“In Thinlung Tinghet Rawh U”
“Pathian duhzâwng in tih hnuin thiltiam chu in hmuh theih nân chhelna in ngai asin.”—HEBRAI 10:36.
1, 2. (a) Kum zabi pakhatnaa Kristiante chungah eng nge thleng? (b) Rinna tihchak loh hi engvângin nge thil awlsam tak a nih?
BIBLE ziaktu zawng zawng zîngah tirhkoh Paula anga rinna sawi zîng an awm lo. Rinnaa thite emaw, rinna lama chak lote emaw chungchâng chu a sawi zîng hle a. Entîr nân, Humenaia leh Alexsandra-te chu “rinna kawngah chuan lawng keh angin an keh chhe ta,” a. (1 Timothea 1:19, 20) Dema’n “tûn lai khawvêl hi a ngainat avângin,” Paula a kalsan a ni. (2 Timothea 4:10) Mi ṭhenkhat chuan an kristian lo leh pawisak nei lova an thil tihte avângin “rinna an phatsan” a. Mi dangte chu finna dik lo bumin an awm a, “rinna kawng chu an kal kawisan ta” a ni.—1 Timothea 5:8; 6:20, 21.
2 Engvângin nge hriakthih Kristiante chu hemi kawngah an tlâwm? Aw le, “rinna hi thil beiseite awm ngeia hriatna, thil hmuh lohte hriatfiahna a ni.” (Hebrai 11:1) Hmuh theih lohvah rinna nung kan nghat a ni. Thil hmuh theih atân chu chu a ngai lo. Hmuh theih hauhsakna tûra thawh hi hmuh theih loh thlarau lam hausakna tûra thawh aiin a awlsam zâwk a. (Matthaia 19:21, 22) Thil hmuh theih tam takte—“tisa châkna te, mit châkna te” ang—chu kan taksa ṭha famkim lovin nasa takin a ngên a, kan rinna a tichak lo thei a ni.—1 Johana 2:16.
3. Eng ang rinna nge Kristiante’n an chhawmnun ang?
3 Chutichung pawhin, Paula’n: “Pathian hnêna lo kal chuanin, a ni chu a awm tih leh zawngtute hnêna lâwmman pêk hmang a ni tih rin tûr a ni,” tiin, a sawi a. Mosia chuan chutiang rinna chu a nei a ni. Ani chuan “Lâwmman pêk tûr chu a thlîr ṭhîn,” a; “hmuh theih lova chu a hmuh avângin a tuar ṭan ṭan a ni.” (Hebrai 11:6, 24, 26, 27) Kristiante chuan hetiang rinna an mamawh a ni. Thu ziak hmasa zâwka sawi tawh angin, Abrahama chu hemi kawngah entawn tûr ṭha tak a ni.
Abrahama Entîr Rinna
4. Rinnain Abrahama nun kawng chu engtin nge a nghawng?
4 Abrahama Ur-a a awm laiin chi thlah, hnam zawng zawnga mite malsâwmna ni tûra pa a ni dâwn tih thutiam a dawng a. (Genesis 12:1-3; Tirhkohte 7:2, 3) Chu thutiam rinchhan chuan Abrahama’n Jehova thu a âwih a, Haran-ah pêm hmasain a hnuah Kanaan-ah a pêm a ni. Chutah, ram chu Abrahama thlah hnêna pe tûrin Jehova’n thu a tiam a. (Genesis 12:7; Nehemia 9:7, 8) Nimahsela, Jehova thutiam tam tak chu Abrahama thih hnua thleng famkim tûr a ni. Entîr nân, Abrahama khân Kanaan-ah ram a nei ngai lo—inphumna hmun atâna a lei Makpela pûk tih mai loh chu. (Genesis 23:1-20) Chutichung pawhin, Jehova thu-ah rinna a nei a ni. Thil dang zawng aiin, ani chuan, “khua lungphûmte nei mi, Pathian rêlbâwl leh siam,” kan hmaa lo thleng tûrah chuan rinna a nei a. (Hebrai 11:10) Chutiang rinna chuan a dam chhûngin a châwm a ni.
5, 6. Jehova thutiam chungchângah Abrahama rinna chu engtia fiah nge a nih?
5 Hei hi a bik takin Abrahama thlahte hnam ropui tak ni tûra thutiam chungchângah a hmuh theih a. He thil lo thlen theih nân Abrahama chuan fapa a mamawh a, hun rei tak chhûng a malsâwmna a nghâk a ni. Pathian thutiam a hriat hmasak ber khân engtia upa nge a nih kan hre lo; mahse, Haran zin kawng hla taka a kal laiin Jehova’n fa a la pe rih lo. (Genesis 11:30) ‘Sum tam tak leh mi tam tak nei’ hman tûr khawpin Haran-ah hun rei tak chhûng a chêng a, Kanaan-a a pêm khân ani hi kum 75-a upa a ni a, a nupui Sari chu 65-a ni. Chutichung pawhin fapa an la nei lo ta cheu mai. (Genesis 12:4, 5) Sari chu kum 70 laihawl vêl a lo nih chuan Abrahama fa hrinsak tûrin a upa lutuk tawhah a inngai a. Hemi vâng hian chûng lai hnam dân chu zâwmin, Abrahama hnênah a bâwihnu Hagari a pe a; tin, chu nu aṭangin fapa a nei ta a. Mahse, hei hi thutiam fa a ni lo. A tawpah chuan Hagari leh a fa, Ismaela chu thawn bo an ni. Chutichung pawhin, Abrahama’n an chungchângah dîlna a siam a, Jehova’n Ismaela chu malsâwm tûrin thu a tiam a ni.—Genesis 16:1-4, 10; 17:15, 16, 18-20; 21:8-21.
6 Pathian hun tiam dik takah—rei tak, thutiam an hriat hmasak ber aṭanga hun rei takah—kum 100 mi Abrahama leh kum 90 mi Sari chuan mipa naupang Isaaka chu an nei ta a. Chu chu thil mak tak a va ni êm! He nupa upa tawh tak tân an taksa “thi tawh” chuan nun thar a pêk chhuahna chu thawhlehna a tluk lo chauh a ni. (Rom 4:19-21) Nghah chhûng a rei nâ a, a tâwpa thutiam a thlen famkim hun chuan nghah manhla tak a ni.
7. Engtin nge rinna chu chhelna nêna khaikhin a nih?
7 Rinna chu reilote atân chauh a ni lo tih Abrahama entîr rinna chuan min hriat nawntîr a. Paula’n: “Pathian duhzâwng in tih hnuin thiltiam chu in hmuh theih nân chhelna in ngai asin. . . . Keini zawng boral tûra hnungtawlh pâwla mi kan ni lo va; nunna humhim tûra rinna nei pâwla mi kan ni zâwk,” tia ziakin rinna chu chhelna nên a tehkhin a ni. (Hebrai 10:36-39) Mi tam takte chuan thutiam thlenkim nân hun rei tak an nghak tawh a. Mi ṭhenkhatin an dam chhûng zawng an nghâk a ni. An rinna nghet tak chuan a châwm a ni. Abrahama angin, Jehova hun tiamah lâwmman chu an dawng ang.—Habakuka 2:3.
Pathian Thu Ngaihthlâkna
8. Tûn laiah engtin nge Jehova thu kan ngaihthlâk a, engvângin nge chu chuan kan rinna a tihngheh ang?
8 A tlêm berah thil pali chuan Abrahama rinna a tinghet a, chûng thilte chuan nang pawh a ṭanpui thei che a ni. A hmasa berah, Jehova thusawi ngaihsakna hmangin ‘Pathian chu a awm tih a rinna’ a lantîr a. Chutiang chuan, ani chu Jeremia hun laia Jehova laka rinna nei; mahse, a thua rinna nei lo Juda-te lakah a hrang a ni. (Jeremia 44:15-19) Tûn laiah Petera’n, ‘khâwnvâr in thinlung hmun thima êng,’ tia a sawi, thâwk khuma pêk a Thu, Bible kal tlangin Jehova chuan min bia a ni. (2 Petera 1:19) Bible ngaihsak taka kan chhiarin, “rinna . . . thua châwm” kan ni. (1 Timothea 4:6; Rom 10:17) Chu bâkah, he ni hnuhnungah hian, ‘bawih rinawm leh fing takte’ chuan Bible thu bul a taka hman dân kaihhruaina leh Bible hrilh lâwkna hriatthiamna thlarau lam “a hun apianga . . . chaw,” a pe bawk a ni. (Matthaia 24:45-47) Hemi kawng kaltlanga Jehova thu ngaihthlâk chu rinna nghet neih theih nân tihmâkmawh a ni.
9. Kristian beiseina kan rin tak tak chuan eng nge a rah chhuah ang?
9 Abrahama rinna chu a beiseina nên a inkungkaih hnai êm êm a. “Ani chuan beisei takin a ring a, chi tam takte pa a lo nih theih nân.” (Rom 4:18) Hei hi mi ṭanpui thei thil a pahnihna chu a ni. Jehova chu “zawngtute hnêna lâwmman pêk hmang a ni,” tih kan theihnghilh ngai tûr a ni lo. Tirhkoh Paula’n: “Pathian nung chu kan rin avângin kan thawk rim a, kan bei hrâm hrâm a ni,” a ti a. (1 Timothea 4:10) Kristian beiseina kan rin tak tak chuan, Abrahama ang bawkin, kan nun kawng pumpui chu kan rinna tilangtu a ni ang.
Pathian Nêna Inbiakna
10. Engang ṭawngṭaina chuan nge kan rinna a tihchak ang?
10 Abrahama chuan Pathian a bia a, hei hi a rinna tichaktu a pathumna a ni. Tûn laiah pawh, Isua kal tlanga thil thlâwn pêk ṭawngṭaina hmangin, keini pawhin Jehova kan be thei a ni. (Johana 14:6; Ephesi 6:18) Isua’n: “Mihring Fapa hi a lo kal hun chuan khawvêlah hian rinna a rawn hmu ang em ni?” tih zawhna chu ṭawngṭai fo a ngaih chhan sawi uarna tehkhin thu a sawi hnuin a zâwt a. (Luka 18:8) Rinna tichak thei ṭawngṭaina chu ngaihtuahna tel lo emaw, amaha lo chhuak mai emaw a ni lo. Awmzia thûk tak a nei a ni. Entîr nân, thu tihthlûkna pawimawh tak kan siamin emaw, harsatna nasa tak kan tawhin emaw thinlung taka ṭawngṭaina chu a pawimawh hle a ni.—Luka 6:12, 13; 22:41-44.
11. (a) A thinlung Pathian hmaa a hawnin Abrahama chu enganga tihchak nge a nih? (b) Abrahama thil tawn aṭangin eng nge kan zir theih?
11 Abrahama a lo upat a Jehova’n a thutiam chi thlah a la pêk loh khân, Pathian hnênah a manganna a thlen a. Jehova’n a thlamuan a ni. Eng nge a rah chhuah chu? Abrahama chuan “LALPA chu a ring a; tichuan ani chuan chu chu a felnaah a ruatsak ta a.” Tichuan, a thlamuanna tinghet tûrin chhinchhiahna a pe a ni. (Genesis 15:1-18) Ṭawngṭaiin Jehova hnêna kan thinlung kan hawng a nih chuan, a Thu, Bible-a Jehova thlamuannate ring takin pawm rawh; tichuan, Jehova chuan kan rinna a tichak bawk ang.—Matthaia 21:22; Juda 20, 21.
12, 13. (a) Engtin nge Abrahama chu Jehova kaihhruaina a zawm avângin malsâwm a nih? (b) Engang thil tawnte hian nge kan rinna a tihngheh ang?
12 Abrahama rinna tichaktu a palina chu Pathian kaihhruaina a zawm avânga Jehova pêk ṭanpuina a ni. Abrahama’n rûn hmang lalte kut ata Lota chhanchuak tûra a kal khân Jehova’n hnehna a pe a. (Genesis 14:16, 20) A thlahte rochun tûr rama mikhual a nih laiin, Jehova chuan Abrahama chu khawvêl thil lamah a tihausa bawk a ni. (Genesis 14:21-23, khaikhin rawh.) A inchhûng huaihawttuin Isaaka nupui tûr âwm a zawnnaah Jehova’n a kaihruai a ni. (Genesis 24:10-27) Ni e, Jehova chuan ‘Abrahama chu thil engkimah mal a sâwm’ a ni. (Genesis 24:1) Chuvângin a rinna chu a nghet hle a, “ka ṭhian” tia koh theih tûr khawpin Pathian Jehova nên inlaichînna bul tak a neih phah ta a ni.—Isaia 41:8; Jakoba 2:23.
13 Tûn laiah chutiang rinna nghet tak kan nei thei ang em? Aw, nei thei e. Abrahama angin a thupêkte zawmna hmanga Jehova kan fiah chuan keini pawh mal min sâwm bawk ang: chu chuan kan rinna a tinghet dâwn a ni. Entîr nân, 1998 Rawnbâwl Kum Report kan en chuan chanchin ṭha hril tûra a thupêkna zâwmtu mi tam takte chu mak tak maiin malsâwm an ni tih a lang a ni.—Marka 13:10.
Tûn Laia Rinna Chhuanawm
14. Engtin nge Jehova’n Lalram Chanchin No. 35 hmanga beihpui thlâkna mal a sâwm?
14 Kum kalta 1997 October thlaah Lalram Chanchin No. 35 nêna khawvêl pum huapa beihpui thlâk chu hlawhtlinna chhinchhiah tlâk pakhat a ni a, mimal Hriatpuitu maktaduai tam takte ṭhahnem ngaihna leh phûrna chungah kan lâwm tak zet a ni. Ghana-a thil thleng chu entawn chi a ni. Copy maktaduai 2.5 dâwn lai chu ṭawng chili-in an semchhuak a, chuvângin mi 2,000 deuh thawte chuan Bible zirpuina nei tûrin an dîl a ni. Kupra rama Lalram Chanchin sem chhuaktu Hriatpuitu pahnihte chuan puithiam pakhatin a zui a ni tih an hria a. Hun engemaw a ral hnuah Lalram Chanchin copy khat an pe a. Ani chuan lo dawng tawh niin: “He thuchah hian ka rilru a khawih êm êm a, chuvângin he thil buatsaihtute hnênah lâwmthu ka hrilh duh a ni,” a ti a ni. Denmark ramah chuan Lalram Chanchin copy maktaduai 1.5 semchhuah a ni a, rah ṭha tak a chhuah bawk. Vântlâng zirtîrna lama thawk hmeichhe pakhat chuan: “Lehkha sem chi hian mi tin tân thuchah a keng a ni. Hriat thiam awlsam tak a ni a, mi chêttîrin, hriat belh duhna min neihtîr bawk. Tawi famkim takin thubuai chu a sawi fuh hle mai,” a ti a.
15. Jehova’n hmun tina mite hnêna thleng tûra nasa taka ṭan lâkna chu mal a sâwm a ni tih eng thiltawnin nge lantîr?
15 Kum 1998 chhûngin mite thu hrilhna chu an inah mai ni lovin, khawi hmunah pawh hril tûra nasa taka ṭan lâk a ni. Côte d’Ivoire rama missionary nupa tuak khat chuan lawng chawlhna hmunah lawng 322-te an tlawh chhuak vek a. Lehkhabu 247, magazine 2,284, brochure 500, leh lehkha sem chi za tam tak; lawng pute’n tuipuia an en tûr video-te nên an sem chhuak a ni. Canada rama Hriatpuitu pakhat chu lirthei ruangâm siamna hmunah a kal a. A neitu chu a tui hle a, thu hrilh nâna an hun hman chu dâwrtute avângin dârkâr khat tling awrh chauh ni mah se, unaupa chuan dârkâr li leh a chanve ngawt a hmang ral a ni. A tawpah chuan zân dâr 10:00-a Bible zir an ruahman ta a. Nimahsela, a chângin zân lai thlengin an ṭan thei lova, zîng lam dâr hnih thleng hun an hmang ṭhîn a. Hun duan chu chona ang ni mah se, rah chhuah ṭha hmuh a ni. Chu pa chuan inkhâwmnaa a tel theih nân a dâwr chu Chawlhnia khâr tûrin thu a titlu ta a. Reilotê-ah ani leh a chhûngte chuan hmasawnna ṭha an nei a ni.
16. Phût brochure leh Hriatna (English) chu thu hrilh leh zirtîrna hnaah hmanraw thiltithei tak a ni tih eng thiltawn hian nge lantîr?
16 Eng Ti Tûrin Nge Pathianin Min Phût? tih brochure leh Chatuan Nunnaa Hruaitu Hriatna (English) lehkhabute chu thu hrilh nân leh zirtîr nân hmanraw thil tithei tak a ni chhunzawm zêl a. Italy-ah bus nghâktu hmeichhe puithiam pakhat chuan Lalram Chanchin chu a dawng a. A tûkah pawh, an pan leh a, Phût brochure a dawng leh a. Chumi hnuah nî tinin minute 10 aṭanga 15 chhûng zêl bus dinna hmunah Bible zirpui a lo ni ta a. Thla khat leh a chanve hnuah hmeichhe puithiam in aṭanga chhuak tûrin thu a titlu a; tin, Guatemala-ah a zirna chhunzawm tûrin a haw ta a ni. Malawi-a hmeichhe pakhat inkhâwm taima tak mai Lobina-i chu a fanute’n Jehova Hriatpuitute nên Bible an zir ṭan avângin a lâwm lo hle a. Chutichung pawhin, chu hmeichhiate chuan an nu chu an theih hunah Bible thu tak a hrilh ve zêl a. June 1997-ah Lobina-i chuan Hriatna bu a lo hmu a, a bu hming chuan hriat châkna a neihtîr ta a. July thlaah Bible zir rem a ti a. August thlaah chuan district inkhâwmpuiah a kalin, program tin chu ngun takin a ngaithla a. Chu thla tâwpah chuan a kohhran chu a chhuahsanin, baptisma changlo thuchhuahtu ni tûrin a tling ta a. November 1997-ah baptisma a chang ta a ni.
17, 18. Society vedio-te chu mimal tinte thlarau lam thil “hmu” tûra ṭanpui nân ṭangkai tak a ni tih eng anga fiah nge a nih?
17 Society vedio-te chuan mi tam takte chu thlarau lam thil “hmu” tûrin a ṭanpui a ni. Mauritius rama mi pakhatin a kohhranah inrem lohna a awm avângin a chhuahsan a. Missionary unaupa pakhat chuan Jehova Hriatpuitute an inrem dân chu Pathian Zirtîrna Hmanga Inpumkhat (English) tih vedio hmangin a entîr a. A rilru a khawih êm avângin: “Nangni Jehova Hriatpuitute chu Paradis-ah in awm tawh a nih hi!,” a ti a. Bible zir chu a remti ta a ni. Japan-a mi unaunu pakhat chuan a pasal ring lo mi chu Jehova Hriatpuitute—A Hming Phêna Pâwl (English) tih vedio chu a entîr a; tichuan, hunbi ṭha tak neia Bible zirna neih a duh ta a. Pathian Zirtîrna Hmanga Inpumkhat (English) tih a en zawh chuan, Jehova Hriatpuitute zinga mi nih ve a duh ta a ni. Bible—Thudik Leh Hrilh Lâwkna Lehkhabu (English) tih chhâwng thuma inṭhen chuan Bible thu bulte a nuna hmang tûrin a ṭanpui a. A tawpah chuan, Nazi Beihna Hnuaia Ding Nghet Jehova Hriatpuitute (English) tih chuan Jehova’n A mite chu Setana beihna lakah a tichak a ni tih a entîr a. Chu pa chuan October 1997 khân baptisma a châng ta a ni.
18 Hêng hi rawngbâwlna kum kaltaa kan chên thiltawn tam takte zînga tlêmtê chauh a ni. Chûng chuan Jehova Hriatpuitute’n rinna nung an nei tih leh Jehova’n an rawngbâwlna mal sâwmin chu rinna chu a tichak a ni.—Jakoba 2:17.
Tûn Laia Rinna Chhawmnun
19. (a) Engtin nge Abrahama dinhmun aiin kan dinhmun a ṭhat zâwk? (b) Kum kaltaa Isua thih hriatrengna chu mi eng zâtin nge hmang?
19 Kawng tam takin tûn laia keini chu Abrahama aiin dinhmun ṭha zâwkah kan ding a. Jehova’n Abrahama hnêna a thutiam zawng zawng a hlen chhuak vek a ni tih kan hria a. Abrahama thlahte chuan Kanaan ram chu an luah ngei a; tin, hnâm ropui tak an lo ni ngei a ni. (1 Lalte 4:20; Hebrai 11:12) Chu bâkah, Abrahama’n Haran a chhuahsan hnu kum 1,971-ah, a thlah, Isua chu Baptistu Johana’n tuiah a baptis a; thlarau lama thlîra Abrahama Thlah famkimna, Messia lo ni tûrin Jehova ngeiin thlarau thianghlimin a baptis leh a ni. (Matthaia 3:16, 17; Galatia 3:16) Nisan ni 14, C.E. 33-ah Isua chuan a nunna chu tlan nân a hlân a ni: amaha rinna tilang apiang chu chhandama an awm theih nân. (Matthaia 20:28; Johana 3:16) Mi maktaduai tam takte chu amah avângin mal an insâwm thei tawh a ni. Kum kal taah khân mi 13,896,312-te chuan Nisan ni 14-ah hmangaih thiltih danglam tak hriatrengna hi an hmang a ni. Jehova, thutiam Hlentu Ropui Tak chawimawina a va ni êm!
20, 21. (a) Kum zabi pakhatnaah khân Abrahama Chi Thlah kaltlangin hnam zawng zawngte chu engtin nge mal an insâwm a, engtin nge tûn laiah mal an insâwm zêl?
20 Kum zabi pakhatnaah, hnam zawng zawnga mi tam takte—tisa lam Israel aṭang ṭanin—Abrahama chi thlahah rinna tilangin hriak thih Pathian fate an lo ni a, thlarau lam hnam thar “Pathian Israelte” zînga tel an lo ni ta a ni. (Galatia 3:26-29; 6:16; Tirhkohte 3:25, 26) Pathian Lalrama rorêlpuitu niin vânah tihchhiat theihloh thlarau nun beiseina chiang tak an nei a ni. Mi 1,44,000 chauh chu he tianga malsâwm an ni a, tlêmtê chauh a bâng tawh a ni. (Thu Puan 5:9, 10; 7:4) Kum kaltaah mi 8,756-te chuan Hriatrengna hunserhah entîrnate eiin, he mite zîngah an tel a ni tih an nemnghet a ni.
21 Tûn laia Jehova Hriatpuitute zawng zawng deuh thaw chu Thu Puan 7:9-17-a a sawi angin “mipui nasa tak” an ni. A chhan chu Isua kaltlangin mal an insâwm a, anni chuan lei paradis-ah chatuan nunna beiseina an nei a ni. (Thu Puan 21:3-5) 1998 thuhrilh rawngbâwlnaa tel hêng mi 5,888,650-te chuan, he mipui hi “nasa” tak an ni ngei tih a fiah a ni. Russia leh Ukraine ramin a vawikhatna atân thuchhuahtu 1,00,000 aia tamin report an pe chu a bîk takin phûr thlâk tak a ni. Langsâr tak mai bawk chu United States aṭanga report dawn hi a ni a—August thlaah thuchhuahtu 1,040,283 an nei tawh a ni! Hêng hi kum kaltaa thuchhuahtu 1,00,000 chuang report pe ram 19-te zînga pathum chauh a ni.
Beiseina Thleng Famkim Thuai Tûr
22, 23. (a) Tûn laiah engvângin nge kan thinlung kan tihngheh ang? (b) Engtin nge Paula sawi rinna nei lote ang ni lova, Abrahama ang kan ni tih kan fiah theih ang?
22 Hriatrengna inkhâwm chhîmtute chu Jehova thutiam thlen famkimnaah eng anga thuiah nge kan awm tawh tih hriat nawntîr an ni. Kum 1914-ah Isua chu vân lam Lalramah Lal ni tûrin lalṭhutphahah a ṭhu a, Lalram thuneihna nêna a lo awm lehna chu a ṭan tawh a ni. (Matthaia 24:3; Thu Puan 11:15) A ni! Abrahama Chi Thlah chuan tûnah vânah ro a rêl tawh a ni. Jakoba’n a hun laia Kristiante hnênah: “Chhel takin awm rawh u; in thinlung tinghet rawh u; Lalpa lo kalna [“lo awm lehna,” NW] chu a hnai tawh si a,” tiin, a sawi a. (Jakoba 5:8) Chu lo awm lehna chu tûnah a tak tak a lo ni! Kan thinlung tihngheh chhan tûr tam zâwk tak a va ni êm!
23 Bible zir zat zatna leh awmze nei taka ṭawngṭaina hmangin, Pathian thutiama kan rinngamna chu i tithar reng ang u. Jehova malsâwmna dawng tûrin a thu zawm i bânsan ngai lovang u. Tichuan, Paula lo sawi angin rinna chau takte leh rinnaa thite ang ni lovin, Abrahama ang kan lo ni ang. Kan rinna thianghlim ber lak aṭangin eng mahin min la hrang lo vang. (Juda 20) 1999 rawngbâwl kumah leh hmalam kumtluanin he thu hi Jehova chhiahhlawh zawng zawngte chungah thleng dik tûrin kan ṭawngṭai a ni.
I Hria Em?
◻ Tûn laiah engtin nge Pathian thu kan ngaihthlâk theih ang?
◻ Pathian hnêna awmze nei tak ṭawngṭaina chuan eng hlâwkna nge a thlen?
◻ Jehova kaihhruaina thu âwih taka kan zawm chuan engtin nge kan rinna chu tihchak a nih ang?
[Phêk 16-naa milem]
Jehova Thu kan ngaihthlâk chuan, a thutiama kan rinngamna chu tihthar a ni ang
[Phêk 18-naa milem]
Rawngbâwlnaa kan telin, kan rinna chu tihchak a ni