‘Hmangaih leh Thil Ṭha Tiha Min Chawk Thotu’ Inkhâwmnate

KUM zabi liam ta chhûng zawng khân, Jehova mite chu inrêlbâwlna fel tak neiin an lo inhmukhâwm tawh ṭhîn a. Hmân laia Israel ramah khân, mipa zawng zawngte chu kût ropui tak pathum hmang tûrin Jerusalemah an kal ṭhîn. (Deut. 16:16) Kum zabi khatnaah khân, Kristiante chu mi pakhat inah an inkhâwmho ziah a ni. (Philm. 1, 2) Tûn laiah pawh, inkhâwm leh inkhâwmpuite kan nei a. Engvângin nge Pathian mite chu an inkhâwm ṭhin? A bul berah chuan, kan biakna pêng pawimawh tak a nih vâng a ni.—Sâm 95:6; Kol. 3:16.

² Inkhâwmte chu a telte chuan an hlâwkpui ṭhîn a. Kum tina neih Bâwkte Kût a kum sarih tlin kum apiangah Israel hnamte chu: “Mipuiho ahmei apa, in fanau tê tê te, in awmpui ram dang mite, anni chuan an ngaihthlâk a, an zir a, LALPA in Pathian chu an ṭih a, he dân thu zawng zawng hi fîmkhur taka an zawm theih nân . . . ko khâwm rawh u,” tia hrilh an ni. (Deut. 31:12, 13) Kan inkhâwm chhan pawimawh tak pakhat chu, ‘LALPA zirtîra awm’ hi a ni tih a chiang hle. (Is. 54:13) Inkhâwmna chuan inhre chiang tûrte, infuih tawn tûrte, leh inkawmna aṭanga chakna nei tûrtein hun remchâng ṭha tak min pe bawk.

KOHHRAN INKHAWMTE

³ C.E. 33 Pentikost hnu lama kalkhâwm zirtîrte chu tirhkohte zirtîrin an awm a, “ni tin rilru hmun khatin Pathian biak inah chuan ṭhahemngai takin an awm ṭhîn.” (Tirh. 2:42, 46) A hnuah, Pathian be tûra Kristiante an kalkhâwm hian, Pathian thâwk khum thute chu an chhiar a, chûngah chuan tirhkohte leh Kristian zirtîr dangte ziakte pawh a tel a. (1 Kor. 1:1, 2; Kol. 4:16; 1 Thes. 1:1; Jak. 1:1) Chutah, kohhrana ṭawngtaina pawh a awm bawk. (Tirh. 4:24-29; 20:36) A châng chuan, missionary rawngbâwlna hmuna thiltawnte sawi chhuah a ni bawk ṭhîn. (Tirh. 11:5-18; 14:27, 28) Bible thurinte leh hrilh lâwkna thleng famkimte chungchâng pawh an sawiho a ni. Kristian nungchang leh Pathian ngaihsakna chungchânga kaihhruaina pêk a ni a. Taima taka chanchin ṭha hriltu ni ṭheuh tûrin mi tinte chu fuih an ni bawk.—Rom 10:9, 10; 1 Kor. 11:23-26; 15:58; Eph. 5:1-33.

⁴ Tûn lai Kristian inkhâwmahte chuan tirhkohte hun laia tih dân chu zui a ni a. Hebrai 10:24, 25-a hmuh thlarauva thâwk khum fuihna thu: “Ṭhenkhat tih dân anga kan inkhâwmte bânsan lovin, i infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tih chu kan zâwm a ni. He tâwpna hun khirh takah hian, thlarau lama chakna leh Kristian rinawmna kan vawn reng theih nân kan inkhâwmna aṭanga fuihna dawn belh chu kan mamawh a. (Rom 1:11, 12) Kristiante kan nih angin, chhuan bengtla lo leh tihmawh zîngah kan chêng a. Pathian ngaihsak lohna leh khawvêl châknate kan hnâwl tawh a ni. (Phil. 2:14-16; Tit. 2:12-14) Jehova mite kâwm lovin khawi hmun dangah nge kan awm tehlul ang? (Sâm 84:10) Pathian Thu sawiho leh ngaihthlâk aia ṭangkai zâwk eng dang nge awm thei ang? Kan hlâwkna tûra ruahman inkhâwm chi hrang hrangte hi han ngaihtuah teh.

CHAWLHKAR TAWP INKHAWMTE

⁵ Chawlhkâr tâwp inkhâwm hmasa zâwk hi mi nâwlpuite tâna buatsaih Bible ṭanchhan thusawina a ni a, chuta lo inkhâwm ṭhenkhat phei chu an vawi khat rawn inkhâwmna pawh a ni thei. He vântlâng thusawi hi mi tharte leh kohhrana thuchhuahtute thlarau lam mamawh phuhrûknaah a pawimawh hle a ni.—Tirh. 18:4; 19:9, 10.

⁶ Krista Isua, a tirhkohte, leh an ṭhiante chuan tûn laia Jehova mite awmna kohhranin an neih ang vantlâng inkhâwmte hi an lo nei ṭhîn a. Isua chu leia thusawitu thiam ber leh ropui ber a ni tih hnial rual a ni lo. A chungchângah: “Sawtiang rêngin miin thu an sawi ngai lo,” tiin an sawi a ni. (Joh. 7:46) Isua chuan thu neihna nên thu a sawi a, a thu ngaithlatute chuan mak an ti hle. (Mt. 7:28, 29) A thusawi thinlunga khungtute chuan hlâwkna tam tak an dawng a ni. (Mt. 13:16, 17) Tirhkohte chuan a entawn tûr siam chu an zui a. C.E. 33 Pentikost nîa Petera thusawi thiltithei tak chu Tirhkohte 2:14-36-ah kan chhiar thei a ni. An thu hriat chuan mi tam tak chu thilti tûrin a chêttîr a. A hnu lamah pawh, Atheni khuaa Paula thusawi ngaithlatu ṭhenkhat chu ringtu an lo ni bawk.—Tirh. 17:22-34.

⁷ Chutiang bawkin tûn lai hunah pawh, mi tam takte chuan kohhrana vântlâng thusawi neihte bâkah, kan bial leh regional inkhâwmpuia vantlâng thusawite chu an hlâwkpui a. Chûng thusawite chuan Kristian zirtîrnate vawng reng a, Lalram rawngbâwlnaa nghet reng tûrin min ṭanpui a ni. Thusawi ngaithla tûra tuina neite leh mi nâwlpuite sâwmin, Bible zirtîrna thu bulte hre tûrin mite chu kan ṭanpui thei a ni.

⁸ Vântlâng thusawiah chuan thu hrang hrang ngaihthlâk a ni ṭhîn a. Thusawiahte chuan Bible zirtîrna leh hrilh lâwkna, chhûngkaw nun leh inneihna chungchânga Bible thu bul leh zilhnate, ṭhalaite dinhmun tawhte, leh Kristian nungchangte a tel a ni. Thusawi ṭhenkhat chu Jehova thil siam ropui takte chungchâng a ni a. Thusawi dangte chuan Bible hun laia mite rinna, huaisenna, leh rinawmna a târ lang a, tûn lai huna kan zir tûrte a thlûr bing a ni.

⁹ Vântlâng thusawite hlâwkpui tak zet tûr chuan, ngun taka kan ngaihthlâk a, thusawituin Bible châng a sawite lo en a, a chhiar lai leh a hrilhfiah laia lo en ve zêl chu a pawimawh a ni. (Lk. 8:18) Thusawi laite kan lo enfiah ve zêl chuan kan thu hriatte chu pawm a, nunpui chu kan tum tlat ang.—1 Thes. 5:21.

¹⁰ Thusawitu tûr an awm chuan kohhran chuan chawlhkâr tinin vântlâng thusawina a nei ang. Hei hi hmun hla vak lova awm kohhran dang aṭanga thusawitute kohna hmangin a ni thei ang. Thusawitu tûr a indaih loh chuan, vântlâng thusawi chu a theih anga zinga pêk a ni ṭhîn.

¹¹ Chawlhkâr tâwp inkhâwm a tâwp lam chu Vênnainsâng zir tûr edition-a thuziakte zawhna leh chhânna hmanga sawihona Vênnainsâng Zirna a ni ṭhîn a. Vênnainsâng hmangin Jehova chuan a hun takah thlarau lam chaw min pe ṭhîn a ni.

¹² Zir tûr thuziakahte chuan kan nî tin nuna Bible thu bulte nunpui dân tûr a tel ṭhîn a. Chûng chuan Kristiante chu “khawvêl thlarau” leh nungchang bawlhhlawh lakah a vênghim a ni. (1 Kor. 2:12) Vênnainsâng aṭangin Bible zirtîrnate leh hrilh lâwknate hriatfiah lehzualna kan nei a, thutak ruala kal tûr leh mi felte kawng zawh zêl tûrin min ṭanpui a ni. (Sâm 97:11; Thuf. 4:18) Vênnainsâng Zirnaa tel a, zawhnate chhânna chuan Jehova khawvêl thar beiseinaah chuan lâwm zêl tûrin min pui thei a ni. (Rom 12:12; 2 Pet. 3:13) Kan Kristian inkawmhona chuan thlarau hmêlhmangte rah chhuak a, ṭhahnemngai taka Jehova rawngbâwl kan duhna tinghet tûrin min pui a ni. (Gal. 5:22, 23) Fiahnate tuar chhuak tûr leh, ‘nunna tak tak chu kan vawn’ theih nâna ‘hun lo thleng tûr atân lungphûm ṭha tak’ phûm tûra tihchakin kan awm a ni.—1 Tim. 6:19; 1 Pet. 1:6, 7.

¹³ Engtin nge he thlarau lama châwmna hi a ṭangkai thei ang bera kan hman ang? A hrangin emaw, chhûngkuain emaw kan lo inbuatsaih lâwk tûr a ni a, Bible châng târ lante chu kan lo en lâwk ang a, inkhâwm laiin mahni irâwm chhuakin kan chhâng ang. Chutianga kan tihna chuan thutak chu kan thinlungah a khêng lût ang a, kan chhânna pêk aṭanga lang chhuak kan rinna târ lanna chu mi dangte’n an lo hlâwkpui ang a. Mi dangte chhânna pêk ngun taka ngaithlain, chawlhkâr tina kan thu zirte chu kan hlâwkpui bawk ang.

CHAWLHKAR CHHUNG INKHAWMTE

¹⁴ Kohhran mite chu Kan Kristian Nun leh Rawngbâwlna inkhâwm atân Kingdom Hall-ah chawlhkâr tin an inkhâwm a. He inkhâwmah hian Pathian rawngbâwltu anga “kan tlin theihna” tûra min puitu inkhâwm ṭhen thum a tel a ni. (2 Kor. 3:5, 6) Hun duan leh zir tûrte chu Kan Kristian Nun leh Rawngbâwlna—Inzirna Lehkhabu-ah pêk a ni zêl ang. Nun leh Rawngbâwlna Inzirna Lehkhabu-ah chuan rawngbâwlna atâna inbiak dân tûr entîrnate a tel bawk.

¹⁵ He inkhâwm a ṭhen khatna chu, Pathian Thu Aṭanga Ro Hlute tih a ni a, chu chuan Bible thute ṭo bulte bâkah, a chhehvêl thute hre chiang tûr leh kan nunpui theih dân hre thiam tûrin min ṭanpui ang. He inkhâwmah hian chawlhkâr chhûng atâna Bible chhiar ṭanchhana thusawina, chhiarna, leh sawihona a tel a ni. Nun leh Rawngbâwlna—Inzirna Lehkhabu-ah chuan min zirtîr nâna ṭanpuitu tûr, milem leh ziak khah tûr (worksheet) telh a ni ṭhîn. Hetianga Bible thu ngun taka ngaihtuahna hi ‘hna ṭha tinrêng thawk tûra kim taka inthuama kan famkim theih nân,’ kan mi mal nunah leh zirtîrnaah kan hlâwkpui a ni.—2 Tim. 3:16, 17.

¹⁶ Inkhâwm ṭhen hnihna, Thlawhhma Rawngbâwlnaah Inhmang Rawh, tih chu thu hrilh leh zirtîr siamna kawnga kan thiamna tihmasâwn ṭheuh tûra a tel zawng zawngte hnêna hun remchâng pe tûr zâwnga siam a ni. School chanvote bâkah, inbiak dân tûr entîrna video-te chu ena sawiho a ni bawk. He inkhâwm hian ‘mi hah tak chu thua kan tihhahdam thiam nân zirtîrte lei’ nei tûrin min ṭanpui a ni.—Is. 50:4.

¹⁷ Ṭhen thumna, Kristiante Angin Nung Rawh, tih chuan nî tin nuna Bible thu bulte nunpui theih dân a târ lang a. (Sâm 119:105) He inkhâwma a bulpui ber chu Kohhrana Bible Zirna hi a ni. Hei hi, Vênnainsâng Zirna ang bawka zawhna leh chhânna hmanga sawihona a ni ṭhîn.

¹⁸ Thla tina Nun leh Rawngbâwlna Inzirna Lehkhabu thar dawn a nih veleh, kohhrana upaho râwn khâwmtu coordinator, a nih loh leh amah ṭanpuitu upa chuan ngun taka bih chiangin, hun duan a siam a. Chawlhkâr tinin, upate’n zirtîrtu atâna tling nia an pawm upa pakhat chu inkhâwm chairman-ah a ṭang ang. A chanvoah chuan a hun taka inkhâwm ṭan leh tihtâwp bâkah, zirlai chanvo changte hnêna fakna leh zilhna pêk a tel a ni.

¹⁹ Nun leh Rawngbâwlna Inkhâwm atâna kan inbuatsaih a, kan tel a, chhânnate kan pêk ziah hian, Pathian Lehkha Thute kan lo hria a, Bible thu bulte hriatthiamna kan nei a, chanchin ṭha hril tûrin kan inring tâwk a, zirtîr siam kan thiam phah a ni. Inkhâwmnaa tel baptisma chang tawh Thuhretu la ni lote pawhin inkawmhona nuam tak leh thlarau lama mi tichak thei tak sawihonate chu an hlâwkpui bawk. He inkhâwmna leh inkhâwm dang tâna kan inbuatsaih hunah (kan ṭawng hmana hmuh theih a nih chuan) Watchtower Library, JW Library^®, (kan ṭawnga hmuh theih a nih chuan) Vênnainsâng ONLINE LIBRARY^™ leh Kingdom Hall library chu kan hmang ṭangkai thei a ni. Kingdom Hall library-ah chuan, Jehova Thuhretute thu leh hla chhuah hmuh theihte, Watch Tower Publications Index, a nih loh leh Jehova Thuhretute Tâna Zir Bingna Hmanrua bâkah, Bible lehlin chi hrang tam tak, concordance, dictionary, leh lehkhabu râwn theih ṭangkai tak dangte a awm a ni. He library hi inkhâwm hma leh inkhâwm bânah tute tân pawh hman theih a ni.

THLAWHHMA RAWNGBAWLNA ATANA INHMUHKHAWMNA INKHAWMTE

²⁰ Chawlhkâr khat chhûng leh chawlhkâr tâwpa hun hrang hrangah thuchhuahtute chu thlawhhma rawngbâwlna atâna inhmuhkhâwmna inkhâwmah rei lo tê tê an inhmukhâwm ṭhîn a. Chutianga inkhâwmte chu mi mal inah emaw, a remchânna hmun dangah emaw neih a ni ṭhîn. Chutiang atân chuan Kingdom Hall pawh hman a ni mai thei. Kohhran thu hrilhna bial hmun hrang hrangah group tlêm zâwka inhmuhkhâwmna neih a nih chuan, thuchhuahtute tân inhmuhkhâwmna hmuna kal leh thu hrilhna bial pan chu a awlsam phah a. Thuchhuahtute chu rang taka ruahmanna siamsak a, thu hrilhna biala kaltîr nghâl theih a ni. Group overseer pawhin a group-a awmte chu a ngaihsak lehzual thei ang. A group anga a hrana inhmuhkhâwmna neih chu a ṭhatna a awm laiin, dinhmun azirin group hrang hrangte chu a huhova inhmuhkhâwm a ngaih hun pawh a awm thei a. Entîr nân, chawlhkâr chhûng rawngbâwlnaa kal thuchhuahtu an tlêm chuan, Kingdom Hall emaw, a remchânna hmun dang emawa group hrang hrangte inhmuhkhâwm vek chu a sâwt mai thei. Chutiang chuan thuchhuahtute chuan thawhpui tûr an nei ang. Sawrkâr chawlh huna Kingdom Hall-a inhmuhkhâwm chu kohhran tân pawh a remchâng thei a. A nih loh leh, kohhran chuan Vênnainsâng Zirna neih zawha thlawhhma rawngbâwlna atâna inhmuhkhâwmna inkhâwm a huhova neih chu a thlang thei bawk.

²¹ Group-te a hrana an inhmuhkhâwm hunah, group overseer chuan thlawhhma rawngbâwlna atâna inhmuhkhâwmna inkhâwm chu a kaihruai ṭhîn a. Group overseer chuan a khât tâwkin amah ṭanpuitu, a nih loh leh unaupa dang tling tak chu kaihruai tûrin a ruat thei ang. A kaihruaitu chuan thlawhhma rawngbâwlna atâna ṭangkai tûr thu engemaw sawipui tûrin a inbuatsaih tûr a ni. Thlawhhma atâna ruahmannate siam a nih hnuah unaupa pakhat chu a ṭawngṭai ṭhîn a. Tichuan, thlawhhma rawngbâwlna bialah kal nghâl a ni ṭhîn. Chutiang inhmuhkhâwmna inkhâwm chuan minute nga aṭanga sarih chhûng a awh a; mahse, kohhran inkhâwm bâna neih a nih chuan a rei lo lehzual ang. Thu hrilhnaa chhuak tûrte tân fuihnate, kaihhruaina te, leh kawhhmuhna ṭhate a pe tûr a ni. Mi tharte emaw, ṭanpui ngaite emaw chu zirtîrna dawng tûrin thiltawn ngah tawh thuchhuahtute nên an inkawp thei ang.

KOHHRAN THAR LEH TETE TANA INKHAWM RUAHMANNATE

²² Zirtîrte an pun chhoh zêl chuan, kohhran pawh a pung chho va. Kohhran thar din tûra dîlna chu bial kantuin a thehlût tlângpui ṭhîn. Amaherawhchu, engemaw châng chuan group tête chuan an hnaih ber kohhran belh chu remchâng an ti zâwk mai thei.

²³ A châng chuan, kohhran lian lovahte chuan unaunute chauh an awm thei a. Chutiang a nih chuan, unaunu kohhrana ṭawngṭaina hmangtu emaw, inkhâwm kaihruaitu emawte chuan Pathian thua ruahmannate angin a lû a khuh tûr a ni. (1 Kor. 11:3-16) A tlângpui thuin, ani chu mipui hmaah a ṭhu ṭhîn a. Unaunute chuan inkhâwmnaah platform-a dingin thu an sawi lo. Chu aiin, inawpna pâwlin zir tûra a pêk chu chhiar chhuakin, an sawi ang a, a nih loh leh a tih tuitam nân sawihona emaw, lemchan emaw an hmang thei a ni. Branch office chuan unaunute zînga pakhat chu branch nêna indâwrna lam khawih tûr leh inkhâwmte kaihruai tûrin a ngên ang a. A hnua chutiang mawhphurhnate enkawl tûra tling unaupate an awm hunah anni chuan an enkawl ang.

BIAL INKHAWMPUITE

²⁴ Kum tin hian bial pakhata awm kohhrante chu ni khat awh bial inkhâwmpui pahniha tel tûrin ruahmanna siam a ni ṭhîn a. Hêng hun hlimawm takte hian inkhâwmpuia tel zawng zawngte chu Kristian inkawmhonaa an thinlung ‘inhawn ve’ theihna hun remchâng a pe a ni. (2 Kor. 6:11-13) Thil mamawh pakhat rilrua vawng rengin, Jehova inawpna pâwl chuan inkhâwmpui thupui tûr leh thusawi chi hrang hrangte a buatsaih a ni. Chûng chu thusawite, lemchante, thiltawn channawnnate, ngaihtuahna sawi chhuahnate, leh biangbiaknate hmanga pêk chhuah a ni a. Chutianga a hun taka kaihhruainate chuan inkhâwmpuia lo tel zawng zawngte chu a tichak a ni. Hêng inkhâwmpuite hian zirtîr tharte chu Jehova hnêna an inpumpêkna lantîr nâna baptisma chan theihna hun ṭha a pe a ni.

REGIONAL INKHAWMPUITE

²⁵ Kum tin vawi khat inkhâwmna lian zâwk neih a ni ṭhîn a. Hei hi ni thum awh regional inkhâwmpui a ni tlângpui a, bial engemaw zâta kohhrante an tel ṭhîn. Branch tênaute chuan branch bial chhûnga kohhrante hmun khata koh khâwm chu remchâng an ti zâwk mai thei. Ram ṭhenkhatah chuan inkhâwmpui ruahmante hi dinhmun emaw, inawpna pâwl kaihhruaina emaw avângin a danglam thei a. A khât tâwkin ram ṭhenkhatah chuan international inkhâwmpui emaw, special inkhâwmpui emaw neih a ni ṭhîn a, ram hrang hranga Thuhretu a sîng têlin an tel ṭhîn. Kum tam tak chhûngin, hêng Jehova Thuhretute inkhâwmpui chanchin lâr takte avângin mi tam tak chuan Lalram chanchin ṭha an hria a ni.

²⁶ Jehova hnêna inpumpêk tawhte tân chuan, inkhâwmpuite chu inpumkhata Pathian biakna hun hlimawm tak a ni a. Thutak hriatthiamna tharte chu chûng inkhâwmpuiahte chuan puan chhuah a ni. Inkhâwmpui ṭhenkhatah chuan, mi mal leh kohhrana zir tûr, a nih loh leh thu hrilhnaa hman tûr thu leh hla chhuah tharte chu tlângzarh a ni ṭhîn. Inkhâwmpuiah chuan baptisma channa a awm bawk a. Thlarau lama ṭhan chhoh nân inkhâwmpuite a pawimawh hle. Chûng chuan Jehova mite’n Isua Krista zirtîrte an nihzia târ langtu hmangaihna nei Kristian inpumpêkte hmanga din khawvêl puma inunauna an nei tih a târ lang a ni.—Joh. 13:35.

²⁷ Jehova mite neih tualchhûng kohhran inkhâwmte leh inkhâwmpuiahte kan telna hian Jehova duh zâwng ti tûrin min tichak a. Kan Kristian rinna tichhe thei khawvêl thununnate laka vênhim kan ni bawk. Chutiang inkhâwmna zawng zawng chuan Jehova chu a fakin, a chawimawi a ni. (Sâm 35:18; Thuf. 14:28) He tâwpna hunah hian a hnêna inpumpêkte tâna hetiang thlarau lama intihharhna min pêk avângin Jehova chungah kan lâwm hle a ni.

LALPA ZANRIAH

²⁸ Isua Krista thih champhaah kum tinin Jehova Thuhretute kohhran chuan khawvêl pumah Krista thih Hriatrengna, a nih loh leh Lalpa Zanriah chu an hmang ṭhîn a. (1 Kor. 11:20, 23, 24) Hei hi Jehova mite tân chuan kum khata inkhâwm pawimawh ber a ni. He Hriatrengna hmang tûr hian a bîk taka thupêk kan dawng si a.—Lk. 22:19.

²⁹ Hriatrengna chu Bible-a târ lan Kalhlên Kût neih nîah chiah kan hmang a. (Ex. 12:2, 6; Mt. 26:17, 20, 26) Kalhlên Kût chu, B.C.E. 1513-a Israel mite’n Aigupta an chhuahsan hriat rengna atâna kum tina hman ṭhin a ni. Chutih lai chuan, Jehova chuan an thla hmasa ber, ni 14-na chu Kalhlên Kût berâm no sa ei nî leh Aigupta sal tânna chhuahsanna nî atân a ruatsak a ni. (Ex. 12:1-51) Chumi nî chu nipui lai, chhûn leh zân a inchen nî zawhna Jerusalem aṭanga thla thar a lan ṭan aṭanga ni 13 chhiara chhût theih a ni a. A tlângpuiin, Hriatrengna chu nipui lai, chhûn leh zân a inchen nî zawha thla bial zân hmasa bera hman a ni ṭhîn.

³⁰ Hriatrengna hman dân tûr Isua sawi ngei chu, Matthaia 26:26-28-ah târ lan a ni a. Hei hi hun serh ropui leh mak dangdai tak a ni lo va, vân Rama Isua Krista roluahpui tûra kohna dawngtute telna entîr nei zanriah kîl hona pângngai tak a ni zâwk a. (Lk. 22:28-30) Kristian inpumpêk tawh mi dangte leh tuina neite chu a lo thlîrtute anga Lalpa Zanriah inkhâwma tel tûra sâwm an ni. An inkhâwmna hmang chuan Pathian Jehova’n a Fapa Isua Krista hmanga mi tinte hlâwkpui tûra a thilpêk an ngaihhlutzia an târ lang a. Hriatrengna neih hmain, he thilthleng tâna phûrna min pe tûr leh Bible zir belh duhna nei tûra min ṭanpui tûr special vântlâng thusawina neih a ni ṭhîn.

³¹ Jehova Thuhretute chuan ‘hmangaih leh thil ṭha tiha kan inchawh thawhna’ hun, kan inkhâwm hun chu an nghâkhlel hle a. (Heb. 10:24) Bâwih rinawm leh fing chuan kan thlarau lam mamawh nêna inmil tûr chutiang inkhâwmte chu harhvâng takin a buatsaih ṭhîn a. Jehova chhiahhlawh zawng zawngte leh tuina neite chu kan inkhâwmnaa tel ziaha hlâwkna tluantling hmu tûra fuih an ni. Jehova’n a inawpna pâwl hmanga a thil min pêkte hi thinlung tak zeta ngaihhlutna lantîrin, Pathian chhiahhlawhte chu kan inpumkhat a. A pawimawh berah chuan, Jehova kan fakin, kan chawimawi a ni.—Sâm 111:1.