Engvangin Nge Isua Hminga Kan Ṭawngṭai Ang?

ISUA chuan ṭawngṭaina chungchâng a zirtîr fo va. Leia a awm lai khân, Juda sakhaw hruaitute chu “kawtthlêr pêng takahte” an ṭawngṭai ṭhîn a ni. Engvângin nge? “Miin an hmuh theihna tûrin.” An thiltih avânga mite ngaihsân hlawh an duh tih a chiang hle. Tam tak chuan an ṭawngṭaina chhân a nih theih nân “ṭawng tam” a ngai nia an hriat avângin, rei tak tak an ṭawngṭaiin, thu ngai an sawi nawn an sawi nawn ṭhîn a. (Matthaia 6:5-8) Isua chuan chutianga ṭawngṭai chu a thlâwn mai a ni tih a sawi; chutih rualin, rilru ṭha pute chu an ṭawngṭai huna an pumpelh tûrte a hrilh a. Mahse, an ṭawngṭai huna an tih loh tûrte mai aia tam a hrilh a ni.

Isua chuan Pathian hming tihthianghlimna te, a Lalram lo thleng tûr te, leh a duh zâwng tih a nih dân tûrte hmuh kan châkzia ṭawngṭainaa târ lang tûrin min zirtîr a. Chu bâkah, kan mi mal nun nghawng thei thilte chungchângah Pathian ṭanpuina dîl tûrin min zirtîr bawk. (Matthaia 6:9-13; Luka 11:2-4) Tehkhin thu hmangin, Isua chuan kan ṭawngṭainate ngaihthlâk a nih theih nân kan dîl fan fan a ngaiin, rinna leh inngaihtlâwmna kan neih a ngai tih a târ lang a. (Luka 11:5-13; 18:1-14) Entawn tûrte siamin mite a zirtîr ṭhîn a ni.—Matthaia 14:23; Marka 1:35.

Chûng zirtîrnate chuan Isua zirtîrte chu an ṭawngṭaina tihmasâwn tûrin a ṭanpui ngei ang. Mahse, Isua chuan a zirtîrte hnêna ṭawngṭaina chungchânga thil pawimawh ber hrilh tûrin leia a nun tâwp ber zân a thlen hun chu a nghâk a ni.

“Ṭawngṭaina Chungchânga Inthlâkthlengna Lian Tak”

Isua chuan a zân hnuhnûng bera a hun tam zâwk chu a tirhkoh rinawmte fuih nân a hmang a. Chu chu thil thar eng emaw sawi chhuahna atâna hun ṭha tak a ni. Ani chuan: “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo,” tiin a sawi a. A hnuah, he thutiam rinchhan tlâk tak hi a pe a ni: “Ka hmingin eng pawh in dîl apiang chu ka ti zêl ang, Pa, Fapa avânga chawimawia a awm theih nân. Nangnin ka hmingin eng pawh mi dîl chuan chu chu ka ti zêl ang,” tih hi. A thusawi a tih tâwpnaah, ani chuan: “Tûn thlengin ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin,” tiin a sawi a ni.—Johana 14:6, 13, 14; 16:24.

Chûng thute chu a pawimawh hle. Lehkhabu pakhat chuan chu chu “ṭawngṭaina chungchânga inthlâkthlengna lian tak” a ni tih a sawi. Isua chuan Pathian kal tlangin ama hnênah kan ṭawngṭai tûr a tihna a ni lo. Chu aiin, ani chuan Pathian Jehova pan dân kawng thar a sawi zâwk a ni.

Ni e, Pathian chuan a chhiahhlawh rinawmte ṭawngṭaina chu a ngaithla reng a. (1 Samuela 1:9-19; Sâm 65:2) Mahse, Israelte chu Pathian thuthlunpui hnam an nih aṭangin, miin a ṭawngṭainate Pathianin a ngaihthlâksak a duh chuan Israelte chu Pathian hnam thlan an ni tih a pawm a ngai a. Chu bâkah, Solomona hun aṭangin, biak in chu inthawina atâna Pathian hmun thlan a ni tih an pawm a ngai bawk. (Deuteronomy 9:29; 2 Chronicles 6:32, 33) Mahse, chutianga biakna chu hun rei lo te chhûng atân chauh a ni. Tirhkoh Paula’n a ziah angin, Israelte hnêna pêk Dân leh biak ina an hlan inthawinate chu ‘thil ṭha, lo awm tûrte anpui tak nei lo, a thla chauh’ a ni a. (Hebrai 10:1, 2) Chu a hlimthla chu a taka thlâk tûr a ni. (Kolossa 2:17) C.E. 33 aṭangin, Pathian Jehova nêna inlaichînna neitu chuan Mosia Dân a zawm a ngai tawh lo. Chu aiin, Dânin a sawi angin, Krista Isua thuâwihnaah a innghat tawh zâwk a ni.—Johana 15:14-16; Galatia 3:24, 25.

“Hming Zawng Zawnga Hming Chungnung Ber”

Isua chuan Pathianin kan ṭawngṭainate ngaihthlaa min chhânsak theih nân amah chu kawng hawngtu ṭhian thiltithei tak anga insawiin, Jehova kan hnaih theih dân kawng ṭha zâwk min hmêlhriattîr a ni. Engin nge Isua chu kan tâna chutiang thilte ti tûra chêttîr?

Kan za hian sual fa nia kan lo pian avângin, kan thiltih leh inthawina kan hlante chuan kan sual a tlênfai thei lo, a nih loh leh Pathian thianghlim Jehova nêna inlaichînna min neihtîr thei lo. (Rom 3:20, 24; Hebrai 1:3, 4) Mahse, Isua chuan a hringnun ṭha famkim chu hlânin, chhandam tlâk mihringte sual man chu a pe a. (Rom 5:12, 18, 19) Tûnah chuan, an sualte tlenfai duhtu zawng zawngte chuan Jehova hmaa mi fel nih theihna hun remchâng leh A lama “zalên taka thusawi” theihna an nei ta a; mahse, Isua inthawina an rin a, a hminga an ṭawngṭai chauhvin chutiang theihna chu an nei ang.—Ephesi 3:11, 12, New World Translation.

Isua hminga kan ṭawngṭai hian, a lo berah pawh, Pathian thiltum hlen chhuah nâna a chanvo pawimawh tak pathumah rinna kan neihzia kan lantîr a ni: (1) Ani chu kan sualte ngaihdam a nih theih nâna inthawina hlântu “Pathian Berâm No” a ni. (2) Ani chu Jehova’n kai thovin, tûnah chuan, tlanna kan hlâwkpui theih nân “Puithiam Lalber” angin hna a thawk a ni. (3) Amah chauh chu ṭawngṭaia Jehova kan pan theihna “kawng” awm chhun a ni.—Johana 1:29; 14:6; Hebrai 4:14, 15.

Isua hminga ṭawngṭaina chuan ani chu a chawimawi a. ‘Isua hminga mi tin an ṭhingṭhit leh Pa Pathian tihropuina tûra “Isua Krista chu Lal a ni,” tia lei tinrêngin a puan’ chu Jehova duh zâwng a nih avângin, chutianga chawimawi chu inâwm tak a ni. (Philippi 2:9-11) Mahse, chu aia pawimawh zâwk chu Isua hminga ṭawngṭaina chuan kan tâna a Fapa petu Jehova a chawimawi hi a ni.—Johana 3:16.

Isua chanvo ropuizia kan hriatthiam theih nân, Bible chuan amah sawi nân nihna leh hming chi hrang hrang a hmang a. Chu chuan Isua’n kan tâna a thiltih tawh te, a tih mêk te, leh a la tih tûrte avânga hlâwkna tam tak kan neihte hre thiam tûrin min ṭanpui a ni. ( “Isua Chanvo Pawimawh Tak” tih bâwm chu en rawh.) Dik tak chuan, Isua chu “hming zawng zawnga hming chungnung ber”a pêk a ni a. Lei leh vâna thuneihna zawng zawng pawh a hnêna pêk a ni.—Philippi 2:9-11; Matthaia 28:18.

Tih Dân Pângngai Mai A Ni Lo

Ni e, kan ṭawngṭainate Jehova ngaihthlâk kan duh chuan Isua hmingin kan ṭawngṭai tûr a ni. (Johana 14:13, 14) Mahse, “Isua hmingin” tih ṭawngkam chu tih dân pângngai ang leka chham nawn mai mai chu kan duh ngai lo vang. Engvângin nge?

He tehkhin thu hi han ngaihtuah teh. Sumdâwng mi hnên aṭanga lehkha i dawn hian, “i rin tlâk” tia tihtâwp a ni tlângpui ṭhîn a. Chu chu sumdâwng miin a rilru put hmang dik tak a târ lanna angin nge i ngaih a, lehkhathawn ziah huna tihtâwp dân tlângpui angin i ngai zâwk? Kan ṭawngṭainaah Isua hming chu sumdâwng miin a lehkhathawn a tihtâwp dân aia awmze nei zâwka kan hman a ngai a ni. ‘Bâng lova’ ṭawngṭai ngai mah se, chutianga kan tih hunah tih dân pângngai ang lek ni lovin, “thinlung zawng zawngin” kan ṭawngṭai tûr a ni.—1 Thessalonika 5:17; Sâm 119:145.

Engtin nge tih dân pângngai ang leka “Isua hmingin” tih ṭawngkam hman chu i pumpelh theih? Engvângin nge Isua mize duhawm takte chu i ngaihtuah loh vang? I tâna inhuam taka thil a lo tih tawhte leh a tih mêkte chu ngaihtuah ang che. I ṭawngṭainaah chuan, kawng danglam taka a Fapa a hman avângin Jehova chungah lâwm thu sawiin, ani chu fak ang che. Chutianga i tih chuan Isua thutiam: “Pa hnênah eng pawh in dîl chuan, keima hmingin a pe ang che u,” tih hi i ring ngam lehzual ang.—Johana 16:23.