I Awmna Field Service Group I Hlâwkpui Theih Dân
1. Book Study inkhâwm kan neih laia kan dawn hlâwkna engte nge tûna kan field service group aṭanga kan la hmuh theih?
1 Book Study inkhâwm kan neih lai kha i ngai ṭhîn em? Khatih lai khân, a mihring kan tlêmin, a boruak pawh a zâng zâwk a. Chu chuan thlarau lama min ṭanpui thei inṭhian ṭhatna neih a ti awlsam a ni. (Thuf. 18:24) Book study overseer chuan kan dinhmun danglam bîkte chu a hre theiin, mi mal anga fuihna leh ṭanpuina min pe thei a. (Thuf. 27:23; 1 Pet. 5:2, 3) Hêng hlâwknate hi kan field service group aṭangin kan la dawng thei reng a ni.
2. Thlarau lama min ṭanpuitu field service group-a inṭhian ṭhatna nei tûrin engtin nge hma kan lâk theih?
2 Hma La Rawh: Field service group-te hi book study group ang vêla lian a ni tlângpui a. Mi dangte nêna “rilru hmunkhata” rawngbâwlnaa kan kal hian inṭhianna ṭha tak kan nei thei a ni. (Phil. 1:27, 28) In group-a mi eng zât nge i thawhpui tawh? He mi chungchângah hian i “inhawng” lehzual thei ang em? (2 Kor. 6:13) Chu bâkah, kan group-a awm tuemaw chu Chhûngkuaa Pathian Biakna kan neih zâna lo tel ve tûr emaw, chaw ei tûr emawin kan sâwm thei a. Kohhran ṭhenkhat chuan, kohhran dang aṭanga thusawi tûra an sâwm unaupa chunga khualchhawn thiamna lantîr tûrin field service group-te chu a indawtin an ruat lâwk a. Chutianga anmahni tihve nî a lo thlen chuan thusawitu a lo tel thei emaw, tel thei lo emaw pawh ni se, group-a mite chu infuih tawn tûr leh chaw ei ho tûrin an kal khâwm ta ṭhîn a ni.
3. Kan field service group-a berâm enkawlna dawn theihna hun remchâng ṭhenkhat chu engte nge ni?
3 Tûnah chuan chawlhkâr khatah vawi hnih chauh inhmu tawh mah ila, chu chu thuchhuahtute’n berâm enkawlna an dawng tlêm tawh zâwk tihna a ni lo. Group chhûnga mite hnêna mi mal fuihna pe tûr leh rawngbâwlna lama zirtîr tûrin group overseer-te chu ruat an ni a. In group overseer-in a la thawhpui lo che a nih chuan, engvângin nge nangmah thawhpui tûra i ngen loh vang? Chu bâkah, service overseer chuan thla tinin rawngbâwlnaah group khat chu Inrinni leh Chawlhni-ah a thawhpui ṭhîn a. Field service group tlêm tê awmna kohhran tê-ah chuan group tinte kum khata vawi hnih tlawh chhuak tûrin ruahmanna a siam thei a ni. In group a rawn tlawh huna rawngbâwlnaa chhuak ve thei tûrin i hun duan chu i siam rem em?
4. (a) Engtin nge rawngbâwlna atâna inhmuhkhâwmna chu kaihhruai a nih ṭhin? (b) Engvângin nge kan in chu thlawhhma rawngbâwl nâna inhmuhkhâwmna hmun atâna hmantîr chu kan ngaihtuah ang?
4 Inrinni leh Chawlhni-a group tin a hranga rawngbâwl tûra inhmuh khâwm chu a ṭangkai hle a. Hun inang deuh veka hmun hrang hranga inhmuhkâwmna neih chu thuchhuahtute tân inhmukhâwmna hmuna kal, a nih loh leh thu hrilhna biala kal a awlsam phah thei a ni. Thuchhuahtute chu kawppui tûr siamsak a, thu hrilhna biala tirh chhuah nghâl theih an ni ang. Chutianga tihna chuan group overseer tân a group-a mite ngaihsakna pêk a tiawlsam zual a ni. Amaherawhchu, dinhmun engemaw tak avânga group pahnih emaw, a aia tam emaw thawhhona neih a ngaih châng a awm thei a. Kohhran pum chu thla tin Inrinni hmasa bera rawngbâwl tûra an inhmukhâwm emaw, Vênnainsâng Zirna neih zawhah an inhmukhâwm ṭhîn emaw a nih chuan, group khata awmte chu ṭhu khâwm a, thlawhhma rawngbâwlna atâna inhmuhkhâwmna chu ṭawngṭaina hmanga khâr a nih hmain, an group overseer-te tâna inkawp tûrte leh an thawhna hmun tûrte ruahman nâna hun pêk chu a ṭangkai fo a ni.—“I In I Hmantîr Thei Ang Em?” tih bâwm chu en rawh.
5. Kohhrana Book Study kan neih ṭhin chu tihtâwp ni tawh mah se, eng nge kan rin tlat theih?
5 Kohhrana Book Study kan neih ṭhin chu tihtâwp ni tawh mah se, Pathian Jehova chuan a duhzâwng kan tihna tûra kan mamawh engkim chu min la pe zêl a ni. (Heb. 13:20, 21) A enkawlna hnuaiah chuan engmah kan tlachham lo. (Sam 23:1) Kan awmna field service group kal tlangin malsâwmna tam tak kan dawng thei a. Rawngbâwlnaa ‘taima taka’ theh tam tûra hma kan lâk chuan kan “ât tam bawk” ang.—2 Kor. 9:6.
[Phêk 6-naa bâwm]
I In I hmantîr Thei Ang Em?
Kohhran ṭhenkhatah chuan inhmuhkhâwmna tûr in a indaih loh avângin Inrinni leh Chawlhni-ah chuan group zawng zawng chu hmun khatah an inhmukhâwm ṭhîn a. Thlawhhma rawngbâwlna atâna inhmuhkhâwmna hi kohhran ruahmanna pêng pakhat a ni a, chuvângin, mahni in inhmuhkhâwm nâna hmantîr chu chanvo hlu tak a ni. Chu mi atân in in i hmantîr thei ang em? In in chu ṭha tâwk lova i hriat avângin, hmantîr hreh suh. Upate chuan in in awmna lai leh book study neihna tûr in an thlan laia an thil ngaihtuahte chu an chhût tel ang. In in chu hmantîr i phal a nih chuan in group overseer hriattîr ang che.