Bible Zirpui Neih Theih Dân Kawng Ngate
1. Kan thu hrilhna bialah Bible zirpui tûr hmuh a harsat chuan eng nge kan tih ang a, engvângin nge?
1 Bible zirpui tûr hmuh harsa i ti tawh ngai em? Theih tâwp chhuah zêl rawh. Jehova chuan a duhzâwng anga thil ti ṭâng ṭângtute chu mal a sâwm ṭhîn a ni. (Gal. 6:9) A hnuaiah hian nangmah ṭanpuitu tûr rawtna panga pêk a ni.
2. Bible zirna ṭan thei tûrin engtin nge tlang taka sâwm dân chu kan hman theih?
2 Tlang Takin Sâwm Rawh: Mi tam tak chuan Vênnainsâng leh Awake! kan sem chhuak ṭhîn tih an hria a, mahse mite Bible kan zirpui ṭhîn tih erawh an hre lo mai thei a ni. Engvângin nge in tin kal hunah Bible zirpui tûra tlang taka i sâwm loh vang? Ngaihvenna nei i tlawh ṭhinte chu Bible zirpui an duh leh duh loh i zâwt thei bawk a. A duh loh chuan, thu leh hla chhuahte pe zêlin an tuina i chawh thawhsak thei a ni. Unaupa pakhat chuan nupa tuak khat chu kum rei tak chhûng magazine a lo pe tawh ṭhîn a. Magazine chhuak thar ber a pêk hnua kal chhuah leh a tum lai takin, “Bible zirpui in duh ang em?” tiin a rilrua zawh a tum chu a zâwt ta a. An duh thu an han sawi tâkah chuan mak a ti hle a. Tûnah anni chuan baptisma an chang tawh a ni.
3. Inkhâwmnaa lo telte chuan Bible zirpuitu an nei tawh tûrah kan ngai tûr a ni em? Hrilhfiah rawh.
3 Inkhâwma Lo Telte: Ngaihvenna neia kohhran inkhâwmnaa lo tel i hmuhte chuan Bible zirpuitu an nei tawh tûrah ngai mai suh. Unaupa pakhat chuan: “Bible zirna ka neihte zînga a zât ve aia tamte chu inkhâwmnaa lo telte ka biak ṭanna aṭanga ka neih a ni,” tiin a sawi. Unaunu pakhat chuan, kohhran inkhâwmnaa tel ṭhîn nu zakzum tak pakhat biak ṭan chu a tum a. Chu nu chuan kohhran chhûngah hian baptisma chang tawh fanute a nei a ni. Ani chu kum 15 vêl lai inkhâwmnaa lo tel tawh ṭhîn a ni a, Kingdom Hall-ah hian inkhâwm a inṭan ve leh a lo lût a, bân ve leh a chhuak leh nghâl vat ṭhîn a ni. Chu nu chuan Bible zirpui a remti a, a hnuah thutakah a rawn awm ta a ni. Unaunu chuan: “Bible zirpui a duh leh duh loh zâwt lova kum 15 lai ka lo liamtîr chu pawi ka ti ngawt mai,” tiin a ziak a ni.
4. Engtin nge kawhhmuh chhâwnna aṭangin Bible zirpui tûr kan hmuh theih?
4 Kawhhmuh Chhâwnna: Unaunu pakhat chuan mi dangte Bible zirnaa tel theih chu a tum ṭhîn a. Tichuan, Bible zirna kaihruaitu phalnain, an zir zawhah hetianga zirna a hrana neihpui theih tûr âwm mi a hriat leh hriat loh a zâwt a ni. Hun engemawti chhûng i tlawh nawn leh ṭhin tuemaw hnêna Bible Zirtîrna lehkhabu i sem chhuah hunah heti hian i zâwt thei ang: “He lehkhabu chhiar duh tûr âwm mi tuemaw hriat i nei em?” tiin. A châng chuan, thuchhuahtute leh pioneer-te chuan bial chhûnga an mi tawnte chu Bible an zirpui thei lo va. Chuvângin, mi dangte chu Bible kan zirpui ṭhîn tih hriattîr ang che.
5. Kohhran chhûnga ring lotu kawppuite’n Bible zirna neih an duh leh duh loh engvângin nge kan zawh ang?
5 Kawppui Ring Lotute: In kohhranah kawppui ring lotu nei thuchhuahtu an awm em? Ring lotu ṭhenkhat chuan an kawppui ringtu nêna Bible chungchâng sawi dun an duh lo va; mahse, chhûngkaw zînga mi ni lo tuemaw nêna Bible zir tûra sâwmna chu an pawm mai thei a ni. Chuvangin, kawppui ring lotute biak pawh ṭan dân tûr ṭha ber hriat nân, a ringtu zâwk biak hmasak chu a ṭha ber fo a ni.
6. Bible zirpui nei tûra ṭawngṭai chu eng ang takin nge a ṭangkai?
6 Ṭawngṭaina: Ṭawngṭainain thil a tih theihzia chu ngainêp suh. (Jak. 5:16) Jehova chuan a duhzâwng anga kan dîlna chu ngaihthlâksak min tiam a ni. (1 Joh. 5:14) Unaupa buai thei tak pakhat chu Bible zirpui pakhat neih dîlin a ṭawngṭai a. A nupui chuan an pa’n Bible zirna a kaihhruai hman a ring vak lo va, a zirpui tûr chuan buaina tam tak a neih phei chuan zirna a kaihhruai theih chu a ring lo a ni. Chuvângin, chu nu chuan a pasalin Bible zirpui nei tûra a ṭawngṭaisak rualin, chu a thil vei chu Jehova hnênah a hriattîr a. Chawlhkâr hnih vêl hnua kohhrana pioneer pakhatin Bible zirpui duh mipa pakhat a hmuh a, an hnêna pêk a duh khân an ṭawngṭaina chu chhânsak a lo ni ta a ni. A nupui chuan: “Mite Bible zirpui thei lo tûra inngaite hnênah he thurâwn hi ka pe a ni: Ṭawngṭainaah dîl bîk nei ula, dîl zêl ang che u, tiin. Kan rin phâk aia nasain hlimna kan dawng a ni,” tiin a ziak a ni. Chhel taka ṭan i lâk chuan, nang pawhin Bible zirpui i nei thei ang a, mi tuemaw ‘nunna kawnga’ i kaltîr theih avânga hlimna chu i nei ve thei a ni.—Mt. 7:13, 14.