A Tum Hlentu Thlawhhma Rawngbâwlna Atâna Inhmuhkhâwmna
1. Thlawhhma rawngbâwlna atâna inhmuhkhâwmnain a tum chu eng nge ni?
1 Ṭum khat chu, thu hrila an chhuah hmain Isua chuan zirtîr 70-te chu a hmukhâwm a. (Lk. 10:1-11) Anmahni chauh an ni dâwn lo va, “buh Neitupa,” Jehova’n a kaihruai ang tih hriatnawntîrin anni chu a fuih a ni. Tichuan, rawngbâwl tûra anmahni thuamtu kaihhruainate pein “pahnih zêlin” a inkawptîr a. Tûn laiah pawh, rawngbâwla kan chhuah hmain min fuih tûr te, min zirtîr tûr te, leh kawp min siamsak tûr tein inhmuhkhâwmna kan nei ṭhîn a ni.
2. Thlawhhma rawngbâwlna atâna inhmuhkhâwmna chu eng tia rei tûr nge a nih?
2 Rawngbâwlna atâna inkhâwmna chu tûnah tak chuan minute 10 aṭanga minute 15 awh a ni ṭhîn a, chutah chuan kawp siam te, rawngbâwlna tûr bial ruat te, leh ṭawngṭai te a tel a ni. Tûnah chuan siamrem a ni ta. April thla aṭangin rawngbâwlna atâna inhmuhkhâwmna chu minute nga aṭanga minute sarih awh a ni ang a. Mahse, inkhâwm bâna hman a nih chuan inkhâwma telte’n Bible sawihona nuam tak an neih tawh avângin, a tâwi lehzual tûr a ni. Thlawhhma rawngbâwlna atâna inhmuhkhâwmna tâwi tê neihna chuan kan zain rawngbâwlnaah hun tam zâwk min hmantîr thei ang. Chu bâkah, pioneer-te emaw, thuchhuahtute emaw chuan thlawhhma rawngbâwlna atâna inhmuhkhâwmna neih hmaa thu an hrilh ṭan tawh a nih chuan, rei lo tê chauh an chawlhsan a ngai dâwn a ni.
3. Thlawhhma rawngbâwlna atâna inhmuhkhâwmna chu thuchhuahtute’n an ṭangkaipui ber theih nân eng anga ruahman tûr nge ni?
3 Thlawhhma rawngbâwlna atâna inhmuhkhâwmna chu thuchhuahtute ṭangkaipui theih tûr zâwnga ruahman tûr a ni a. Kohhran tam takah chuan, hmun khata inhmuhkhâwm aiin group tê têa inṭhen chu a hlâwkthlâk zâwk a ni. Thuchhuahtute tân inhmuhkhâwmna hmun pan leh thu hrilhna bial pan chu a awlsam phah a. Rang taka kawpte siamin, group overseer tân a chante ngaihsak chu a awlsam lehzual a ni. Upahote chuan tualchhûng dinhmunte ngaihtuahin a ṭha ber tûr thu tlûkna an siam thei ang. Ṭawngṭaina nêna inhmuhkhâwmna tihtâwp hmain, mi tinte chuan an chhuahna tûr hmun leh an kawppui tûrte an hre vek tûr a ni.
4. Engvângin nge thlawhhma rawngbâwlna atâna inhmuhkhâwmna chu inkhâwm dangte aiin a pawimawh nêp zâwk anga kan thlîr loh vang?
4 Kohhran Inkhâwmna Dang Aiin A Pawimawh Nêp Lo: Thlawhhma rawngbâwlna atâna inhmuhkhâwmna hi rawngbâwla chhuakte hlâwkpui atâna neih a nih avângin, kohhran pumin an tel thei dâwn lo va. Mahse, ho lam taka lâk tûr emaw, kohhran inkhâwm dang aia pawimawh nêp zâwk anga thlîr tûr emaw a ni lo. Inkhâwm dangte ang bawkin, hei pawh hi hmangaih leh thil ṭha tiha inchawk tho tûra Jehova hnên aṭanga lo kal châwmna pakhat a ni a. (Heb. 10:24, 25) Chuvângin, Jehova chawimawitu a nih theih nân leh inkhâwma telte’n an hlâwkpui theih nân kaihruaitu chu uluk takin a inbuatsaih tûr a ni. A theih phawt chuan, rawngbâwla chhuak thuchhuahtute chuan inhmuhkhâwmnaa theih tâwp chhuaha tel chu an tum tûr a ni.
Thlawhhma rawngbâwlna atâna inhmuhkhâwmna chu ho lam tak emaw, kohhran inkhâwm dangte aia pawimawh nêp zâwk emaw angin kan thlîr tûr a ni lo
5. (a) Thlawhhma rawngbâwlna atâna inhmuhkhâwmna tûr a ruahman hunah service overseer chuan eng mawhphurhna nge a neih? (b) Engtin nge unaunu chuan thlawhhma rawngbâwlna atâna inhmuhkhâwmna chu a kaihhruai ang?
5 Kaihruaitu Inbuatsaihna: Inkhâwmnaa chanvo a neihte ṭha taka ti thei tûr chuan, miin a chanvo chu a lo dawn lâwk a ngai a. Thlawhhma rawngbâwlna atâna inhmuhkhâwmna pawh chutiang tho chu a ni. Rawngbâwlna group-te a hrana an inhmuh chuan, group overseer-te emaw, anmahni ṭanpuitute emaw chuan inhmuhkhâwmna chu an kaihruai tûr a ni ngei mai a. Mahse, an infinkhâwm dâwn a nih chuan, service overseer chuan hun hmangtu tûr pakhat a ruat lâwk ang. Service overseer ṭhenkhat chuan hun duan chu kaihruaitu tûr zawng zawng hnênah an pe a, information board-ah pawh an târ bawk a ni. Service overseer chuan kaihruaitu tûrte a ruat hunah hêng inkhâwmte ṭhatna leh hlawhtlinna chu a kaihruaitute zirtîr thiamna leh remruat thiamnaah a innghat dâwn tih hre rengin remhriatna a hmang tûr a ni. Upa te, kohhranho rawngbâwltu te, a nih loh leh baptisma chang tawh unaupa tling takte ruat tûr an awm loh nîah, service overseer chuan baptisma chang tawh unaunu chu kaihruai tûrin a ruat ang.—“Unaunuin A Kaihhruai A Ngaih Hunah,” tih thuziak chu en rawh.
6. Engvângin nge kaihruai tûra chanvo neitu tân ṭha taka inbuatsaih a pawimawh?
6 Theocratic Rawngbâwlna School emaw, Rawngbâwlna Inkhâwm emawa chanvo kan neih hian, chu chu kan ngai pawimawhin, uluk takin kan inbuatsaih ṭhîn. Kan zîngah hian inkhâwmna lam panna kawnga kan sawi tûr ngaihtuah ṭan chauh chu kan awm mang meuh lo vang. Thlawhhma rawngbâwlna atâna inhmuhkhâwmna kaihhruaina chanvo pawh chutiang bawka thlîr tûr a ni. Tûnah chuan inhmuhkhâwmna chu a tâwi lehzual tawh dâwn a, chuvângin inhmuhkhâwmna awmze nei tak leh a hun taka tihtâwp a nih theih nân inbuatsaihna ṭha neih chu a pawimawh hle ang. Inbuatsaihna ṭhaah chuan rawngbâwlna tûr bial lo neih lâwk pawh a tel a ni.
7. Kaihruaitu chuan eng thilte nge a sawipui theih?
7 Sawiho Tûr Chu: Rawngbâwlna bial dinhmunte chu a inan loh avângin, bâwih rinawm chuan thlawhhma rawngbâwlna atâna inhmuhkhâwm neih hun apianga sawi tûr outline a pe lo. “Thlawhhma Rawngbâwlna Atâna Inhmuhkhâwmnaa Ngaihtuah Theihte” tih bâwm chuan sawi theih tûr ṭhenkhat a târ lang. A tlângpui thuin, inhmuhkhâwmna chu sawihona anga neih a ni a. A châng chuan, ṭha taka buatsaih lemchan emaw, jw.org aṭanga lâk chhuah video emaw chu telh theih a ni ang. Thlawhhma rawngbâwlna atâna inhmuhkhâwmna kaihruai tûra inbuatsaih hunah, chu mi nîa rawngbâwla chhuakte chu engin nge fuih anga zirtîr thei ang tih chu ngaihtuah tûr a ni.
Thlawhhma rawngbâwlna atâna inhmuhkhâwmna kaihhruai tûra inbuatsaih hunah, chu mi nîa rawngbâwla chhuakte chu engin nge fuih anga zirtîr thei ang tih chu ngaihtuah tûr a ni
8. Inrinni leh Chawlhnia thlawhhma rawngbâwlna atâna inhmuhkhâwmnaah eng chungchâng sawiho nge ṭangkai ber ang?
8 Entîr nân, Inrinni-ah chuan thuchhuahtu a tam zâwkte chuan Vênnainsâng leh Awake! chu an sem ṭhîn a. Inrinni-a rawngbâwla chhuak tam tak chu chawlhkâr chhûnga chhuak thei lote an ni a, Chhûngkuaa Pathian Biakna neih zâna thusawi dân tûr an tihchhin chu an lo theihnghilh tawh pawh a ni thei. Chuvângin, Kan Lalram Rawngbâwlna hnung lama thusawi dân tûr entîrnate zînga pakhat ennawnpui chu a ṭangkai thei ang. Tih theih tûr dangte zîngah chuan magazine pêk chhuahna thusawia tual chhûnga chanchin thar te, thilthleng te, a nih loh leh kût nîte chanchin zeh tel dân emaw, magazine latute tlawhkîr leh theih nâna thusawi tûr emawte a tel thei ang. Inhmuhkhâwmnaa tel mi ṭhenkhatin kan pêk chhuah tum magazine-te an lo sem tawh a nih chuan, kaihruaitu chuan anni chu rawtna tâwi sawi tûr emaw, thiltawn ṭha an neihte sawi tûr emawin a sâwm thei a ni. Chawlhni-ah pawh kaihruaitu chuan chu mi thlaa pêk chhuah tûr thu leh hla chhuahte chungchângah chutiang bawka tih chu a thlang thei a. Zir tûr thu leh hla chhuah, Chanchin Ṭha brochure te, Pathian Thu Ngaithla Rawh tih brochure te, leh Bible Zirtîrna lehkhabu te chu eng nîah pawh a sem chhuah theih a ni.
9. Chawlhkâr tâwpa special campaign neih a nih hunah eng nge sawiho theih a nih?
9 Kohhranin chawlhkâr tâwpah special campaign a neih chuan, kaihruaitu chuan sâwmna, a nih loh leh tract ruala magazine chhuak thar berte sem dân tûr chu a sawi thei a, a nih loh leh miin tuina a lantîr huna tih dân tûr pawh a sawi thei ang. A nih loh leh, chutiang campaign neihte hlutnate târ langtu thiltawnte chu a sawi thei bawk ang.
10, 11. Engvângin nge thlawhhma rawngbâwlna atâna inhmuhkhâwmna hlawhtling tûr chuan thuchhuahtute inbuatsaihna chu thil pawimawh tak a nih?
10 Thuchhuahtute Inbuatsaihna: Thlawhhma rawngbâwlna atâna inhmuhkhâwmna hlawhtling tûr chuan thuchhuahtute pawhin tih tûr an nei a. Chhûngkuaa Pathian biaknaa rawngbâwlna atân an inbuatsaih lâwk thei a, chutiang chuan thuchhuahtu dangte hnênah sawi chhâwn tûr an nei thei dâwn a ni. Inbuatsaihna ṭhaah chuan tawi khaw muang lova rawngbâwlna bial lam kan pan nghâl theihna tûra inhmuhkhâwmna hmun kan thlen hmaa kan mamawh tûr magazine-te leh thu leh hla chhuahte neihsa pawh a tel a ni.
11 Thlawhhma rawngbâwlna atâna inhmuhkhâwmna ṭan hmaa thlen pawh a pawimawh hle bawk. Inkhâwm zawng zawngah a hun taka thlen chu kan tum ngei mai. Mahse, thlawhhma rawngbâwlna atâna inhmuhkhâwmnaa kan tlaina chuan, mi dangte a tibuai zual bîk a ni. Engtin nge? Kaihruaitu unaupa chuan ruahmanna a siam hmain thil tam tak a ngaihtuah a. Thuchhuahtu an chhuak tlêm a nih chuan, a ṭhen azâr lo thawh tawhna bialah tirh a thlang thei a. A ṭhen chu kea lo kal an niha thu hrilhna bial hla deuhva kal ngai a nih chuan, anni chu lîrthei neite nêna inkawptîr a tum thei a. Thu hrilhna bial chu hmun him lo a nih chuan, unaupate chu unaunute thawhpui tûrin emaw, an bul hnaia thawk tûrin emaw a ruat thei bawk. Thuchhuahtu hrisêlna ṭha vak lote chu chhuk chho tlêmna leh kailâwn tam lohna inahte kal tûrin a ruat thei a. Tin, thuchhuahtu tharte chu thiltawn ngah zâwkte nêna inkawp tûrin a ruat thei bawk a ni. Mahse, lo thleng tlai an awm hian chutiang ruahmanna a siam zawng zawng chu thlâk leh vek a ngai fo ṭhîn. A chhan leh vâng ṭha tak neia tlai châng chu a awm thei ngei mai. Mahse, kan tlai fo a nih chuan, hei hi thlawhhma rawngbâwlna atâna inhmuhkhâwmna ka ngaihhlut tâwk loh vâng nge ni a, mi mala ka inruahman fel loh vâng zâwk? tiin kan inzâwt thei a ni.
12. Rawngbâwlnaa kawppui tûr i thlang ṭhîn a nih chuan, eng nge i ngaihtuah theih?
12 Rawngbâwlnaa tel tûra inhmukhâwm thuchhuahtute chuan inkhâwm ṭan hmain an kawppui tûr an thlang thei a, a nih loh leh kawp an siam hun an nghâk thei a ni. Mahni kawppui tûr i thlang lâwk ṭhîn a nih chuan, i ṭhian duhzâwngte chauh kawp ṭhîn lovin, thuchhuahtu dangte pawh kawpin i “inhawng” lehzual thei ang em? (2 Kor. 6:11-13) Thuchhuahtu tharte ṭanpui tûrin a khât tâwkin i thawhpui thei ang em? (1 Kor. 10:24; 1 Tim. 4:13, 15) Thu hrilh i ṭanna tûr hmun chungchânga kaihhruaina pawh tiamin, kaihhruaina i dawn eng pawh chu ngun takin ngaithla ang che. Inhmuhkhâwmna tihtâwp hnuah ruahmanna siam chu thlâk suh la, thu hrilhna bial chu pan nghâl vat zâwk ang che.
13. A tel zawng zawngin mahni chanvo ṭheuh taima taka an hlen chuan, thlawhhma rawngbâwlna atâna inhmuhkhâwmna chu engtin nge kan hlâwkpui ang?
13 Isua’n rawngbâwl tûra a tirh chhuah 70-te chu thu an hrilh zawhah “lâwm takin an lo hâwng a.” (Lk. 10:17) Thu hril tûra an chhuah hmaa Isua nêna an inhmuhkhâwmna chuan hlawhtling tûrin a ṭanpui a ni tih rinhlelh rual a ni lo. Tûn laiah pawh thlawhhma rawngbâwlna atâna inhmuhkhâwmna chu chutiang bawkin a ṭangkai thei a. Chuta tel zawng zawngin mahni chanvo ṭheuh taima taka an hlen chuan, thlawhhma rawngbâwlna atâna inhmuhkhâwmna hian ‘hnam zawng zawng hriattîr tûra’ kan mawhphurhna hlen tûrin min fuih anga, min thuam nghetin, leh min buatsaih dâwn a ni.—Mt. 24:14.