANA 14:16, 17, NW.
1. Pindan chungnunga a zirtîrte nêna a hun hnuhnûng ber an hman lai khân Isua’n eng thu pawimawh tak nge anni chu a hrilh?
“LALPA, khawiah nge i kal dâwn?” He thu hi Jerusalem pindan chungnunga a tirhkohte nêna hun hnuhnûng an hman laia Isua tirhkohte zawhna pakhat a ni. (Johana 13:36) An inkhâwm laiin Isua’n anmahni kal san a, a Pa hnêna a kîr hun a thleng tawh tih a hrilh a. (Johana 14:28; 16:28) Anmahni zirtîr tûr leh an zawhnate chhâng tûrin an zîngah mihring taksa puin a awm zui tawh dâwn lo a ni. Nimahsela, hetiang hian anni chu a tiam a: “Pa ka dîl ang a, ani chuan thlamuantu [“ṭanpuitu,” NW] dang a pe ang che u, chatuana in hnêna awm tûrin,” tiin.—Johana 14:16.
2. Isua’n a kal bo hnuah eng tîr tûrin nge a zirtîrte chu a tiam?
2 Isua chuan a zirtîrte hnênah chuan chu ṭanpuitu chungchâng leh chu chuan anmahni a ṭanpui dân tûr pawh a hrilhfiah a. Hetiang hian a sawi: “Hêng thil hi atîr ata ka la hrilh lo rêng che u a ni, in hnêna ka la awm avângin. Tûnah erawh zawng mi tîrtu hnênah ka kal dawn a ni; . . . ka kal in tân a ṭha e; ka kal loh chuan thlamuantu [“ṭanpuitu,” NW] chu in hnênah a lo kal dâwn si lo; ka kal erawh chuan in hnênah ka rawn tîr ang. . . . Thlarau dik tak [“thutak thlarau,” NW] chu a lo thlen hun chuan thutak zawng zawngah chuan a hruai lût ang che u,” tiin a hrilh a ni.—Johana 16:4, 5, 7, 13.
3. (a) Engtikin nge “thutak thlarau” chu Kristian hmasa te hnênah tirh a nih? (b) Thlarau chu an tâna “ṭanpuitu” a nih dân kawng pawimawh tak pakhat chu eng nge ni?
3 He thutiam hi C.E. 33, Pentikost nî khân a thleng famkim a. Petera chuan tihian a sawi: “Chu Isua chu Pathianin a kai tho leh ta rêng a ni, chu chu a hretu kan zain kan ni e. Pathian kut ding lamah chawimawiin a awm a, thlarau thianghlim tiam chu Pa hnên ata a hmu a, in hmuh leh in hriat hi a han leih a nih hi,” tiin. (Tirhkohte 2:32, 33) Kan la hmuh tûr angin, Pentikost nia thlarau thianghlim leihbuak chuan Kristian hmasate chu thil tam tak a tihtîr a ni. Mahse, Isua chuan “thutak thlarau” chuan ‘an hnêna a sawi zawng zawng a hriat chhuahtîr leh ang,’ tih a tiam a ni. (Johana 14:26) Chu chuan Isua rawngbâwlna leh zirtîrnate hre chhuak thei tûr leh a ṭawngkam ngeite hre chhuak a, ziaka chhinchhiah tûrin a ṭanpui ang. Chu chu tirhkoh upa tawh tak Johana, C.E. kum zabi pakhatna tâwp lama Chanchin Ṭha ziaktu tân chuan a ṭangkai lehzual a ni. A thuziakahte hian Isua’n a thih Hriatrengna a hmanpui laia fuihna thu hlu tak a pêkte pawh a tel a ni.—Johana, bung 13-17.
4. Engtin nge “thutak thlarau” chuan hriak thih Kristian hmasate a ṭanpui?
4 Isua chuan zirtîr hmasate chu, chu thlarau chuan “engkim a zirtîr” bâkah, “thutak zawng zawngah a hruai lût ang” tih a tiam bawk a ni. Chu thlarau chuan Pathian Lehkha Thu, thuril tak takte a hriatthiamtîr ang a, ngaihtuahna te, hriatthiamna te, leh thil tumte kawnga an inpumkhatna vawng tûrin a ṭanpui bawk ang. (1 Korinth 2:10; Ephesi 4:3) Tichuan, thlarau thianghlim chuan chûng Kristian hmasate chu a huhova “bawi rinawm, fing tak” angin, mi mal hriak thih Kristiante chu ‘a hun apianga thlarau lam chaw’ pe tûrin a thuam a ni.—Matthaia 24:45.
Thlarau Chuan A Hriattîr
5. (a) Nisan ni 14, C.E. 33 zânah eng beisei tûr thar nge Isua’n a zirtîrte hnênah a hriattîr? (b) Isua thutiam thlen famkimnaah thlarau thianghlimin eng dinhmun nge a chelh?
5 C.E. 33, Nisan 14 zân khân, Isua chuan a zirtîrte hnênah amah leh a Pa hnêna awm tûra vâna lâk an nih tûr thu a hrilh thawi a ni: “Ka Pa inah awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi. Tin, in tân hmun ka han siam chuan ka lo kîr leh ang a, ka hnênah ka la ang che u; ka awmnaah nangni pawh in awm theih nân,” tiin. (Johana 13:36; 14:2, 3) A Lalramah amah nên rorêlin an awm dâwn a ni. (Luka 22:28-30) He vân lam beiseina nei tûr hian, Pathian thlarau lam fate anga “thlarauva piang” an ni tûr a ni a, vâna Krista ruala lal leh puithiamte ni tûra hriak thih an nih a ngai a ni.—Johana 3:5-8; 2 Korinth 1:21, 22; Tita 3:5-7; 1 Petera 1:3, 4; Thu Puan 20:6.
6. (a) Engtikin nge van lam kohna a inṭan a, chu kohna chu mi engzâtin nge dawng? (b) Chûng kohte chu enga baptis nge an nih?
6 He “vân kohna” hi C.E. 33 Pentikost nîah a inṭan a, 1935 vêl khân a zualpui chu thlan zawh a ni. (Hebrai 3:1) Chu thlarau lam Israel ni tûra thlarau thianghlima chhinchhiah zât chu mi 144,000 an ni a, “mihring zîng ata tlan” an ni. (Thu Puan 7:4; 14:1-4) Anni chu Krista thlarau lam taksaah baptisma changin, a kohhran zînga mi an lo ni a, a thihnaah pawh baptist an ni. (Rom 6:3; 1 Korinth 12:12, 13, 27; Ephesi 1:22, 23) Tuia baptis leh thlarau thianghlima hriak thih an nih hnu chuan, inthawina nun kawng, an thih thlenga rinawmna nun kawngah chuan an lût ṭan a ni.—Rom 6:4, 5.
7. Engvângin nge hriak thih Kristiante chuahvin Hriatrengna entîrnate chu an eia an in theih?
7 Thlarau lam Israel an nih angin, hêng hriak thih Kristiante hi Jehova leh “Pathian Israelte” inkâra siam, thuthlung thara mi an lo ni a. (Galatia 6:16; Jeremia 31:31-34) Chu thuthlung thar chu Krista thisen chhuak chuan a nemnghet a ni. Chu chu Isua ngeiin a thih Hriatrengna a hman khân a sawi a ni. Luka chuan heti hian a ziak: “Chhang a la a, lâwmthu a sawi zawhin a phel a, an hnênah a pe a, ‘Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,’ a ti a. Tin, zanriah ei zawhin chutiang bawkin no chu a la a, ‘He no hi ka thisena thuthlung thar chu a ni, in aia chhuak tûra chu,’” a ti a. (Luka 22:19, 20) Tichuan, a la bâng, a nih loh leh 144,000 te zînga he leia la awmte chauhvin Krista thih Hriatrengnaa entîrna chang leh uain chu an eiin, an in a ni.
8. Engtin nge hriak thihte’n van lam kohna an dawng tih an inhriat?
8 Engtin nge hriak thihte chuan van lam kohna an dawng tih an inhriat theih? Hriat sual theih hauh loh thlarau thianghlima hriattîrna an dawng a ni. Chûng mite chungchâng chu tirhkoh Paula’n heti hian a ziak a ni: “Pathian thlarau hruaia awm apiangte chu Pathian fate an ni . . . Thlarau ngei chuan keimahni thlarau nên Pathian fate kan ni tih min hriattîr ṭhîn; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnêna chawimawiin kan awm ve theihna tûrin amah kan tuarpui tak zet chuan,” tiin. (Rom 8:14-17) He hriattîrtu thlarau hian thil a tihtheih êm avângin, van lam kohna changtute tân chuan inrinhlelh theih a ni lo. Chuvângin, inrinhlelhna chhe tê pawh nei apiang chu koh an nih loh vâng a ni a, chûng mite chuan Hriatrengna entîrnate chu an ei lo hmak mai ang.
Thlarau leh Berâm Dangte
9. Chanchin Ṭha ziakahte leh Thu Puanah chuan eng pâwl chi hnih chungchâng nge sawi a nih?
9 Thlarau lam Israelte ni tûra koh Kristiante chu bituk chin nei a ni tih hriain, Isua chuan “pâwl tlêmte” tiin a ko va. Anni chu Isua’n a la hruai tûr, chhiar sên loh “berâm dang” ang lovin, thuthlung thar “berâm huanga” dah an ni. (Luka 12:32; Johana 10:16) Chûng berâm dang, tâwpna huna lâkkhâwmte chu, “mipui tam tak,” he lei paradis-a chatuan nun chang tûra “hrehawm nasa tak” ata dam khawchhuak tûrte an ni. Mak tak maiin, C.E. kum zabi pakhatna tâwp lama Johana inlârna hmuhah chuan, he mipui tam takte leh thlarau lam Israel mi 144,000 te hi a thlei hrang a ni. (Thu Puan 7:4, 9, 14) A nih leh, berâm dangte’n thlarau thianghlim an dawng ve em? An dawng ve a nih chuan chu chuan engtin nge an nun a nghawng?
10. Engtin nge berâm dangte chuan “Pa leh Fapa leh thlarau thianghlim hmingah” chuan baptisma an chan?
10 Thlarau thianghlim chuan berâm dangte nunah pawh hmun pawimawh tak a chelh a. Anni chuan ‘Pa leh Fapa leh thlarau thianghlim hminga’ baptisma changin, Jehova hnêna an inpumpêkna chu an lantîr a ni. (Matthaia 28:19) Jehova lal chungnunna chu an pawm a, Krista chu an Lal leh Chhandamtua pawmin a hnênah an intulût a, an nuna Pathian thlarau thiltih, a nih loh leh a chakna chevêl thiltih, lakah chuan an intulût bawk a ni. Nî tinin, an nunah “thlarau rah,” “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” lantîr an tum reng a ni.—Galatia 5:22, 23.
11, 12. (a) Eng kawngin nge hriak thihte chu a bîk taka tihthianghlim an nih? (b) Eng kawngin nge berâm dangte chu tihthlianghlim an nih?
11 Berâm dangte pawhin Pathian Thu leh a thlarau thianghlim chu anmahni an intihthianghlimtîr, a nih loh leh an intihfaitîr tûr a ni. Hriak thihte chuan kawng danglam bîk tak, Krista mo anga fel leh thianghlima puan niin, an intithianghlim diam tawh a ni. (Johana 17:17; 1 Korinth 6:11; Ephesi 5:23-27) Zâwlnei Daniela chuan anni chu “Chungnungbera mi thianghlimte,” “mihring fapa,” Isua Krista hnuaia Lalram changtute tiin a sawi a ni. (Daniela 7:13; 14, 18, 27) Chu mi hma daihah chuan Mosia leh Arona kal tlangin, Jehova chuan Israel hnamte hnênah hetiang hian a lo puang chhuak a: “Kei hi LALPA in Pathian ka ni a; chuvângin intithianghlim ula, thianghlimin awm rawh u; kei ka thianghlim si a,” tiin.—Leviticus 11:44.
12 “Tihthianghlimna” tih thumal awmzia tak chu “tihthianghlim tûra siam leh thliar hran, a nih loh leh, rawng bâwl tûr emaw, Jehova hman atân emawa indah hrang; thianghlim taka awmna, intihthianghlimna, a nih loh leh intihfaina” a ni. Kum 1938 tîr lam khân, Vênnainsâng chuan Jonadaba-ho, a nih loh leh berâm dangte chuan, “mipui nasa tak zînga lo tel a, leia chatuana nung tûr apiangte chuan inpumpêkna leh intihthianghlimna an mamawh tih an hre vek tûr a ni,” a ti. Thu Puan bua chhinchhiah, mipui tam tak hmuhna inlârnaah chuan, chûng mite chu ‘an puante Berâm No thisena sua tivâr’ leh, Jehova hnêna ‘achhûn azâna a biak ina rawng bâwl ṭhîn’ anga sawi an ni. (Thu Puan 7:9, 14, 15) Thlarau thianghlim ṭanpuinain, berâm dangte chuan thianghlimna chungchânga Jehova tehnate chu tlin tumin theihtâwp an chhuah a ni.—2 Korinth 7:1.
Krista Unaute Laka Thil Ṭha Tih
13, 14. (a) Isua sawi kêl leh berâm tehkhin thu aṭang hian berâmte chhandamna chu engah nge a innghah? (b) He tâwpna hunah hian, engtin nge berâm dangte chuan Krista unaute chungah thil ṭha an tih?
13 Isua chuan “khawvêl tâwpna” hrilh lâwknaa a telh, kêl leh berâm tehkhin thu a sawinaah berâm dangte leh pâwl tlêmte inkâra inzawmna nghet tak chu a sawi chiang hle a ni. Chu tehkhin thuah chuan, Krista chuan berâm dangte chhandamna chu “ka unaute” tia a koh, hriak thihte chunga an thiltih nên a inkungkaih a ni tih chiang takin a târ lang: “Lalber chuan a ding lama mite hnênah chuan, ‘Ka pa voh bîkte u, lo kal ula khawvêl siam ṭantirh ata in tâna ram buatsaih chu chang rawh u; . . . Tih tak meuhvin ka hrilh a che u, hêng ka unau tê berte zînga mi pakhat chunga in tih chu ka chunga ti in ni,’” tiin.—Matthaia 24:3; 25:31-34, 40.
14 He ṭawngkam “in tih” tih hian Setana khawvêlin mikhual anga a thlîr, tân inah hial a tântîr Krista thlarau lam unaute hmangaih taka ṭanpuina a kâwk a ni. Anni chuan ei tûr te, thuamhnaw te, leh an hrisêlna lam ngaihsakte an mamawh ṭhîn. (Matthaia 25:35, 36) Kum 1914 aṭanga inṭan he tâwpna hunah hian, hriak thih tam takte chu chutiang dinhmunah chuan an ding a. Tûn laia Jehova Thuhretute chanchin chuan, hriak thihte chu an ṭhian rinawm, berâm dangte chuan thlarau chêttîr zia ang zêlin an ṭanpui a ni tih a finfiah a ni.
15, 16. (a) Eng thilah nge berâm dangte chuan he leia hriak thih Krista unaute chu an ṭanpui bîk? (b) Engtin nge hriak thihte chuan beram dangte chunga an lâwmna chu an sawi chhuah?
15 He tâwpna hunah hian, ‘he ram chanchin ṭha hi hnam zawng zawng hriattîrna tûra khawvêl zawng zawnga hrilh’ tûra Pathian hna pêk an hlenchhuahnaah Krista hriak thih unaute chuan berâm dangte ṭanpuina nasa takin an dawng a ni. (Matthaia 24:14; Johana 14:12) He leia hriak thihte a kum a kuma an tlêm telh telh lai hian, berâm dangte chu maktaduai têl an lo ni tawh a. Hêng zînga sâng tam takte hian hun bikima chanchin ṭha hriltu—pioneer leh missionary—angin rawng an bâwl a, ‘kâwlkil thlengin’ Lalram chanchin ṭha chu an thehdarh a ni. (Tirhkohte 1:8) Mi dangte chuan an theih anga tam thuhrilh rawngbâwlnaa tel pahin, he rawngbâwlna pawimawh tak hi sum leh paiin hlim takin an ṭanpui a ni.
16 Krista hriak thih unaute chu an ṭhian berâm dangte rinawm taka thlâwpna chungah an va lâwm tak êm! An lâwmzia chu Worldwide Security Under the “Prince of Peace,” tih lehkhabu kum 1986-a bâwih pâwl tihchhuahah hian chiang taka sawi lan a ni. Chutah chuan hetiang hian a inziak a: “Khawvêl Indopui II-na aṭang khân, ‘khawvêl tâwpna’ chungchânga Isua hrilh lâwkna thu chu ‘berâm dang’ zînga mi ‘mipui tam takte,’ avânga hlen chhuah a ni deuh thaw tawh a ni. . . . Chuvângin, Matthaia 24:14-a [Isua] hrilh lâwkna thlen famkimnaa an chanvo pawimawh tak avângin, khawvêla ṭawng tin zînga mi ‘mipui tam takte’ chungah lâwmthu kan sawi mawlh mawlh a ni!” tiin.
‘Keini Tel Lovin An Famkim Lo’
17. Eng kawngin nge hmân laia mi rinawm, he leia lo tho leh tûrte chu hriak thihte ‘tel lova tihfamkim an nih loh’?
17 Hriak thih zînga mi anga insawiin, Krista hmaa lo awm mi rinawm a hmei a pate chungchâng chu tirhkoh Paula chuan tihian a ziak a: “Chûng zawng zawngte chuan rinna avânga fak lo hlawh tawhin, thiltiam chu an chang lo va, keini tel lova anni chu tihfamkima an awm loh nân Pathianin keimahni kawng thu-ah thil eng emaw ṭha lehzual a buatsaih tawh avângin,” tiin. (Hebrai 11:35, 39, 40) Kum Sângkhat rorêl chhûng chuan, Krista leh a hriak thih unau mi 144,000-te chu vânah lal leh puithiam an ni ang a, he leiah hian Krista tlanna inthawina hlâwkna chu an sem chhuak ang. Tichuan, berâm dangte chu taksa leh rilru lama ‘tihfamkim’ an lo ni tawh ang.—Thu Puan 22:1, 2.
18. (a) Bible thu dik chuan berâm dangte chu eng thu hre thiam tûrin nge a ṭanpui ang? (b) Eng beiseiin nge berâm dangte chuan “Pathian fate lo lanna” chu an nghah?
18 Hêng zawng zawng hian Kristian Grik Pathian Lehkha Thuin Krista leh a unau hriak thihte leh Jehova thiltum hlenchhuahna kawnga an chanvo pawimawh takte a sawi nasat chhan hi berâm dangte thinlungah a nemnghet tûr a ni. Chuvângin, beram dangte chuan hriak thih pâwlte he leia an awm a, Armageddon leh Kum Sâng rorêl chhûnga “Pathian fate (sons of God) lo lanna” an nghah laia kawng tinrênga anmahni ṭanpui chu chanvo ropui takah an ngai a ni. Anni chuan ‘chhiatna bâwih ata tihchhuaha an awm a, Pathian fate (children of God) zalênna ropuia an luh hun’ chu an nghâkhlel hle a ni.—Rom 8:19-21.
Hriatrengnaah Thlarauva Inpumkhat
19. Eng nge “thutak thlarau” chuan hriak thihte leh an thawhpuite tân a tih a, engtin nge a bîk takin March 28 tlaiah an inpumkhat lehzual dâwn?
19 C.E. 33, Nisan 14 zâna a khârna ṭawngṭainaah Isua chuan heti hian a chham a: ‘Hênghote tân hian ka ngensak a ni; an zaa pumkhat an nihna tûrin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna tûrin; nangin kei mi tîr tih khawvêlin an âwih theihna tûrin,’ tiin. (Johana 17:20, 21) Pathian chuan a hmangaihna avângin a Fapa chu hriak thihte leh khawvêla thuâwih apiangte chhandam nâna a nun pe tûrin a rawn tîr a ni. (1 Johana 2:2) “Thutak thlarau” chuan Krista unaute leh an ṭhiante chu a inpumkhattîr a ni. March 28 tlai ni tlâk hnuah chuan, chûng pâwl pahnihte chu Krista thih Hriatrengna hun hmang tûr leh a Fapa duh tak, Isua Krista inthawina hmanga Jehova thiltih zawng zawngte hre chhuak reng tûrin an kalkhâwm dâwn a ni. Chu hun pawimawh taka an telna chuan an inpumkhatna tinghetin, Pathian duhzâwng ti zêl tûra an tumruhna chu tithar sawt sela; tichuan, Jehova hmangaihte zînga mi an nih avânga an hlimzia târ lang rawh se. (w02 2/1)
Ennawn Nân
• Engtikin nge Kristian hmasate chu “thutak thlarau” pêk an nih a, chu chu engtin nge anmahni “ṭanpuitu” a nih?
• Engtin nge hriak thihte chuan van lam kohna an chang tih an inhriat theih?
• Eng kawngin nge Pathian thlarau chuan berâm dangte chungah hna a thawh?
• Engtin nge berâm dangte chuan Krista unaute chungah thil ṭha an tih a, engvângin nge hriak thihte ‘tel lova tih famkima an nih loh’ vang?
[Phêk 15-naa milem]
“Thutak thlarau” chu C.E. 33 Pentikost nî-ah zirtîrte chungah leih a ni
[Phêk 17-naa milemte]
Berâm dangte chuan thu hril tûra Pathian thupêk an hlen chhuahnaah Isua unaute ṭanpuiin an chungah thil ṭha an ti