8 ENTAWN TUR

A AWMZIA

Entawn tlâk nu leh pate chu an thu zirtîr angin an nung a. Entîr nân, kawngka bianga mi tuemaw i biak duh loh hunah, “Inah a awm lo ti rawh,” tia i sawi chu i fapain a hre fo a nih chuan, ani chu thu dik sawi tûrin i beisei thei lo vang.

“Mite chuan, ‘Ka sawi angin ti la, ka tih angin ti suh,’ tiin an sawi ṭhîn a. Mahse, naupangte chu chutianga tih theih an ni lo. Anni chu kan thusawi leh thiltih ang anga ti ṭhîn nawhfe thâwp ang an ni a, kan thiltih leh anmahni kan zirtîr dân a inmil loh hunah tlang takin an sawi chhuak ang.”—David-a.

BIBLE THU BUL: “Nang, mi rûk ru lo tûra hrilhtu, nangin i ru ṭhîn maw?”—Rom 2:21.

A PAWIMAWH CHHAN

Naupangte leh tleirâwlte chungah hian an ṭhiante pawh tiamin, mi dangte ai mahin an nu leh pate hian nghawng an nei zâwk a. Chu chu i thusawite i nunpuina chu naupangte kawng dika kaihruaitu ber i ni tihna a ni.

“Vawi tam tak thu kan hrilh chu naupangin a ngaithla nge ngaithla lo tih kan chian loh laiin, vawi khat kan thusawi mila kan nun loh hian, chu chu a sawi chhuak nghâl ang. Naupangte hian kan thiltih engkim hi an hre vek a, an hre lo emaw kan tih pawh hian an lo hre reng ṭhîn a ni.”—Nicole-i.

BIBLE THU BUL: “Chung lam aṭanga finna lo chhuak erawh chu . . . a vervêk lo.”—Jakoba 3:17.

I TIH THEIHTE

I tehnate chu endik rawh. Eng film-te nge in en ṭhin? Engtin nge i kawppui leh naupangte i cheibâwl ṭhin? Eng ang ṭhiante nge i kawm ṭhin? Mi dangte ṭhatna tûr i ngaihtuah em? A tawi zâwnga sawi chuan, i fate ni tûra i duh ang mi chu i ni em?

“Ka pasal nên hian mahni ngeiin kan zawm loh tehnate zâwm tûrin kan fate chu kan beisei lo.”—Christine-i.

Thil i tihsual hunah ngaihdam dîl rawh. I fate chuan i ṭha famkim lo tih an hria a. A ṭûl hunah, “Ka tih palh, pawi ka ti khawp mai,” tia i kawppui leh i fate hnêna i sawi chuan, thil dik tihna leh inngaihtlâwmna kawngah zir tûr pawimawh tak i zirtîr a ni ang.

“Kan fate hian thil kan tihsual hunah kan pha lo tih an hriat a ngai a, kan thil tihsual avânga ngaihdam kan dîl pawh an hriat a ngai bawk. Chutianga kan ti lo a nih chuan, an thil tihsual thup dân chauh an thiam ang.”—Robin-i.