Engtin Nge Jehova Thutiam Khawvêl Thar Kan Rinna Kan Tihngheh Theih Ang?

1-2. Khawvêl thar kan nghah laiin eng nge kan tih ngai?

JEHOVA’N he kalhmang hi felna khawvêl tharin a thlâk ang tih min tiam avângin kan lâwm hle a. (2 Pet. 3:13) Chu khawvêl thar lo thlen hun tûr chiah chu hre lo mah ila, thilthlengte chuan kan nghah rei a ngai tawh lo tih a tichiang a ni.—Mt. 24:32-34, 36; Tirh. 1:7.

² Chutih rualin, thutakah engtia rei pawh lo awm tawh mah ila, kan za hian chu thutiam kan rinna chu kan tihngheh a ngai a ni. Engvângin nge? A chhan chu rinna chak tak pawh zawi zawia a chak loh theih vâng a ni. A nihna takah chuan, tirhkoh Paula’n rinna tlâkchhamna chu “sual keimahnia bet tlat” tiin a ko va. (Heb. 12:1) Kan rinna chak reng tûra vêng ṭha tûr chuan, khawvêl thar a rawn thleng thuai dâwn tih finfiahnate chu kan ennawn ziah a ngai a ni.—Heb. 11:1.

3. He thuziakah hian eng nge kan sawiho vang?

³ He thuziakah hian, Jehova thutiam khawvêl thar kan rinna kan tihngheh theih dân kawng thum kan sawiho vang: (1) tlanna chungchâng chhût ngunna, (2) Jehova thiltihtheihna chungchâng ngaihtuahna, leh (3) thlarau lam thiltihnate atâna hun hmante hi. Chumi hnuah, Habakuka hnêna Jehova thuchahin tûn laia kan rinna a tihngheh dân kan sawiho vang. Mahse, a hmasain, khawvêl thar lo thleng tûr thutiama kan rinna kan tihngheh a ngaihna dinhmun ṭhenkhat chu i lo ngaihtuah ang u.

RINNA NGHET TAK NEIH A NGAIHNA DINHMUNTE

4. Eng thu tlûkna kan siam hunah nge rinna nghet tak kan neih ngai ang?

⁴ Nî tina thu tlûkna kan siamahte hian rinna nghet tak kan lantîr a ngai a. Entîr nân, kan ṭhian te, intihhlimna te, zirna te, inneihna te, naupang te, leh eizawnna hna nêna inkûngkaih thu tlûknate kan siam a ni. Heti hian kan inzâwt thei a, ‘Ka duh thlanna siam hian he kalhmang hi rei lo tê atâna awm tûr leh Pathian khawvêl tharin a rawn thlâk thuai ang tih ka rinzia a târ lang em? Nge ni a, ka duh thlannate chu thihna hi engkim tâwpna anga ngaitute thununin a awm zâwk?’ tiin. (Mt. 6:19, 20; Lk. 12:16-21) Khawvêl thar a lo thleng thuai dâwn tih kan rinna kan tinghet a nih chuan thu tlûkna ṭha berte kan siam thei ang.

5-6. Harsatna kan tawh laiin engvângin nge rinna nghet tak kan mamawh? Entîrna pe rawh.

⁵ Rinna nghet neih a ngaihna fiahnate pawh kan hmachhawn a. Tihduhdahna te, natna khirh tak te, a nih loh leh lunghnualna min thlen thei thil dangte kan tâwk thei a ni. A tîrah chuan, kan fiahna tawh chu tuar chhuak thei tûrin kan inngai thei a. Mahse, chûng harsatnate chu hun rei tak chhûng kan tuar a nih chuan, tuar chhuak thei tûr leh hlim taka Jehova rawngbâwl chhunzawm zêl tûrin rinna nghet tak kan neih a ngai ang.—Rom 12:12; 1 Pet. 1:6, 7.

⁶ Fiahna kan tawh lai chuan, Jehova khawvêl thar chu lo thleng ngai lo tûr angin kan ngai thei a. Chu chu kan rinna a chak lo tihna a ni em? Ni lo ve. Hei hi han ngaihtuah teh. Nipui khaw lum tak kan tawrh lai chuan thlasik lo thleng ngai lo tûr angin kan ngai thei a. Mahse, thlasik chu a lo thleng tho a ni. Chutiang chiah chuan, lunghnual taka kan awm laiin, khawvêl thar chu lo thleng ngai lo tûr angin kan ngai thei a. Mahse, kan rinna a nghet a nih chuan, Pathian thutiamte chu a thleng famkim ang tih kan hria a ni. (Sâm 94:3, 14, 15; Heb. 6:17-19) Chumi chu ring tlatin, kan nunah Jehova biakna chu kan dah hmasa chhunzawm zêl thei ang.

7. Eng rilru put hmang lakah nge kan invên ang?

⁷ Rinna nghet tak neih a ngaihna dinhmun pakhat, thuhrilhna chungchâng hi lo ngaihtuah ta ila. Pathian khawvêl thar lo thleng tûr chungchânga kan “chanchin ṭha” hrilh lo ngaithlatu tam tak chuan, chu chu a ṭhat êm avânga lo thleng thei lo tûr angin an ngai a. (Mt. 24:14; Ezek. 33:32) Chutiang rinhlelhna rilru put hmang ang chu neih ve kan duh ngai lo vang. Chutianga awm lo tûr chuan kan rinna kan tihngheh zawm zêl a ngai a ni. Kan rinna kan tihngheh theih dân kawng thum i lo ngaihtuahho vang u.

TLANNA CHU CHHUT NGUN RAWH

8-9. Tlanna chungchâng chhût ngunna chuan engtin nge kan rinna a tihngheh theih?

⁸ Kan rinna kan tihngheh theih dân kawng khat chu tlanna chungchâng chhût ngun hi a ni a. Tlanna chu Pathian thutiamte a lo thleng dik ang tih tiamkamna a ni. Tlanna pêk a nih chhan leh chumia thil telte ngun taka kan ngaihtuah hian, khawvêl ṭha zâwkah chatuanin kan nung ang tih Pathian thutiam chu a thleng famkim ngei ang tih kan rinna kan tinghet a ni. Engvângin nge chutianga kan sawi theih?

⁹ Aw le, tlannaah chuan eng thil nge tel? Jehova chuan a Fapa piang hmasa ber, a duh tak leh a ṭhian ṭha ber ni bawk chu vân aṭangin mihring ṭha famkim anga piang tûrin a rawn tîr a. Isua chuan leia a awm laiin, harsatna chi hrang hrang a tuar a. Chumi hnuah, hrehawm na tak tuarin a thi a ni. Jehova man pêk chu a va sâng tak êm! Hmangaihna nei tak kan Pathian chuan hun rei lo te chhûng atân maia nun ṭha zâwk min pe tûrin, a Fapa chu hrehawm tuara a thih a phal ngai lo vang. (Joh. 3:16; 1 Pet. 1:18, 19) Jehova’n man sâng tak a pêk avângin khawvêl thara chatuana nunna chu a rawn thlentîr ngei dâwn a ni.

JEHOVA THILTIHTHEIHNA NGAIHTUAH RAWH

10. Ephesi 3:20-in a sawi angin, Jehova’n eng nge a tih theih?

¹⁰ Kan rinna tihngheh theih dân kawng hnihna chu Jehova thiltihtheihna ngaihtuah hi a ni a. Ani chuan a thutiam zawng zawng tifamkim tûrin thiltihtheihna a nei a ni. Ni e, tûn laia mi tam tak chuan khawvêl thara chatuana nun chu kan tân thil theih loh angin an ngai a. Mahse, Jehova chuan mihringte’n an hlen chhuah theih ngai loh tûr thilte a tiam fo a ni. Ani chu Pathian Engkimtithei a nih avângin chu chu a tiam thei a ni. (Job. 42:2; Mk. 10:27) Chuvângin, thil ropui takte min tiam chu mak kan ti lo.—Ephesi 3:20 chhiar rawh.

11. Pathian thutiam danglam takte zînga entîrna pakhat pe rawh. (“Thutiam Danglam Tak Thleng Famkim Tawh Ṭhenkhat,” tih bâwm chu en rawh.)

¹¹ Hun kal tawhah Jehova’n a mite hnêna thil theih loh anga lang thil ṭhenkhat a tiamte hi lo ngaihtuah ta ila. Ani chuan Abrahama leh Sari chu an tar hnuah fapa an nei ang tih a hrilh a. (Gen. 17:15-17) Chu bâkah, Abrahama chu a thlahte’n Kanaan ram an luah ang tih a hrilh bawk a ni. Aigupta rama Abrahama thlah Israel mite kum tam tak sala an tân chhûng khân, chu thutiam chu a thleng famkim ngai dâwn lo niin a lang ngei ang. Mahse, a thleng famkim a ni. A hnuah,Jehova’n kum upa tak Elizabeti chu fa a nei ang tih a hrilh a. Ani chuan nula thianghlim Mari pawh Pathian Fapa a hring ang tih a hrilh bawk a, chu chuan kum sâng tam tak kaltaa Eden huana Jehova thutiam a thlen famkimtîr ang!—Gen. 3:15.

12. Josua 23:14 leh Isaia 55:10, 11-nain Jehova thiltihtheihna chungchângah eng nge min hrilh?

¹² Jehova thutiamte leh a thlen famkimtîr dânte chhût ngunna hmangin, khawvêl thar thlentîr tûrin thiltihtheihna A nei tih kan rinna chu kan tinghet a. (Josua 23:14; Isaia 55:10, 11 chhiar rawh.) Chu chuan khawvêl thar thutiam chu duhthusâm leh suangtuahna mai a ni lo tih hre thiam tûra mi dangte ṭanpui tûrin ṭha lehzualin min buatsaih a ni. Jehova ngeiin vân tharte leh lei thar chungchângah: “Hêng thu hi a rinawmin a dik si a,” tiin a sawi a ni.—Thup. 21:1, 5.

THLARAU LAM THILTIHNAAH INHMANG ZIAH RAWH

13. Engtin nge kohhran inkhâwmte chuan kan rinna a tihngheh theih? Hrilhfiah rawh.

¹³ Kan rinna tihngheh theih dân kawng thumna chu thlarau lam thiltihnatea inhman hi a ni a. Entîr nân, kohhran inkhâwm kan hlâwkpui dân hi han ngaihtuah teh. Hunbi kima rawngbâwlna hrang hranga kum sâwm bi têl lo inhmang tawh Anna-i chuan heti hian a sawi: “Inkhâwmte chuan ka rinna tichak reng tûrin min ṭanpui a. Thusawitu chuan a sawi thiam vak lo emaw, thil thar a sawi lo emaw a nih pawhin, Bible hre thiam lehzual tûra min ṭanpuitu thil ṭhenkhat ka hre ṭhîn a, chu chuan ka rinna a tichak a ni,” tiin.b Inkhâwmnaa kan unaute chhânna pêk kan ngaihthlâk hian kan rinna chu a nghet lehzual thei bawk.—Rom 1:11, 12; 10:17.

14. Engtin nge rawngbâwlna chuan kan rinna a tihngheh?

¹⁴ Thlawhhma rawngbâwlnaa kan tel hian kan rinna chu kan tinghet lehzual bawk a. (Heb. 10:23) Kum 70 chuang Jehova rawngbâwl tawh Barbara-i chuan heti hian a sawi: “Thuhrilh rawngbâwlnaa telna chuan ka rinna a tinghet lehzual tih ka hria. Mi dangte hnêna Jehova thutiam ropui takte chungchâng ka hrilh tam poh leh, ka rinna chu a nghet lehzual sauh a ni,” tiin.

15. Engtin nge mahnia inzirnain kan rinna a tihngheh? (Milem en bawk rawh.)

¹⁵ Kan rinna tinghettu thlarau lam thiltih dang: mahnia inzirna hi lo ngaihtuah ta ila. Susan-i chuan zir tûrte lo inbuatsaih lâwk nâna hun duan siam chu ṭangkai a ti hle a. Ani chuan: “Chawlhnîah kâr leha Vênnainsâng Zir Tûr ka inbuatsaih a. Thawhṭan leh Thawhlehah chawlhkâr chhûng inkhâwm atân ka inbuatsaih a ni. Ni dangahte chuan mahnia inzirna ka nei bawk,” tiin a sawi. Inzirna atâna a hun duan vawn rengna hmangin, Susan-i chuan a rinna a tinghet zawm zêl a ni. Headquarters-a kum sâwm bi têl rawng lo bâwl tawh Irene-i chuan, Bible hrilh lâwkna zirnain a rinna a tinghet tih a sawi a. Ani chuan, “Jehova hrilh lâwknate a tê ber thlenga a thleng famkim chu mak ka ti hle,” tiin a sawi.c

“A LO THLEN NGEI DAWN AVANGIN”

16. Engvângin nge Habakuka hnêna Jehova thusawi chuan tûn laiah kan tân awmzia a neih? (Hebrai 10:36, 37)

¹⁶ Jehova chhiahhlawh ṭhenkhat chuan he khawvêl kalhmang tâwpna hi hun rei tak chhûng an lo nghâk tawh a. Mihringte thlîrna aṭang chuan Pathian thutiam thlen famkimna chu a tlai angin a lang thei a. Mahse, Jehova chuan a chhiahhlawhte rilru tûr chu a hria a, chuvângin zâwlnei Habakuka chu: “Inlârna hi hun ruat chhûng atân mai a ni nghe nghe si a, a kin nî chu a hnai tial tial a, a thlâwn lo vang. Rei deuh mah se, nghâk rawh; a lo thlen ngei dâwn avângin a tlai chuang lo vang,” tiin a hrilh a ni. (Hab. 2:3) Chu Pathian thusawi chu Habakuka tân chauh a ni em? Nge ni a, tûn laiah kan tân pawh awmzia a nei tho? Thlarauva thâwk khuma awmin tirhkoh Paula chuan, chûng thute chu khawvêl thar beiseina nei Kristiante hnênah a sawi a ni. (Hebrai 10:36, 37 chhiar rawh.) Ni e, kan chhandamna thutiam chu a tlai anga a lang a nih pawhin, “a lo thlen ngei dâwn avângin a tlai chuang lo vang,” tih kan ring thei a ni.

17. Engtin nge unaunu pakhatin Habakuka hnêna Jehova fuihna pêk chu a nunpui?

¹⁷ Jehova chhiahhlawh tam takte chuan “nghâk” tûra Jehova fuihna chu kum sâwm bi tam tak chhûng an lo nunpui tawh a. Entîr nân, Louise-i chuan kum 1939 aṭangin Jehova rawng a bâwl ṭan a. Ani chuan: “Chutih lai chuan, high school ka zawh hmain Armageddon lo thleng tûrah ka ngai a. Mahse, a lo thleng lo. Jehova’n a thutiamte a thlen famkimtîr hun nghâktute chungchâng kum tam tak chhûng Bible-a ka chhiarna chuan, Jehova’n a thutiamte a thlen famkimtîr hun nghâk tûrin min ṭanpui a. Chûng an chanchin ka chhiarte chu Nova, Abrahama, Josefa, leh hun rei tak chhûng Jehova thutiam an lâwmman dawn tûr lo nghâktute chungchâng a ni. A thutiamte a lo thleng famkim ngei ang tih rinna chuan keimah leh mi dangte chu khawvêl thar a hnai tawh hle tih ring nghet tlat tûrin min ṭanpui a ni,” tiin a sawi. Hun rei tak chhûng Jehova betute pawhin chu chu an pawm a ni.

18. Engtin nge thil siamte bih chianna chuan khawvêl thar lo thleng tûr kan rinna chu a tihngheh theih?

¹⁸ Ni e, khawvêl thar chu a lo la thleng lo va. Mahse, arsi te, thingkung te, ramsa te, leh mihringte hi han ngaihtuah teh. Hêng thil zawng zawngte hi Jehova’n a siam hma chuan an awm lo va; mahse, a siam hnuah erawh chuan an awm ngei a ni tih tumahin an ringhlel lo vang. (Gen. 1:1, 26, 27) Kan Pathian chuan khawvêl thar a siam dâwn tih min tiam a. Chu a thutiam chu a tihlawhtling ngei ang. Chutah chuan mite chu hrisêlna ṭha famkim neiin chatuanin an nung tawh ang. Chu chu Pathian hun ruatah a lo thleng ngei ang tih kan ring tlat thei a ni.—Is. 65:17; Thup. 21:3, 4.

19. Engtin nge i rinna i tihngheh theih?

¹⁹ Chumi hun a lo thlen hma chu, i rinna tinghet tûra hun remchâng i neih apiang hmang ṭangkai ang che. Tlanna i ngaihhlutna chu tizual zêl la. Jehova thiltihtheihna chu ngaihtuah ang che. Thlarau lam thiltihnaahte inhmang reng la. Chutianga tiin, “rinna leh nghah peihna vânga thutiamte rochung tawhte” zîngah i tel thei ang.—Heb. 6:11, 12; Rom 5:5.