Nungchang Chungchângah Sakhuana I Ring Thei Em?

Damdawi lama inenkawlnaa thawk Sylvia-i chuan: “Sakhaw mi nia inchhâl college kalpui tam tak ka nei a. Mahse, anni chuan test-naah entawnin, damdawite pawh an hmang khaw lo va. Sakhuana chuan an mi mal nunah nghawng a nei lo a ni,” tiin a sawi.

Lionel-a chuan: “Ka hnathawhpuite chuan damlo tak tak si lova damlo anga insawiin, dâwt an sawi ṭhîn a. Sakhuana chu an thil neih, an hman si loh—bungraw dah mawi ang mai a ni,” tiin a sawi.

Sakhuana chuan mi tam zâwkte nungchang chu a thunun lo va. Tûn laia mi tam takte chuan ‘Pathian ngaihsak anna an nei a,’ nimahsel, “a thiltihtheihna chu an âwih lo” a ni. (2 Timothea 3:5) An sakhaw hruaitute chuan entawn tûr ṭha an siam lo va, an rawngbâwltute lahin an berâmte chu nungchang ṭha nei tûra an mamawh Bible zilhna thu an pe hek lo. Chuvângin, mi tam takin Pathian chuan an nun dân a ngaihven lo nia an ngai pawh hi thil mak a ni lo ve.

BIBLE ZIRTIRNA CHU ENG NGE NI?

Bible chuan Pathianin rilru veizâwng a nei tih leh kan nungchangin a rilru veizâwng chu nasa takin a nghawng tih a târ lang a. Pathian laka hmân lai Israel mite an hel khân, ani chu ‘an tilungngai’ a ni. (Sâm 78:40) Mahse, miin a thil tihsual a sim tak zet chuan nasa takin “vâna mi an lâwm” a. (Luka 15:7) Kan Pa vâna mi mize duhawm takte miin a han ngaihhlut hian, Pathian a hmangaihna chu a ṭhang chho va, chu chuan Pathian thil hmangaihte hmangaih a, A thil huatte haw ve zêl tûrin a chêttîr a ni.—Amosa 5:15.

JEHOVA THUHRETUTE CHU HE MI KAWNGAH ENG NGE AN AN?

Jehova Thuhretute chuan “mite chu chhûngkaw inlaichînna ṭha nei tûr te, mi dang tâna ṭangkai tûr leh khua leh tui ṭha ni tûrtein an ṭanpui a ni,” tiin The Deseret News of Salt Lake City, Utah, U.S.A. chuan a sawi. Heti hian a sawi belh a ni: “Chu pâwla mite chuan nungchang ṭha tehna sâng tak an zui a. Zial zûk te, a lutuka zu in te, a dik lozâwnga damdawi hman te, pawisa khelh te, mipat hmeichhiatna lama inphalrai te, leh mawngkawhurna te chu thlarau lama chhiatna thlen thei thiltihte a ni tih an ring a ni,” tiin.

Engtin nge Pathian miziate zirna chuan Jehova Thuhretute chu a ṭanpui? A hmaa kan sawi tâk Sylvia-i chuan “Damdawi lama inenkawlnaah chuan inbumna chu thil tlânglâwn tak a ni,” tih a sawi a. “Chutianga tih ve chu thil awlsam tak zawng a ni thei ang. Mahse, Jehovaa ngaih dân hriat thiamna chuan thil dik ti tûrin min ṭanpui a. Ka hlimin, chhûngrila thlamuanna ka nei a ni,” tiin a sawi bawk. Sylvia-i chuan a sakhaw vawn mila a nunnain a nun a tiṭha lehzual tih a hria a ni. (w13-E 07/01)